Oborẹ Ọghẹnẹ Vwọ kẹ Avwanre Uchebro

Ọyinkọn Pọl dje Jihovaa kerẹ “Ọghẹnẹ rẹ uchebro, ro bru avwanre uche vwẹ evun rẹ ukpokpogho ejobi.” (2 Kọrẹnt 1:3, 4) Ọtiọyena, Baibol na kẹ avwanre imuẹro nẹ Ọghẹnẹ sa vwẹ ukẹcha kẹ kohwo kohwo, o vwo oborẹ ebẹnbẹn na rho te-e, Ọsẹ avwanre se bru avwanre uche.

Vwọrẹ uyota, o vwo obo re che ru a ke sa mrẹ uchebro rẹ Ọghẹnẹ. Kerẹ udje, mavọ yen idọktọ sa vwọ chọn avwanre uko ọ da dianẹ avwanre yanran ra mrẹ-ẹ? Baibol na da kẹ avwanre edurhie nana: “Si kẹrẹ Ọghẹnẹ, rere o si kẹre owẹ.”—Jems 4:8.

Diesorọ o vwo mu avwanre ẹro nẹ Ọghẹnẹ che sikẹrẹ avwanre? Ẹsosuọ, kidie ọ vuẹ avwanre abọ buebun nẹ ọ guọnọ chọn avwanre uko. (Ni ekpeti rọhẹ aruọbe 4.) Ọrivẹ, avwanre vwo imuẹro nẹ ihwo herọ ri ghini yerin dẹn vwẹ ọke awanre vẹ ọke avwanre nana rẹ Ọghẹnẹ vwẹ uchebro kẹ.

Kerẹ ihwo buebun nonẹna re yare ukẹcha rẹ Ọghẹnẹ, Ovie Devid rhiẹromrẹ ebẹnbẹn buebun. Ọ da rẹ Jihova: “Nyo urhuru rẹ oyare mẹ.” Ọghẹnẹ kpahen kẹ? E. Devid da rhoma ta: Ọ “cha vwẹ uko, udu mẹ kọ ghọghọ.”—Une Rẹ Ejiro 28:2, 7.

JESU BRU IHWO REHẸ ẸDIA RẸ UVWERI UCHE

Ọghẹnẹ guọnọre nẹ Jesu vwẹ uchebro vẹ onẹrhẹvwe vwọ kẹ ihwo. Vwọba iruo efa rẹ Ọghẹnẹ vwọ kẹ, Jesu ji vwo iruo rọ vwọ “gba udu ro vwirhiri koko” o mi ji “bru ihwo ri muomahọ uche.” (Aizaya 61:1, 2) Kirobo ra tarọ phiyotọ, Jesu vwo ọdavwẹ rẹ “ihwo rẹ owian kugbe oghwa bẹn.”—Matiu 11:28-30.

Jesu kẹ ihwo onẹrhẹvwe womarẹ eta rẹ aghwanre, uruemu esiri ro dje kẹ ayen, tobọ vwẹ ẹdia evo, o ji sivwin ega rayen. Ẹdẹ ọvo, ọhọnvwoti ọvo da rẹ Jesu: “Wọ da rhọvwe wo se ru vwe fon.” Jesu de gbe arodọnvwẹ kẹ, ọ da ta: “Mẹ rhọvwere; gba fon.” (Mak 1:40, 41) Oma rọyen de ghwe kpo.

Nonẹna, Jesu hẹ otọrakpọ na ro vwo bru avwanre uche komobọ-ọ. Ẹkẹvuọvo, Ọsẹ rọyen Jihova, rọ dia “Ọghẹnẹ rẹ uchebro” na, je vwẹ ukẹcha kẹ ihwo rehẹ ẹdia rẹ ebẹnbẹn. (2 Kọrẹnt 1:3) E jẹ a fuẹrẹn idjerhe ẹne rẹ Ọghẹnẹ vwo bru ihwo uche nonẹna.

• Baibol na. “Kemu kemu re siri phihọ otọ rhabae rhe, e si ayen phihọ otọ kẹ eyono rẹ avwanre, rere vwẹ erhiori kugbe uchebro ro nẹ ẹbe ọfuanfon na rhe avwanre se vwo iphiẹrohọ.”—Rom 15:4.

• Ẹwẹn Ọfuanfon rẹ Ọghẹnẹ. Jesu vwo ghwu nu, ukoko rẹ Inenikristi da rhe ro ẹdia rẹ ayen da guọnọ uchebro. Baibol na djerephia nẹ Ọghẹnẹ kẹ ayen uchebro na womarẹ ẹwẹn ọfuanfon rọyen. (Iruo Rẹ Iyinkọn Na 9:31) Ẹwẹn ọfuanfon na, ọyehẹ ẹgba rẹ Ọghẹnẹ. Ọ sa reyọ vwo bru kohwo kohwo uche otoro ebẹnbẹn na-a.

• Ẹrhovwo. Baibol na vuẹ avwanre nẹ, “Wa ro ẹnwan rẹ emuọvo-o.” Ukperẹ ọtiọyen, “ta ọdavwẹ wẹn kẹ Ọghẹnẹ. Ufuoma rẹ Ọghẹnẹ rọ nọ ẹruọ ejobi, kọ yọnrọn udu vẹ iroro rẹ ovwan vwi Kristi Jesu.”—Filipae 4:6, 7.

• Iniọvo na sa dia uvi rẹ igbeyan rẹ avwanre, a sa vwẹroso uchebro rayen vwẹ ọke rẹ ebẹnbẹn. Ọyinkọn Pọl djisẹ rẹ igbeyan rọyen kerẹ “ivwiroro” yẹrẹ ihwo ri bru ọyen uche vwẹ ọke rẹ “uvwerhe vẹ ukpokpogho.”—Kọlose 4:11; 1 Tẹsalonaika 3:7.

Jẹ, wo se roro nẹ, enana eje sa ghene wian? E jẹ a fuẹrẹn udje rẹ ihwo ri rhiẹromrẹ ebẹnbẹn re djunute vwẹ ọtonphiyọ rẹ ọbe na. Kerẹ ihwo nana, wọ sa mrẹvughe nẹ Ọghẹnẹ ji ruẹ orugba rẹ uve nana: “Kerẹ ohwo rẹ oni rọye bruche, eriyin Mi bru we uche.”—Aizaya 66:13.