Mavọ Yen Esẹ se Vwo Sikẹrẹ Emeshare Rayen?

“DADI, mavọ wo ru riẹn erọnvwọn buebun?” Ọmọ wẹn nọ wẹ onọ yena jovwore? Vwẹ ẹdia yena, oma cha vwerhen owẹ nẹ ọmọ wẹn brọghọ phiyọ owẹ oma. Ẹkẹvuọvo, obo re cha ma kẹ wẹ omavwerhovwẹn yen ọmọ wẹn da kerhọ rẹ uchebro wẹn ji mrẹ erere norhe.a​—Isẹ 23:​15, 24.

Ẹkẹvuọvo, ọmọ wẹn vwọ ghwanra na, ọma wẹn je vwerhọn enẹna kirobo rọ hepha ọke rọ vwọ hẹ omotete? Gbanẹ o rhe muọghọ kẹ wẹ kirobo ro ruẹ jovwo-o? Mavọ yen wo se vwo sikẹrẹ ọmọ wẹn rọ vwọ ghwanra na? Ẹsosuọ, e ja fuẹrẹn egbabọse evo esẹ hirharokuẹ.

Egbabọse Erha ra Fobọ Mrẹ

1. JẸ UPHẸN ẸMRẸ: Vwẹ ẹkuotọ buebun esẹ yen ma wian owian rẹ igho ra vwọ ghẹrẹ orua na. Ọke buebun na, iruo rayen se mu ayen nẹ uwevwin vwẹ ẹdẹ ibro. Vwẹ asan evo, esẹ vẹ emọ rayen sa ghwọrọ ọke kuegbe-e. Kerẹ udje, ehiahiẹ ọvo re ruru vwẹ France djerephia nẹ vwẹ ọsoso rẹ ẹdẹ na, esẹ sa ghwọrọ ibrẹro ro te 12 vẹ emọ raye-en.

RORO: Bro ọke wo nene ọmọshare wẹn ghwọrọ kuẹgbe? Vwẹ udughwrẹn ọvo yẹrẹ ivẹ rọ cha na, wo se si uche ọke wo vwo nene ọmọ wẹn ta ota phiyotọ kẹdẹ kẹdẹ yẹrẹ ọke wẹ vẹ ọyen vwo ru erọnvwọn efa kugbe. Wọ cha mrẹ nẹ ọke wẹ vẹ ọmọ wẹn ghwọrọ kuẹgbe tumuku-u.

2. JẸ OMAMỌ UDJE ẸVWỌ PHIA: Esẹ evo tare nẹ ọsẹ ro vwiẹ ayen nene ayen ghwọrọ ọke kugbe-ẹ. Jean-Marie rọ dia France da ta: “Mẹ vẹ ọsẹ mẹ sa ta ota kuegbe-e.” Mavọ yen oma ru Jean-Marie? Ọ da ta: “Ọ ghwa ebẹnbẹn evo re me vwẹ ẹwẹn roro-o rhe, kerẹ udje, me mrẹ bẹnbẹn mi vwo nene ọmọ mẹ ta ota kugbe.” Vwẹ ẹdia efa, esẹ evo nabọ vughe ọsẹ rayen, ẹkẹvuọvo, oyerinkugbe hẹ uvwre raye-en. Philippe rọhẹ ẹgbukpe 43 da ta: “Ọsẹ mẹ mrẹrẹ bẹnbẹn ro vwo dje ẹguọnọ kẹ vwẹ. Ọtiọyena, kọ je bẹn kẹ vwẹ mi vwo dje ẹguọnọ kẹ ọmọshare mẹ.”

RORO: Wo rorori nẹ oyerinkugbe rọhẹ uvwre wẹn vẹ ọsẹ wẹn djobọte obo wo nene ọmọ wẹn yerẹn wan? Wo no sua nẹ wọ vwẹrokere orharhe yẹrẹ omamọ rẹ uruemu rẹ ọsẹ wẹn? Vwẹ idjerhe vọ?

3. JẸ OMAMỌ RẸ UCHEBRO ẸMRẸ FIKIRẸ ASAN RA DIA GHWANRE: Vwẹ asan evo ihwo roro nẹ ọ dia obo re ghanre ọsẹ vwọ vwẹ ukẹcha phia vwẹ ẹroevwote rẹ emọ-ọ. Luca ra ghẹrẹ ghwanre vwẹ Europe da ta: “Vwẹ asan me dia ghwanre ihwo no nẹ eya yen vwo owian ra vwọ vwẹrote emọ.” Vwẹ asan efa ihwo roro nẹ owian ro te esẹ yen a vwọ ghwọ ku emọ. Kerẹ udje, George ra ghẹrẹ ghwanre vwẹ ẹkuotọ ri Africa da ta: “Vwẹ ẹkuruemu rẹ asan me dia ghwanre, esẹ nene emọ rayen heha-a, kidie oshọ mu ayen nẹ emọ na rhe che muọghọ kẹ aye-en. Ọtiọyena ke me mrẹ bẹnbẹn mi vwo nene ọmọ mẹ heha.”

RORO: Vwẹ asan wọ dia, ọrhọ yen oghwa ro te ọsẹ? Ayen no nẹ eya ọvo yen vwo oghwa ra vwọ vwẹrote emọ? Esẹ vuẹ emọ rayen nẹ ayen vwo ẹguọnọ rayen gbanẹ ihwo buebun no nẹ ọ dia oborẹ ofori nẹ ọsẹ ru-u?

Wọ da dia ọsẹ ro hirharokuẹ ọvo usun rẹ ebẹnbẹn re djunute na, die yen wo se ru? Roro kpahen iroroẹjẹ nana.

Tuọnphiyọ Ọke rẹ Ọmọshare Wẹn Dahẹ Omotete

Emọ vwẹrokere esẹ vẹ ini rayen vwọ nẹ ọke emọ rhe. Ọtiọyena davwẹngba wẹ vẹ ọmọ wẹn ghwọrọ ọke kugbe rere o se vwo vughe uwe. Mavọ yen wo se vwo ru ọtiọyen? Ọke vọ yen wọ sa vwọ mrẹ uphẹn wẹ vẹ ọmọ wẹn vwọ heha kugbe?

Ọ da dia obo wo se ru, jẹ ọmọ wẹn vwẹ ukẹcha kẹ wẹ. Kerẹ udje, ọke wo de hwerhe utuwevwin yẹrẹ ọke wọ da tọn otọ, vwẹ aghan otete yẹrẹ isaboro otete vwọ kẹ ọmọ wẹn rere ọ chọn wẹ uko. Aphro herọ-ọ, oma cha vwerhọn ro vwo nene uwe wian kugbe je vwẹrokere uwe! Ọ sa nẹrhẹ owian na siotọ; ẹkẹvuọvo, ẹguọnọ rọhẹ uvwre rẹ ovwan cha ganphiyọ wo ji che yono obo ra sa vwọ dia ọgbowian. Vwẹ ọke grongron rọ wanre, Baibol na vwẹ uchebro kẹ esẹ nẹ ayen vẹ emọ rayen wian kugbe rere ayen vwẹ uphẹn yena nene emọ na ta ota ji yono ayen. (Urhi Rivẹ 6:​6-9) Ọnana jẹ uvi rẹ uchebro vwọ kẹ avwanre nonẹna.

Vwọ vrẹ ọyẹna, je rhuẹrẹ ọke phiyọ wẹ vẹ ọmo wẹn vwọ heha. O vwo erọnvwọn efa ra mrẹ vwo nẹ ehẹha cha vwọ vrẹ avwerhen rọyen. Ehiahiẹ re ruru djerephia nẹ ọsẹ de nene emọ rọyen heha kuẹgbe, ọ vwẹ ukẹcha kẹ emọ na vwo fiudugberẹ je guọnọ ruẹ erọnvwọn kpokpọ.

O vwo emu ọfa rọ nẹrhẹ ọ dia obo re ghanre rẹ ọsẹ vẹ ọmọshare rọyen vwọ heha kugbe. Michel Fize rọ dia ohwo ro ruẹ ehiahiẹ da ta: “Vwẹ ọke rẹ eha yen ọmọ sa vwọ nabọ nene ọsẹ rọyen ta ota.” Vwẹ ọke rẹ eha, ọsẹ sa womarẹ ota vẹ uruemu vwo dje ẹguọnọ kẹ ọmọ rọyen. Ọ cha womarẹ ọnana vwo yono ọmọ na obo ro se vwo dje ẹguọnọ kẹ ihwo. André, rọ dia ọsẹ ọvo vwẹ Germany da ta: “Ọke buebun yen mẹ vẹ ọmọshare mẹ vwọ heha kuẹgbe ọke rọ vwọ hẹ omotete. Me gbanọ, ko ji dje ẹguọnọ kẹ vwẹ rhivwin.”

Ọke ọfa rẹ ọse se vwo ru ẹguọnọ rọhẹ uvwre rọyen vẹ ọmọshare rọyen ganphiyọ yen ọke rẹ ayen che vwo sherhẹn. Se ikuegbe kẹ ọkieje, wọ me je kerhọ kẹ siẹrẹ ọ da vuẹ wẹn kpahan aghọghọ rọ mrẹre vwẹ ẹdẹ na vẹ erọnvwọn re nẹrhẹ o muomaphiyọ. Wo de ru ọtiọyen, kẹ wọ cha nẹrhẹ ọ lọhọ kẹ ro vwo nene uwe ta ota ọ vwọ ghwanra na.

Wẹ vẹ Ọmọshare Wẹn ru Erọnvwọn Kugbe Ọkieje

Oma se jẹ imighene evo ẹvwerhọn siẹrẹ ọsẹ rayen da guọnọ nene ayen ta ota. Ọ da dianẹ ọmọshare wẹn ro te emeghene re guọnọ kerhọ kẹ wẹ yẹrẹ kpahenphiyọ ọnọ ru wọ nọrọ-ọ, wo roro nẹ ọ guọnọ ta ota kẹ wẹ kakaka-a. Ọ sa ta ota kẹ wẹ wo de wene obo wọ ta ota kẹ wan.

Jacques rọ dia ọsẹ ọvo vwẹ France, mrẹ bẹnbẹn ọkiọvo ro vwo nene ọmọshare rọyen Jérôme ta ota. Ẹkẹvuọvo, ukperẹ ọ vwọ gba ọmọshare rọyen ta ota, o de ru obo re fẹnẹre​—o nenire fa ibọrọ. Jacques da ta: “Me vẹ ọmọshare mẹ da heha nu kẹ avwanre chidia enu rẹ odi ji rovwoma emerha, vwẹ ọke yena ọmọshare mẹ kọ vuẹ vwẹ obo rehẹ ẹwẹn rọyen. Kidie nẹ mẹ vẹ ọyen ghwọrọ ọke kuẹgbe, ọnana da nẹrhẹ avwanre ihwo ivẹ na rhi vwo uvi rẹ oyerinkugbe.”

Kẹ, ọ da rha dianẹ eha je ọmọ wẹ-ẹn vwo? André nabọ karophiyọ uche rẹ ọke rẹ ọ vẹ ọmọ rọyen ghwọrọ kugbe rẹ ayen vwo nẹ isio vwẹ ason. Ọ da ta: “Avwanre chidia otafe vwẹ ason. Kẹ avwanre vwẹ amwa phopho vẹ uko ri tea vwẹ obọ, nẹ isio na. Avwanre ta ota kpahan ohwo rọ ma isio na, je ta ota kpahan obo ri kpokpo avwanre ẹwẹn vo obo re kẹ avwanre omavwerhovwẹn. Emerha nuro erọnvwọn eje yen avwanre ta ota kpahan.”​—Aizaya 40:​25, 26.

Wo rhe vwo omavwerhovwẹn kpahen erọnvwọn ri je ọmọ wẹ-ẹn vwo? Vwẹ ẹdia yena wo che ru obo ri je ọmọ wẹn. (Filipae 2:4) Ian rọ dia South Africa da ta: “Mi vwo omavwerhovwẹn kpahen ehẹha nọ ọmọshare mẹ Vaughan. Ughe rẹ ẹropleni vẹ igemu vwẹ ikọmputa yen je. Ke me je davwẹngba rere obo ri je na ji vwo je vwe, me reyọ kpo asan rẹ ẹropleni da kparoma ji nene te igemu kugbe. Kidie nẹ avwanre ghwọrọ ọke kuẹgbe vwo ruẹ erọnvwọn re kẹ avwanre omavwerhovwẹn, oshọ rhe muẹ Vaughan rọ vwọ ta ota kẹ vwẹ-ẹ.”

Vwẹ Ukẹcha kẹ Vwọ Vwẹ Ẹro Abavo Vwo ni Oma Rọyen

“Mi ruro Dadi, no!” Ọmọshare wẹn vuẹ wẹn ọtiọyen dẹvure kidie nẹ o yono orọnvwọn kpokpọ? Ọ da dianẹ ọ te emeghene re, o ji se rhievun ta ota kẹ wẹ? Ọkiọvo o rhe se ruo-o. Ẹkẹvuọvo, ofori nẹ ọ riẹn nẹ wo ji vwo ẹguọnọ rọyen ro vwo te omiragua re na.

Jokaphiyọ obo ri Jihova vuẹ ọmọ rọyen ọvo. Jesu ke ton akpeyenre rọyen vwẹ otọrakpọna phiyọ, Ọghẹne de djephia nẹ ọyen vwo ẹguọnọ rọyen, rọ vwọ ta: “Ọnana hẹ ọmọ mẹ ro je vwe, rẹ evun rọye vwerhe ovwẹ.” (Matiu 3:​17; 5:​48) Uyota, ofori nẹ wo vwo yono ọmọ wẹn je ghwọ kuo. (Ẹfesọs 6:4) Ẹkẹvuọvo o ji fo nẹ wọ guọnọ idjerhe wọ vwọ kpẹvwẹ ọmọ wẹn fikirẹ omamọ rẹ ota rọ tare vẹ uruemu ro djephia.

Ọ bẹn vwọ kẹ esẹ evo rẹ ayen vwo jiri emọ rayen ji dje ẹguọnọ kẹ ayen. Ọ sa dianẹ ọsẹ vẹ oni rayen jiri ayen-e ọghwọku ọvo yen aghwọ ku ayen. Ọ da dia orua tiọyen yen a da ghẹrẹ owẹ ghwanre, ofori nẹ wọ davwẹngba vwo jiri ọmọ wẹn. Mavọ yen wo se vwo ru ọtiọyen? Luca, re djunute siẹvure, vẹ ọmọshare rọyen re se Manuel rọhẹ ẹgbukpe 15 wiowian rẹ uwevwin kuẹgbe ọkieje. Lucan da ta: “Ọkiọvo me vuẹ Manuel nẹ ọyen ọvo ka ton iruo na phiyọ nẹ me cha chọn uko siẹrẹ ọ da guọnọ ukẹcha mẹ. Ọke buebun na, ọyen ọvo ruiruo na re. Ọ da nabọ riẹn ru oma kọ muo vwerhan. Ki mi jiro fikirẹ iruo rọ riẹn ru na. Ọ rha riẹn iruo na ru kirobo rọ guọnerọ-ọ, me je vuẹ nẹ egbaẹdavwọn rọyen davwẹro.”

Wọ je sa nẹrhẹ oma vwerhen ọmọ wẹn, siẹrẹ wọ da chọn uko vwo yerin mu ẹkẹn ro bru kẹ oma vwẹ akpeyenre. Ẹkẹvuọvo, ọ da rha dianẹ ọmọ wẹn fobọ yerẹn muẹ ẹkẹn ro bru kẹ oma kiriborẹ wọ guọnerọ-ọ vwo? Yẹrẹ nẹ ẹkẹn ro bro kẹ oma fẹnẹ ọ ru wọ guọnọ kẹ vwo-o? Vwẹ ẹdia yena, wo che wene obo ru wo rhẹro rọyen mie. Jacques, ra ta ota kpahen siẹvure da ta: “Me davwẹngba vwọ chọn ọmọ mẹ uko vwo bru ẹkẹn rọ sa yan mu kẹ oma rọyen. Ẹkẹvuọvo ki mi jẹ oma mẹ riẹn nẹ ọyen ẹkẹn ro bru kẹ oma, ọ ghwa dia ọmẹ-ẹ. Ọtiọyena, ke me karophiyọ oma mẹ nẹ ọyen komobọ yen cha wian kpahen ẹkẹn ro bru kẹ oma na vwẹ ọke ro shephiyọ kẹ.” Wo de muọghọ kẹ orhiẹn ro bruru, wọ me kpẹvwẹ fikirẹ obo rọ riẹn ru ji jiro kẹ nẹ ọ dobọ jẹ-ẹ, ọ da tọ dianẹ ọ riẹn erọnvwọn evo ru-u, womarẹ ọyena ku wọ sa chọn uko vwo yerin mu ẹkẹn ro bru kẹ oma na.

Ọ dia ọkieje yen erọnvwọn che vwo shephiyọ vwẹ uvwre wẹn vẹ ọmọ wẹ-ẹ. Ẹkẹvuọvo, wo da davwẹngba wẹn eje, ọmọ wẹn che vwo ẹguọnọ wẹn ọkieje fikirẹ rẹ ukẹcha vẹ obicha eje rẹ wọ vwọ kẹ.

[Eta rehẹ obotọ na]