Die yen Uvie rẹ Ọghẹnẹ Che Ru?

OBORẸ UVIE RẸ ỌGHẸNẸ RURE

Vwẹ uyovwinrota rọ wanre na, avwanre fuẹrẹn oka rẹ Jesu vwọphia. Oka na djerephia phephẹn nẹ a vwẹ Uvie rẹ Ọghẹnẹ vwo mu vwẹ odjuvwu re, Jesu Kristi yen Ovie rọyen.

Baibol na tare nẹ ọke ra da vwẹ ẹgba rẹ usuon vwọ kẹ Jesu re, kọ cha djẹ Eshu vẹ emekashe rọyen nẹ odjuvwu rhe. Otọrakpọ na ọvo kọyen ayen de ru umiovwo, ọna yen orọnvwọn ọvo rọ nẹrhẹ erọnvwọn dia brabra vwo nẹ ukpe rẹ 1914 rhe.—Ẹvwọphia 12:7, 9.

Dede nẹ akpọ na rhoma braphiyọ, Jesu, rọ dia Ovie rẹ Uvie rẹ Ọghẹnẹ, vwẹ ukẹcha kẹ ihwo rehẹ akpọneje. Ọyen emu rẹ aghọghọ re vwo yono ihwo vwẹ akpọneje kirobo rẹ Jesu mraro rọyen, ihwo buebun nabọ vwẹ uchebro ri Baibol na vwo yeren akpọ kẹdẹ kẹdẹ. (Aizaya 2:2-4) Iduduru rẹ ihwo nabọ yono omamọ uruemu kpahen iruo, re vwo ru akpeyeren rẹ orua yovwẹnphiyọ, ji vwẹ ẹro abavo vwo ni ekuakua rẹ akpeyeren. Ihwo tiọyena yono oborẹ ayen se vwo yeren omamọ akpọ asaọkiephana ji muegbe hẹrhẹ akpọ rẹ ufuoma vwẹ Uvie rẹ Ọghẹnẹ.

DIE YEN UVIE RẸ ỌGHẸNẸ JI CHE RU?

Dede nẹ Jesu suẹn vwẹ odjuvwu re, ihworakpọ yen ji suẹn akpọ na. Ẹkẹvuọvo, Ọghẹnẹ yen vuẹ Jesu: “Phikparobọ vwẹ uvwre rẹ ivwighrẹn wẹn.” (Une Rẹ Ejiro 110:2, NW) O rhe che kri-i, Jesu che phi ivwighrẹn rọyen kparobọ, ọke rọ cha vwọ rhe rhe ghwọrọ ihwo re vwọsua na, kọ cha vwẹ ufuoma vwọ kẹ ihwo ri bicha Uvie rẹ Ọghẹnẹ.

Vwẹ ọke yena, Uvie rẹ Ọghẹnẹ ko che

• Si ẹga rẹ efian no. Ẹga ri yono efian kpahen Ọghẹnẹ, re je nẹrhẹ akpọ bẹn kẹ ihwo nonẹna rha cha dia ọfa-a. Baibol na vwẹ ẹga rẹ efian vwo dje igberadja. Ẹghwọrọ rọyen che gbe ihwo buebun unu.—Ẹvwọphia 17:15, 16.

• Phi oba phiyọ usuon rẹ ihworakpọ. Uvie rẹ Ọghẹnẹ che phi oba phiyọ usuon rẹ ihworakpọ.—Ẹvwọphia 19:15, 17, 18.

• Si irumwemwu no. Kẹ ihwo ri muomaphiyọ umwemwu eruo re rhọnvwe vwomakpotọ kẹ Uvie rẹ Ọghẹnẹ-ẹ vwo? “A cha nyavwe iruimwemwu kufia nẹ evun rẹ otọ na.”—Isẹ 2:22.

• Si Eshu vẹ emekashe rọyen no. Eshu vẹ emekashe rọyen rha cha sa phiẹn “ẹgborho rẹ akpọ na” ọfa-a.—Ẹvwọphia 20:3, 10.

Die yen enana eje che mudiaphiyọ vwọ kẹ ihwo ri rhiabọreyọ Uvie rẹ Ọghẹnẹ?

OBORẸ UVIE RẸ ỌGHẸNẸ CHE RU KẸ IHWORAKPỌ

Jesu suẹn kerẹ Ovie vwẹ odjuvwu re, o che ru oborẹ osun vuọvo se ru-u. Ihwo 144,000 ra sanere vwo nẹ akpọ na yen che nene sun. (Ẹvwọphia 5:9, 10; 14:1, 3) O che ru obo re cha nẹrhẹ ọhọre rẹ Ọghẹnẹ rugba vwẹ otọrakpọ na. Die yen Uvie rẹ Ọghẹnẹ che ru vwọ kẹ ihworakpọ?

• O che si ega vẹ ughwu no. “O gbi vwo ohwo rẹ orere na ọvuọvo rọ sa tanẹ, Me mwọga-a,” “ughwu gbe cha dia ọfa-a.”—Aizaya 33:24; Ẹvwọphia 21:4.

• Ọ cha ghwa obọdẹn ufuoma vẹ ofuvwegbe rhe. “Erhuvwu [yẹrẹ ufuoma] rẹ emọ wẹn ke cha rho gangan,” “dohwo dotọ ri vain kugbe fig rọye ki che tidia, ohwo ọvuọvo gbe djẹ ọshọ mu aye-en.”—Aizaya 54:13; Maika 4:4.

• Ọ cha vwẹ omamọ owian vwọ kẹ ihwo. “Ihwo mẹ re me jẹreyọ na ke cha ghọghọ krekri vwẹ iruo rẹ ayen vwẹ abọ rayen ru. Ayen gbe wian kufia-a.”—Aizaya 65:22, 23.

• Ọ cha rhuẹrẹ otọrakpọ na phiyọ. “Aghwa na kugbe otọ ọyaya na ke cha ghọghọ, aton na cha ghọghọ ro de di ẹbe gbidigbidi; kerẹ igbodigbo.”—Aizaya 35:1.

• O che yono ihwo oborẹ ayen se vwo vwo arhọ ri bẹdẹ. “Ọnana hẹ arhọ ro vwo oba-a na, rere ayen vwọ riẹn owẹ ọvo rẹ Ọghẹnẹ rẹ uyota na, kugbe Jesu Kristi ru wo ji rhe na.”—Jọn 17:3.

Ọghẹnẹ guọnọre nẹ wọ mrẹ ebruphiyọ nana eje. (Aizaya 48:18) Uyovwinrota rọ vwọ kpahen ọnana che dje obo wo se ru asaọkiephana wo se vwo vwo arhọ ri bẹdẹ.