Ẹkarophiyọ Kpahen Ọghwẹkoko Rubrotọ
Ọke rẹ Omẹvwa Na: A cha reyọ uhworo vwọ ton ọrhuẹrẹphiyotọ rẹ ọghwẹkoko na phiyọ vwẹ 8:20 a.m. ẹdẹ erha na vwẹ Nigeria. Ọke yena, avwanre eje gbe chidia hwomamu rere ọrhuẹrẹphiyotọ na sa tonphiyọ vẹ ọghọ. Ọrhuẹrẹphiyotọ na che kuphiyotọ vwẹ Friday vẹ Saturday vwẹ omarẹ 3:55 p.m., Sunday ke rha, 2:45 p.m.
‘Jiri Jihova vẹ Une’: Ihwo rẹ Ọghẹnẹ vwẹ ọke rẹ awanre jiri Jihova vẹ ine, nonẹna, ọtiọyen une je pha ghanghanre vwẹ ẹga rẹ avwanre. (Une 28:7) Ẹbẹre vuọvo rẹ ọghwẹkoko rẹ avwanre tua phiyọ vẹ uhworo. Ọnana dia une re di hworo-o, ẹkẹvuọvo, e ruro rere avwanre sevwo yono kpahen Jihova je ga. Kọyen sorọ rẹ ochidiagbara rẹ ọghwẹkoko na da ta nẹ uhworo rẹ ọmọke na cha tonphiyọ re, ọyena ke ghwa ọke rẹ avwanre vwo chidia rere a kerhọ kẹ uhworo na vẹ ọdavwaro ukperẹ evwọ gbikun. Siẹrẹ avwanre de ru ọtiọyen, o che djephia nẹ avwanre ni ẹgba-ẹdavwọn rẹ ibune rẹ Ukoko na ghanghanre. Abọ-ivẹ ẹgbukpe yen iniọvo nana vwọ fan oma kpẹ Patterson, New York rere ayen se vwo muegbe rẹ ine evwevwerhen vwọ kẹ avwanre. Ọke rẹ avwanre da nabọ kerhọ rẹ uhworo na nu, avwanre eje gbe kuomagbe vwo jiri Jihova womarẹ ẹsuọ rẹ ine rẹ ukoko na.
Asan ra Rhuẹrẹ kẹ Imoto: O vwo iniọvo re vwẹrote asan ra rhuẹrẹ kẹ imoto. Asan na cha ghwa sa gba ihwoeje-e, ọtiọyena, evo sa ro imoto rẹ iniọvo efa ukperẹ ayen vwọ ghwa imoto romobọ rayen. Biko yan nene ọrhuẹrẹphiyotọ rẹ iniọvo nana.—1 Kọr. 13:4, 5.
Asan re Che Chidia: E jẹ avwanre nene iniọvo rẹ avwanre sivwẹn egbara-a. Biko dje erorokẹ phia, wọ sa tobọ yanjẹ asan wo che chidia vwo kẹ iniọvo efa. Uruemu ravwọ vwẹ oma vwo ze ọyen oka ro djephia nẹ avwanre Inene-ri-Kristi rẹ uyota, o ji muẹ ihwoefa re mrẹ avwanre vwo jiri Ọghẹnẹ. (Jọn 13:34, 35; 1 Kọr. 13:5; 1 Pita 2:12) Wọ sa sẹro rẹ asan re chidia kẹ orua wẹn, ihwo rẹ wẹ vẹ ayen ro imoto ọvo yẹrẹ ihwo ru wo yono Baibol na. Biko, asan wo che chidia ọvo, ọyen wo mu erọnvwọn phiyọ. Wo de ru nene ọrhuẹrẹphiyotọ nana, ọ cha nẹrhẹ ihwoefa mrẹ asan chidia. A rhuẹrẹ asan phiyọ rẹ ihwo re ghwore vẹ erẹ oma rayen ghwa ga-an che chidia. Ọ vwọ dianẹ egbara nana ghwe bun na-a, ohwo ọvo yẹrẹ ivẹ re cha vwẹrote ayen yen a guọnore nẹ i chidia kẹrẹ ayen.
Irhuon rẹ Abavo: E jẹ irhuon rẹ avwanre vwẹ ọghwẹkoko na dia ọrẹ abavo, ọ dia ọ ro sherhe ra mrẹ vwẹ akpọ na nonẹna-a. (1 Tim. 2:9) Ọ da tobọ dianẹ avwanre hẹ evunrẹ asan avwanre wonri na yẹrẹ otafe, yẹrẹ avwanre rhovwon oma tavwen omẹvwa na ke tonphiyọ yẹrẹ omẹvwa na fuen nure, avwanre kẹnoma kẹ irhuon re pha farhiẹn farhiẹn. Ọtiọyena, avwanre ke sa sa ibaji avwanre mu, oma je cha vọ avwanre-e siẹrẹ uphẹn revwo soseri de rhie phiyọ. Irhuon abavo vẹ omamọ uruemu rẹ avwanre djephia ọke avwanre de kpẹ ọghwẹkoko na cha nẹrhẹ ihwo ri vwo ubiudu ọsoso kerhọ rẹ ovuẹ ri Baibol ro sivwin arhọ na, ọ je cha nẹrhẹ oma vwerhen Jihova.—Zẹf. 3:17.
Uruemu Abavo Siẹrẹ a da Vwẹ Ifonu vẹ Erọnvwọn Efa Tiọyena Ruiruo: Siẹrẹ avwanre de phi ifonu vẹ erọnvwọn efa tiọyena phiyọ ẹdia ro de jẹ ihwo efa ekpokpo, kọyen avwanre dje uruemu rẹ abavo phia. Avwanre da vwẹ ikamẹra, itablẹti, vẹ erọnvwọn efa revwo hworo eta yẹrẹ ividio reyọ vwo ruiruo, ofori nẹ avwanre dje erorokẹ vwọkẹ ihwo ri chidia kẹrẹ avwanre evwo jẹ ayen erhuro. Avwanre ji dje uruemu rẹ abavo phia siẹrẹ a da kẹnoma kẹ uruemu revwo si evuẹ yẹrẹ i-mel ọke rẹ omẹvwa na.
Emuẹriọ rẹ Ọghẹruvo: Biko mu emu rẹ oghẹruvo wẹn rhe ukperẹ wo vwo kpẹ otafe ra semu re. Wo se mu ikula otete rọ sa ruẹ obotọ rẹ agbara na. A guọnọ ikula ride, isete yẹrẹ igalasi vwẹ ọguan rẹ ọghwẹkoko na-a.
Itetoro: Avwanre se dje ọdavwaro phia kpahen ọrhuẹrẹphiyotọ rẹ ọghwẹkoko na womarẹ itetoro ro nẹ ẹwẹn rhe vwọkẹ iruo rẹ akpọeje. A sa vwẹ ishẹki vwo ru itetoro vwo rhe, “Watch Tower Society of Jehovah’s Witnesses.” E ji se toro womarẹ ikadi rẹ ATM.
Ihunvwun: Wo de vwo ihunvwun wọ reyọ kọke kọke, ghwa ayen nene oma, kiridie e cha dia ọghwẹkoko na-a. E je do igbede revwo duvwun ihwo re muọga ephẹ kufia vwẹ asan ri fori, ọ dia kasan kasan ra mrẹre vwẹ ọguan na yẹrẹ asan re wonri-i.
Revwo Gbẹrophiyotọ: Biko kẹnoma kẹ erọnvwọn re sa kprọ owọ vẹ asan re ghworiẹ kiridie kukpe kukpe yen isabato ri kpenu nọ vwọ wan ihwo oma. Isabato ri kpenu nọ-ọ, ri ji shephiyọ awọ rẹ avwanre yen avwanre kuphiyọ rere avwanre sa vwọ yan vwẹ asan eje.
Egbara Revwo Ghorie Emọ vẹ Egbara re Kpirhẹ: A guọnọ egbara revwo ghorie emọ yẹrẹ egbara re kpirhẹ vwẹ ọghwẹkoko na-a. Ẹkẹvuọvo, a rhọnvwe phiyọ egbara re vwo mu emọboba, ọ dia ọ re ghorie na-a. E jẹ emiọvwọn mu egbara tiọyen kẹrẹ oma.
Ishani: A guọnọ ishani egangan re sa rhanre ohwo-o, enana sa rhanriẹ ega rẹ iniọvo rẹ avwanre evo.—1 Kọr. 10:24.
Ifọmu ri Please Follow Up (S-43): A guọnọre nẹ avwanre reyọ ifọmu rẹ Please Follow Up na vwọ niyẹnrẹn rẹ ihwo re ghwoghwota kẹ ri dje omavwerhovwẹn phia vwẹ ọke ọghwẹkoko na. Vwẹ iyẹnrẹn na kẹ oniọvo rọhẹ asan ra da reyọ ẹbe yẹrẹ vwọkẹ osiọbe rẹ ukoko wẹn siẹrẹ wo de te uwevwin.
Asan ra da Semu Ria: Bru ọghọ phiyọ Jihova oma womarẹ omamọ uruemu wẹn vwẹ asan ra da semu ria. Sẹn osẹvwen rẹ abavo. Ru ẹse kẹ ihwo re wian vwẹ asan ru wo wọnri na siẹrẹ o de shephiyọ.
Ihotẹ vẹ Asan Efa re Won:
Uchunu rẹ ibruwevwin wọ cha dia yen wo ru ọrhuẹrẹphiyotọ rọyen, uchunu rẹ ihwo ra guọnọre nẹ e dia asan wo wonri na, eyen cha dia.
Yan mu ọrhuẹrẹphiyotọ ru wo ruru kpahen asan wo che won na, jokpanẹ emu ri kpregede phiare. Ọ da dia ọtiọyen, gba fobọ vuẹ ihwo ri vwo asan na rere ohwọfa sa vwọ reyọ. (Mat. 5:37) Wọ da guọnọ siobọnu asan na, wẹ vẹ ohwo na ta phiyọ. Wọ da guọnọ nẹ ayen rhan igho wẹn kẹ wẹ, gba vuẹ ayen phiyotọ ẹdẹ ivẹ tavwen wo ki siobọnu asan na.
Muegbe rẹ eghwa wẹn phiyotọ tavwen wọ ke reyọ orọnvwọn revwo ghorie eghwa vwo mu ayen, wọ me je fobọ reyọ rhivwin.
Asan re dje kẹ wẹ ọvo ọyen wo de cheremu.
Ọ da dianẹ ihotẹ wo wonri na, vwo ọrhuẹrẹphiyotọ rẹ iti, ikọfi vẹ efa ọphẹ, wo mu ayen mwẹ reyọ-ọ.
Ọkieje, dje omamọ rẹ ẹwẹn ọfuanfon na phia vwọkẹ ihwo re wian vwẹ ihotẹ na vẹ iniọvo re wian vwẹ Akon Iruo re Vwẹrote Asan re Won. Ọ vwọ dianẹ ihwo buebun yen ayen vwẹrote na, ọ cha da ayen ẹro siẹrẹ avwanre de vwo edirin, ji dje uruemuesiri kugbe erorokẹ phia.
Ọkieje, e jẹ emiọvwọn vwẹrote emọ rayen vwẹ ihotẹ, asan ra da rhẹrhẹ vẹ asan rẹ ayen wonri na.
Asan rẹ ukoko vwọ kẹ wẹ ọvo ọyen wọ dia, rere ihwo vwo je buẹn nọ. A guọnọre nẹ eshare diotọ kri yẹrẹ vwerhẹn vwẹ uvun rẹ iniọvo eya-a, ọtiọyen ọ je hepha vwọkẹ iniọvo rẹ eya.
Siẹrẹ ebẹnbẹn da vwomaphia vwẹ asan wo wonri, fobọ vuẹ Akon Iruo re Vwẹrote Asan re Won vwẹ ọghwẹkoko na rere ayen chọn wẹ uko.
Omaẹvwọkpahotọ kẹ Owian: Kohwo kohwo rọ guọnọ vwomakpahotọ kẹ owian, e jẹ o bru Akon Iruo re Vwẹrote ẹdia nana vwẹ ọghwẹkoko na ra. Emọ ri ji rhi te ẹgbukpe 16, se nene ọsẹ yẹrẹ oni, ohwo rẹ ayen nene dia, yẹrẹ oniọvo ọfa rẹ ọsẹ rayen rhọnvwe kẹ wian.