Reyọ Ẹbẹre Sansan Rehẹ Ọbe ri Bible Teach na Vwo Ruiruo Vwẹ Idjerhe ro Fiotọ

Ohwo re yono Baibol na da rhe riẹn oborẹ Baibol ghini yono, je reyọ vwo ruiruo, ọnana cha nẹrhẹ ọ yan kpo obaro vwẹ erianriẹn rọyen. (Une 1:​1-3) Avwanre sa vwẹ ukẹcha kẹ ihwo rẹ avwanre reyọ Baibol yono vwọ rho tedje womarẹ a vwọ vwẹ ẹbẹre sansan rehẹ ọbe ri Bible Teach na vwo ruiruo vwẹ idjerhe ro shephiyọ.

Enọ rẹ Ọtonphiyọ: Uyovwinrota vuọvo tonphiyọ vẹ enọ ri vwo ẹkpahọnphiyọ vwẹ evun rọyen. Wọ sa nọ enọ nana vwẹ ọtonphiyọ rẹ uyono na vwọ rhanriẹn ẹwẹn ohwo ru wọ guọnọ yono na. Yẹrẹ, wọ sa vuẹ nẹ ọ kpahenphiyọ enọ na kprẹn. Ọ da kpahenphiyọ enọ na chọ, wọ ghwa kpọ viẹ ugege yena-a. Ẹkpahọnphiyọ rọyen na cha chọn wẹ uko vwọ riẹn ẹkpo wọ cha kanrunumu vwẹ uyono na.​—Isẹ 16:23; 18:13.

Apẹndisi: Ohwo ru vwo yono na de vwo ẹruọ rẹ oborẹ uyovwinrota na tare, je rhọnvwe phiyọ, wọ sa vuẹ nẹ o re se apẹndisi ro shekpahen asan rẹ ovwan yonori na komobọ. Vwẹ uyono rọ vwọ kpahọn, wọ sa vwẹ ibrẹro krẹn vwọ fuẹrẹn asan na rere wo vwo vwo imuẹro nẹ ohwo na ghini vwo ẹruọ rẹ asan na. Ẹkẹvuọvo, wo de noso nẹ asan na se fi erere vwọkẹ, gba reyọ ọke evo vwẹ ọke rẹ uyono na vwọ fuẹrẹn apẹndisi na kugbe, se ẹkoreta na, wọ me je nọ enọ ru wo muegbe rọyen phiyotọ.

Ekpeti rẹ Ẹrhomafuẹrẹn: Ẹkpahọnphiyọ rẹ enọ rẹ ọtonphiyọ na yehẹ evunrẹ ekpeti rọhẹ oba rẹ uyovwinrota ọvuọvo. Wọ sa vwẹ ẹbẹre nana vwo ruiruo rere o vwo muwẹro nẹ ohwo na vwo ẹruọ rẹ uyono na. Ovwan se eta vẹ ẹkpo ri Baibol rehẹ ekpeti na phia kugbe. Rere wọ vuẹ ohwo na nẹ ọ vwẹ ẹkpo ri Baibol na vwo dje oboresorọ eta rehẹ evunrẹ ekpeti na vwọ dia uyota.​—Iruo 17:2, 3.