Revwo Ruẹ Ona rẹ Aghwoghwo rẹ Avwanre Yovwẹn Phiyọ​—⁠Obo Wọ Kpahen kẹ Ohwo rẹ Ivun Miovwẹn

Oboresorọ Ọ Vwọ Ghanre: Ihwo buebun rẹ avwanre mrẹ vwevunrẹ aghwoghwo na hepha dẹndẹn. Ẹkẹvuọvo, Jesu tarọ jovwo nẹ ihwoevo che vwo utuoma kpahen avwanre. (Jọn 17:14) Eriyin na, o rhe gbe avwanre unu siẹrẹ avwanre da yan mrẹ ihwo rẹ ivun avwanre miovwẹ-ẹn. Siẹrẹ emu ọtiọyen da phia, ofori nẹ ẹkpahọnphiyọ avwanre dia ọ rọ nẹrhẹ oma vwerhen Jihova, ohwo rẹ avwanre ghwoghwo odẹ rọyen na. (Rom 12:​17-​21; 1 Pita 3:​15) Avwanre de ru ọtiọyen, ọkiọvo, ivun rhe che miovwon ohwo na ganọ-ọ. Ọ cha dia oseri kẹ ohwo na kugbe ihwoefa rehẹ etiyin, ọ me rhe nẹrhẹ ayen kerhọ ọkiọfa rẹ Iseri Jihova de ghwoghwota te etiyin.​—⁠2 Kọr. 6:⁠3.