‘Ota rẹ Ọghẹnẹ Vọnre vẹ Ẹgba’

“Ota rẹ Ọghẹnẹ na ọkpokpọ gbrọgbrọ sasasa.”—HIB 4:12.

1. Diesorọ o vwo mu we ẹro nẹ Ota rẹ Ọghẹnẹ vwo ẹgba? (Ni uhoho rẹsosuọ na.)

KERẸ ihwo rẹ Jihova, avwanre vwo imuẹro nẹ Ota rẹ Ọghẹnẹ rọ dia ovuẹ rọyen vwọ kẹ ihworakpọ, “ọkpokpọ gbrọgbrọ sasasa.” (Hib. 4:12) Buebun avwanre rhiẹromrẹ ẹgba rẹ Ota rẹ Ọghẹnẹ vwẹ akpeyeren avwanre. Baibol na nẹrhẹ ihwo evo siobọnu iruemu kerẹ uji echo, ọfanrhiẹn egbe, kugbe ihuvwun egangan ẹreyọ, ayen de kurhẹriẹ rhe ukoko na. Efa hẹ ẹdia rode vwẹ akpọ na jovwo, ẹkẹvuọvo ayen de no nẹ emu ọvo kanre ayen. (Aghwo. 2:3-11) Nẹ ọke ra ruọke yen a vwọ mrẹ ihwo rẹ Baibol na vwẹ ukẹcha kẹ vwo wene orharhe akpeyeren rẹ ayen yerẹn jovwo. Ọkiọvo wo se buebun rẹ ikuegbe tiọyena re, vwẹ ẹbẹre rẹ “Baibol Na Wene Ohwo,” rọ vwọmaphia vwẹ Uwevwin Orhẹrẹ na. E de kurhẹriẹ rhe ukoko na nu, o ji fo nẹ a vwẹ ọkieje vwọ bọn oyerinkugbe avwanre vẹ Jihova gan, womarẹ ukẹcha rẹ Baibol na.

2. Mavọ yen a vwọ mrẹ ẹgba rẹ Ota rẹ Ọghẹnẹ vwẹ oma rẹ Inenikristi rẹ ọke awanre?

² Siẹrẹ a da mrẹ ihwo rẹ Ota rẹ Ọghẹnẹ wene akpeyeren rayen, o gbe avwanre unu-u. Ikuegbe rẹ ihwo tiọyena nẹrhẹ a karophiyọ Inenikristi rẹ ẹgbukpe ujorin ẹsosuọ ri vwo iphiẹrophiyọ rẹ obo odjuvwu. (Se 1 Kọrẹnt 6:9-11.) Ọyinkọn Pọl vwo djunute ihwo re cha sa riuku rẹ Uvie rẹ Ọghẹnẹ-ẹ nu, ọ da ta: “Ọtiọye evo vwẹ usun rẹ ovwan na epha jovwo.” Ẹkẹvuọvo, Ota rẹ Ọghẹnẹ kugbe ẹwẹn ọfuanfon rọyen chọn ayen uko vwo wene. Evo re tobọ mrẹ uyota na vughe nu, ji ru umwemwu. Kerẹ udje, Baibol na djunute Onenikristi ọvo ra jẹreyọ, ra djẹ nẹ Ukoko. Ukuko na, a da reyọ rhivwin. (1 Kọr. 5:1-5; 2 Kọr. 2:5-8) Ọ kẹ avwanre omavwerhovwẹn ra vwọ riẹn nẹ Ota rẹ Ọghẹnẹ chọn iniọvo rẹ avwanre uko vwo siobọnu erharhe iruemu.

3. Die yen e che yono kpahen vwẹ uyono nana?

³ Jihova kẹ avwanre Ota rọyen rọ vọnre vẹ ẹgba. Avwanre guọnọ reyọ vwo ruiruo vwẹ idjerhe ro me yovwin. (2 Tim. 2:15) Vwẹ uyono nana, a cha fuẹrẹn obo re se vwo dje ẹgba rẹ Ota rẹ Ọghẹnẹ phia vwẹ (1) vwẹ akpeyeren avwanre, (2) vwẹ iruo aghwoghwo na, kugbe (3) ọke re de yono vwẹ enu rẹ umukpe. Ọnana cha chọn avwanre uko vwo dje ẹguọnọ vẹ ọdavwaro avwanre phia kẹ Jihova, ọ je cha nẹrhẹ avwanre mrẹ erere komobọ.—Aiz. 48:17.

VWẸ AKPEYEREN AVWANRE

4. (a) Die yen ofori nẹ e ru, rere Ota rẹ Oghẹnẹ se vwo wene akpeyeren rẹ avwanre? (b) Ọke vọ yen wo vwo ruẹ isese rẹ Baibol wẹn?

⁴ E de se Ota rẹ Ọghẹnẹ kẹdẹ kẹdẹ, o se wene akpeyeren rẹ avwanre. (Jos. 1:8) Vwọrẹ uyota, buebun rẹ avwanre vwo erọnvwọn sansan re reyọ ọke rẹ avwanre. E jẹ a vwẹ uphẹn kẹ orọnvwọn vuọvo nẹ o gbowọphiyọ ọrhuẹrẹphiyotọ rẹ isese rẹ Baibol re kẹdẹ kẹdẹ rẹ avwanre-e. (Se Ẹfesọs 5:15, 16.) Idibo rẹ Jihova buebun rhuẹrẹ ọke rayen phiyọ, rere ayen se vwo se Baibol na kurhiọke kurhiọke, efa se vwẹ oghẹruvo yẹrẹ ovwọnvwọn. Ayen rhọnvwephiyọ ota rẹ ọbuine na, ro siri nẹ, “E, mavọ me guọnọ urhi wen te! Ọye mi roro vwẹ ẹdẹ na ejobi.”—Une 119:97.

5, 6. (a) Diesorọ o vwo fo nẹ e roro kpahen obo re seri? (b) Mavọ yen a sa vwọ nabọ ru ọtiọyen? (c) Erere vọ yen wọ mrẹ vwo nẹ isese rẹ Baibol vẹ eroro kpahọn re?

⁵ Re di vwo se Baibol, ọyena ọvo teri-i. O ji fo nẹ e ji roro kokodo kpahen obo re se. (Une 1:1-3) Ọyena cha nẹrhẹ a sa vwẹ aghwanre rọhẹ evun rọyen vwo ruiruo. Owenẹ ọ dia ọ ra teyenphia yẹrẹ ọ rọhẹ evun rẹ ikọmputa yẹrẹ ifonu yen avwanre se, ọdavwẹ avwanre ọyen a vwọ vwẹ obo re seri vwo ruiruo.

⁶ Mavọ yen a sa vwọ nabọ roro kpahen obo re seri? Ihwo buebun de se ẹkpo evo nu, kẹ ayen dunujẹ, ayen me nọ oma rayen enọ kerẹ: ‘Die yen ọnana yono uvwe kpahen Jihova? Mavọ yen mi vwẹ ẹkpo nana vwo ruiruo te re? Ẹdia vọ yen mi de se ru yovwinphiyọ?’ Avwanre de roro kpahen obo re seri vwẹ Baibol na, je nẹrhovwo kpahọn, ọ cha nẹrhẹ e vwo ẹwẹn re vwo ru nene obo re seri. Ukuotọ rọyen, ke se dje ẹgba rẹ Ota rẹ Ọghẹnẹ phia vọnvọn vwẹ akpeyeren avwanre.—2 Kọr. 10:4, 5.

VWẸ IRUO AGHWOGHWO NA

7. Mavọ yen a sa vwọ nabọ vwẹ Baibol na vwo ruiruo vwẹ aghwoghwo?

⁷ Die yen sa chọn avwanre uko vwọ nabọ vwẹ Baibol na vwo ruiruo vwẹ aghwoghwo? Ẹsosuọ, reyọ vwo ruiruo kọke kọke wo de ghwoghwo yẹrẹ wo de yono ihwo. Oniọvo ọvo da ta, “Ọ da dianẹ owẹ vẹ Jihova yen kpo aghwoghwo, wẹwẹ ọvo cha ta ota na eje? Gbanẹ wọ cha vwẹ uphẹn kẹ nẹ ọ je ta ota?” Obo rọ guọnọ ta na kẹ ọna: E de se Baibol kẹ ohwo vwẹ aghwoghwo, kọ cha họhọ nẹ a vwẹ uphẹn kẹ Jihova nẹ ọ ta ota kẹ ohwo re ghwoghwo ota kẹ. Ẹkpo rẹ Baibol ra nabọ riẹn sane, yen che me te ubiudu rẹ ihwo vwọ vrẹ ota romobọ avwanre. (1 Tẹsa. 2:13) Nọ oma wẹn, ‘Mi reyọ kuphẹn kuphẹn ro rhiephiyọ vwo se Ota rẹ Ọghẹnẹ kẹ ihwo ri mi ghwoghwo ota kẹ?’

8. Diesorọ a vwọ tanẹ o teri e di vwo se Baibol kẹ ohwo re ghwoghwo ota kẹ-ẹ?

⁸ Ẹkẹvuọvo, re di vwo se Ota rẹ Ọghẹnẹ kẹ ihwo, ọyena ọvo teri-i. Diesorọ? Kidie ihwo buebun ghwa riẹn kpahen Baibol na-a. Kirobo rọ hepha vwẹ ẹgbukpe ujorin ẹsosuọ, ọtiọyen ọ je hepha nonẹna. (Rom 10:2) O rhe fo re vwo roro nẹ kohwo kohwo re se Baibol kẹ, che ghwe vwo ẹruọ rọye-en. Ofori nẹ a ghwọrọ ọmọke vwọ kanrunumu ẹkpo evo vwẹ asan re seri na; a sa vwanriẹn urhiẹ evo, ji nabọ djisẹ rayen. E de ru ọtiọyen, ọ cha nẹrhẹ Ota rẹ Ọghẹnẹ fobọ te ubiudu rẹ ihwo re ghwoghwo ota kẹ.—Se Luk 24:32.

9. Tavwen e ki se ẹkpo rẹ Baibol kẹ ohwo, die yen a sa ta rọ cha nẹrhẹ o muọghọ kẹ Baibol na? Djudje rọyen.

⁹ Tavwen e ki se ẹkpo rẹ Baibol kẹ ohwo, ofori nẹ a ta ota rọ cha nẹrhẹ o muọghọ kẹ Baibol na. Kerẹ udje, wọ sa tanẹ, “E jẹ e ni oborẹ Ọmemama avwanre ta kpahen ota nana.” Wo de ghwoghwo ota kẹ ohwo ro kpo ishọshi-i, wọ sa ta, “Ni oborẹ Isiesi Ọfuanfon na vuẹ avwanre.” Ọ da rha dia ohwo ro vwo omavwerhovwẹn kpahen ẹga-a, wo sa ta, “Wo nyo isẹ awanre nana dẹvure?” Vwọrẹ uyota, ofori nẹ e roro kpahen oka rẹ ohwo re ghwoghwo kẹ, rere a nuẹ nene.—1 Kọr. 9:22, 23.

Iseri rẹ Jihova re vwẹ Baibol vwo ruiruo vwẹ aghwoghwo

10. (a) Gbikun rẹ oborẹ oniọvo ọvo rhiẹromrẹ. (b) Idjerhe vọ yen wo vwo rhiẹromrẹ ẹgba rẹ Ota rẹ Ọghẹnẹ vwẹ iruo aghwoghwo wẹn?

¹⁰ Iniọvo buebun rhe mrẹvughe nẹ Ota rẹ Ọghẹnẹ vwo ẹgba ro se vwo wene ihwo re ghwoghwo ota kẹ. Roro kpahen udje nana. Oniọvo ọshare ọvo rhivwin bru ọshare ọvo rọ kpakore. Ọshare na se imagazini avwanre vwẹ ikpe buebun cha re. Ẹkẹvuọvo, ukperẹ ọ de vwọ vwẹ Uwevwin Orhẹrẹ kpokpọ kẹ, oniọvo na de se ẹkpo rẹ Baibol ọvo rọhẹ imagazini na kẹ ọshare na. O se 2 Kọrẹnt 1:3, 4 kẹ, rọ tare nẹ: “Ọsẹ rẹ aruẹdọn kugbe Ọghẹnẹ rẹ uchebro, . . bru avwanre uche vwẹ evun rẹ ukpokpogho ejobi.” Ẹkpo rẹ Baibol na de te ọshare na ẹwẹn mamọ, ọ da vuẹ oniọvo na nẹ ọ rhoma se. Ọ da je tanẹ ọ vẹ aye rọyen guọnọ uchebro mamọ. O de ji vwo ẹwẹn ro vwo yono Baibol na. Aphro herọ-ọ, Ota rẹ Ọghẹnẹ ghene vọn vẹ ẹgba.—Iruo 19:20.

ỌKE RE DE YONO VWẸ ENU RẸ UMUKPE

11. Oghwa vọ yen e mu kẹ iniọvo eshare re ta ota vwẹ enu rẹ umukpe?

¹¹ Oma vwerhen avwanre kọke kọke re de kpo uyono, isikoko kugbe eghwẹkoko. Avwanre ra, kidie ọnana idjerhe ọvo ra vwọ ga Ọghẹnẹ. Vwọba, avwanre mrẹ uvi rẹ erere vwo nẹ uyono ra vwọphia vwẹ emẹvwa tiọyena. Iniọvo eshare ra ghare eta kẹ, ni uphẹn ro te ayen obọ na ghanghanre. Dedena, ayen riẹnre nẹ oghwa rode yen ọ hepha. (Jems 3:1) Ofori nẹ ayen mu uyono rayen kpahen Ota rẹ Ọghẹnẹ. Mavọ yen wo se vwo dje ẹgba rẹ Ota rẹ Ọghẹnẹ phia vwẹ ota ra ghare kẹ wẹ?

Oniọvo ọvo ro mudia enu rẹ umukpe, jẹ ọ vwẹ Baibol vwo yono ihwo

12. Mavọ yen oniọvo rọ ta ota vwẹ enu rẹ umukpe se vwo mu ota rọyen kpahen Baibol na?

¹² Davwẹngba rere wo mu ota wẹn kpahen Baibol na. (Jọn 7:16) Die yen ọyena churobọ si? Wo jẹ erọnvwọn kerẹ, oborerhiẹromrẹ, udje, yẹrẹ oborẹ wọ ta ota wan, nẹrhẹ ihwo tẹnrovi we ukperẹ Baibol na-a. Karophiyọ, ọ dia oborẹ ẹkpo rẹ Baibol re seri bun te, yen cha nẹrhẹ ọ dia uyono re mu kpahen Baibol na-a. Ẹkpo rẹ Baibol re seri de bun nọ, e rhe che vwo oniso rẹ ọ rẹ wọ guọnọre nẹ ọ teyenphia-a. Ọtiọyena, gba jomaotọ sane ẹkpo rẹ Baibol rẹ wo che se, ghwọrọ ọke vwo se ayen, fan ayen fiotọ, ru udje rayen, ji dje obo ra sa vwọ vwẹ ayen vwo ruiruo. (Neh. 8:8) Ọ da dia ọbe rẹ ota rẹ ukoko na yen wo che vwo ruiruo, nabọ fuẹrẹn ọbe rẹ ota na vẹ ẹkpo rẹ Baibol rehẹ evun rọyen. Davwẹngba wo vwo ẹruọ rẹ oborẹ eta na vẹ ẹkpo rẹ Baibol ra rionbọra na churobọ si ohwohwo. Gba sane ẹkpo rẹ Baibol rẹ wo se vwo yono ẹkpo eghanghanre rehẹ evun rẹ ọbe rẹ ota na. (Wọ sa mrẹ iroroẹjẹ evo vwẹ uyono 21 fiẹ 23 rẹ ẹbe re se Benefit From Theocratic Ministry School Education.) Ọ rọ ma rhọ, nokpẹn rẹ ukẹcha rẹ Jihova womarẹ ẹrhovwo rere wo se vwo yono uyota eghanghanre rehẹ Baibol na.—Se Ẹzra 7:10; Isẹ 3:13, 14.

13. (a) Ukẹcha vọ yen oniọvo aye ọvo mrẹre vwo nẹ ẹkpo rẹ Baibol ra vwọphia vwẹ omẹvwa? (b) Mavọ yen obo ra vwẹ Baibol na vwo ruiruo vwẹ emẹvwa avwanre djobọte we?

¹³ Ẹkpo rẹ Baibol re vwo ruiruo vwẹ uyono, nabọ djobọte oniọvo aye ọvo rọ dia ẹkuotọ rẹ Australia. Oniọvo aye nana rioja mamọ vwẹ ọkiemọ. Dede nẹ o rhiabọreyọ ovuẹ rẹ Baibol na ji vwomakpahotọ kẹ Ọghẹnẹ, o niro nẹ Jihova vwo ẹguọnọ rọye-en. Jẹ ọke vwọ yanran na, iroro rọyen de rhi wene. Die yen chọn rọ uko vwo vwo imuẹro nẹ Jihova vwo ẹguọnọ rọyen? Ọ nabọ roro kokodo kpahen ẹkpo rẹ Baibol ọvo re seri vwẹ uyono rọ rare ẹdẹ ọvo, ọ da vwẹ ẹkpo rẹ Baibol yena vwọ vwanvwen ẹkpo rẹ Baibol efa.a O vwo ẹkpo rẹ Baibol ọvo ra vwọphia vwẹ emẹvwa, isikoko, yẹrẹ eghwẹkoko, ro te we ẹwẹn dẹvure?—Neh. 8:12.

14. Mavọ yen e se vwo dje ọdavwaro pha kpahen Ota rẹ Jihova?

¹⁴ Oma rha vwerhen avwanre nẹ Jihova kẹ avwanre Baibol na rọ dia Ota rọyen? Ọ vwẹ okẹ nana vwọ kẹ avwanre ihworakpọ, o de ji ru orugba rẹ uve rọyen, nẹ Ota rọyen cha dia bẹdẹ bẹdẹ. (1 Pita 1:24, 25) Ofori nẹ e se Ota rẹ Ọghẹnẹ ọkieje, reyọ vwo ruiruo vwẹ akpeyeren rẹ avwanre, ji reyọ vwọ vwẹ ukẹcha kẹ ihwo efa. E de ru ọtiọyen, ke se dje ẹguọnọ vẹ ọdavwaro phia kpahen okẹ ọghanghanre nana kugbe Jihova Ọghẹnẹ ro siobọno kẹ avwanre.

a Ni ekpeti na “Ewene.”

“Ewene”

Ikpe buebun re wanre yen Victoria vwọ mrẹ uyota na vughe, jẹ o niro nẹ Ọghẹnẹ vwo ẹguọnọ rọye-en. Die yen chọn rọ uko vwo wene iroro yena? Victoria da ta:

“Mi bromaphiyame te omarẹ ẹgbukpe 15 tavwen iroro mi vwori na ki rhi wene. Vwẹ ota ọvo ra tare vwẹ Ọguan Ruvie . . . , ọtota na de djunute Jems 1:23, 24. Ẹkpo rẹ Baibol yena vwẹ Ota rẹ Ọghẹnẹ vwo dje ughegbe rọ sa chọn avwanre uko vwọ mrẹ oma rẹ avwanre kirobo rẹ Jihova mrẹ avwanre. Ki mi roro sẹ ẹro mi vwo nẹ oma mẹ na, ghini shephiyọ vẹ ẹro rẹ Jihova vwo ni vwe. Mi ke gun oma riase ẹsosuọ. Mi niro nẹ Jihova che se vwo ẹguọnọ rẹ ohwo kerẹ omẹvwẹ-ẹ.

“Ẹdẹ ibro vwọ wan nu, mi de se ẹkpo rẹ Baibol ọvo ro wene akpeyeren mẹ. Ẹkpo rẹ Baibol na yen Aizaya 1:18, asan rẹ Jihova da tanẹ: ‘Mọ vwo ọke na re avwanre jẹn iroro kugbe. . . . Ọ da dianẹ imwemwu wẹn họhọ isene, e cha họhọ ẹton rẹ ogegede.’ Kọ ghwa họhọ nẹ Jihova ta kẹ vwẹ nẹ: ‘Vicky yanrhe, rere avwanre jiroro kugbe. Mi vughe uwe, Me riẹn imwemwu wẹn, Me riẹn obo rehẹ ubiudu wẹn, dedena mi vwo ẹguọnọ wẹn.’

“Me sa vwerhẹn ason yena-a. Mi ji vwo ẹwẹn ivivẹ kpahen ẹguọnọ rẹ Jihova, ẹkẹvuọvo ki mi roro kpahen izobo ọtanhirhe rẹ Jesu. Siẹvuọvo na, mi de rhi noso nẹ odirin rẹ Jihova vwo kpahen ovwẹ vwẹ ikpe nana eje na, ọyen odjephia rẹ ẹguọnọ rọyen. Dedena, kọ ghwa họhọ nẹ me vuẹ nẹ: ‘Ẹguọnọ wẹn gan te-e. Izobo rẹ Ọmọ wẹn na che se rhurhu imwemwu mẹ-ẹ.’ Kerẹ asan ra da mrẹ nẹ mi mu otanhirhe na don rhivwin bru Jihova ra. Ẹkẹvuọvo, me vwọ nabọ roro kpahen erere rẹ ọtanhirhe na, me da rhe mrẹvughe nẹ Jihova vwo ẹguọnọ mẹ.”