A Ma Avwanre A Vwọ Dia Bẹdẹ

Diesorọ ihwo vwọ guọnọ dia bẹdẹ? Baibol na vuẹ avwanre nẹ Ọghẹnẹ phi iroro yena phiyọ ubiudu rẹ avwanre. (Aghwoghwo 3:11) Ọ je tanẹ “Ọghẹnẹ hẹ ẹguọnọ.” (1 Jọn 4:8) Ọghẹnẹ ro vwo ẹguọnọ de se phi iroro rẹ arhọ rẹ bẹdẹ phiyọ ubiudu rẹ avwanre, o rhe se ruo avwanre me dia bẹdẹ?

Vwọrẹ uyota, ohwo vuọvo guọnọ ghwu-u. Baibol na dje ughwu kerẹ “ọvweghrẹ” ra ghẹmrẹ. (1 Kọrẹnt 15:26) Ihwo evo fobọ ghwẹ; efa fobọ ghwẹ-ẹ. Ẹkẹvuọvo, ohwo vuọvo cha sa vrabọ rẹ ughwu-u. Ihwo buebun guọnọ roro kpahen ughwu-u kidie ọ nẹrhẹ oshọ mu ayen. E che phi ọvweghrẹn nana kparobọ ẹdẹ ọvo? E se ghini ruo?

OBO RE SA NẸRHẸ E VWO IPHIẸROPHIYỌ

O che gbewunu wọ da riẹn nẹ ọ dia ọhọre rẹ Ọghẹnẹ ihworakpọ vwo ghwu-u? Ọbe rẹ Jẹnẹsis kẹ avwanre imuẹro nẹ Ọghẹnẹ guọnọre nẹ ihworakpọ dia akpọ na bẹdẹ. Jihova Ọghẹnẹ nabọ muegbe rẹ akpọ na vwọ kẹ ihworakpọ. Ọ da ma ọshare rẹsosuọ, Adam, o de phio phiyọ iparadaisi vwẹ ogba rẹ Idẹn. O vwo ru ọyena nu, “Ọghẹnẹ da mrẹ emu kemu rọ mare na, nighe, oyovwiri gangan.”—Jẹnẹsis 1:26, 31.

A ma Adam gbagba vwẹ uhoho rẹ Ọghẹnẹ. (Urhi Rivẹ 32:4) Ọ je ma aye rẹ Adam, Ivi, gbagba. Jihova da vuẹ ayen: “We vwiẹ ri we bun phihọ, re wa vọn akpọ na, ru we phio kparobọ, kugbe re we vwo ogangan vwẹ enu rẹ erin rẹ urhie, ephran ri obenu kugbe enu ri kemu kemu rọ yan vwẹ otọ na ejobi.”—Jẹnẹsis 1:28.

Ọ cha reyọ ọke e ki se vwiẹ akpọ na vọn. Ivi che vwiẹ emọ, emọ rọyen mi rhe vwiẹ emọ rayen, rhi duvwun ọke rẹ akpọ na cha vwọ vọn kirobo rẹ Ọghẹnẹ guọnọre. (Aizaya 45:18) Jihova sa vwẹ iphiẹrophiyọ nana kẹ Adam vẹ Ivi ọ da dianẹ emọ rayen vẹ ivwrọmọ rayen ọvo yen ayen che yeren akpọ mrẹ, jẹ ayen riẹn obo ri che nẹ obuko rọyen rhe-e?

Gbe ji roro kpahen obo ro mudiaphiyọ re vwo vwo ogangan vwẹ enu rẹ eranvwe na. A vuẹ Adam nẹ o mu odẹ kẹ eranvwe na, ọnana cha reyọ ọke dẹn. (Jẹnẹsis 2:19) Re vwo vwo ogangan vwẹ enu rẹ eranvwe na mudiaphiyọ ra vwọ nabọ riẹn eranvwe na ji vwẹrote ayen. Ọnana yen cha tobọ ma reyọ ọke.

Ọtiọyena, iji rẹ Ọghẹnẹ re vwo vwiẹ akpọ na vọn je vwẹrote eranvwe na djephia nẹ a ma aye gbe ọshare rẹsosuọ na ayen vwọ dia bẹdẹ. Vwọrẹ uyota, Adam tọnre.

AYEN TỌNRE DẸN

Baibol na djerephia nẹ ọke ri jovwo ihwo tọn mamọ. Ọ da ta: “Ẹdẹ rẹ akpọ rẹ Adam ejobi da dia ikpe uri ẹnẹ gbe ujosa gbe ihwe.” O de ji kere eshare esan efa ri yerin vrẹ ẹgbukpe 900! Eyehẹ Sef, Inosh, Jared, Metusela, kugbe Noa. Ayen eje diarọ tavwen a ke mrẹ oghwẹ rẹ ọke rẹ Noa, Noa te ẹgbukpe 600 tavwen oghwẹ na ki ku. (Jẹnẹsis 5:5-27; 7:6; 9:29) Mavọ yen ayen sa vwọ tọn te ọtiọyen?

Ọke rẹ ihwo nana eje vwọ dia akpọ kẹrẹ ọke rẹ ihworakpọ vwọ dia gbagba. Ọ sa dianẹ ọnana yen nẹrhẹ ayen tọn te ọtiọyen. Jẹ, mavọ yen ẹdia ọgbagba vwo churobọ si uchọke rẹ ohwo sa dia akpọ kri te? Mavọ yen e che vwo phi ughwu kparobọ? A sa vwọ mrẹ ẹkpahọnphiyọ rẹ enọ nana, e jẹ a ka riẹn oboresorọ a vwọ ghwa ji ghwẹ.