6. Iruo Rẹ Aghwoghwo Ro Nene Akpọeje
“Ka cha ta ota rẹ iyẹnrẹ esiri na wan akpọ na ejobi.”—MATIU 24:14.
● Vaiatea dia asan ọvo ro siuvun vwẹ Pacific island rọhẹ Tuamotu rẹ etọ rẹ omokere buebun hepha. Dede nẹ Tuamotu vwo omokere ri te omarẹ 80 re hrabọ nene ekogho rọ rhoro mamọ rẹ omarẹ ihwo 16,000 dia, Iseri ri Jihova ji bru Vaiatea vẹ ihwo re dia omokere na ra. Diesorọ? Kidie nẹ Iseri na guọnọ ghwoghwo iyẹnrẹn esiri rẹ Uvie rẹ Ọghẹnẹ vwọ kẹ ihwo ejobi; otoro asan rẹ ayen dia-a.
DIE YEN IYẸNRẸN NA DJEPHIA? Ovuẹ rẹ Uvie na hrabọ ro akpọneje. Vwẹ ukpe rẹ 2010 ọvo, Iseri ri Jihova ghwọrọ inọke re vrẹ oduduima 1.6 rẹ ayen vwo ghwoghwo iyẹnrẹn esiri na vwẹ ẹkuotọ 236. A da gharọ, kọyen ibrẹro 30 yen Oseri ọvuọvọ ghwọrọ vwẹ iruo rẹ aghwoghwo na kẹdẹ kẹdẹ. Vwẹ ẹgbukpe ihwe re wan re na, ayen teyenre je ghare ẹbe re vwo yono Baibol na re vrẹ oduduima 20.
DIE YEN IHWO TA? Rhanvwe ẹgbukpe uriorin buebun re yen vwo ghwoghwo ovuẹ ri Baibol na re.
OBORẸ AYEN TA NA UYOTA? Uyota, ihwo buebun ghini ghwoghwo orọnvwọn ọvo kpahen ovuẹ ri Baibol na re. Ẹkẹvuọvo, amasan vẹ ọmọke yen ihwo evo ghwọrọ vwo ghwoghwo ovuẹ na. Vwọ fẹnẹ ọyena, Iseri ri Jihova hẹrẹ egbada-ẹdjẹ re iruo aghwoghwo na ro akpọneje re, ọnana nẹrhẹ ovuẹ na te iduduru rẹ ihwo buebun obọ re. Dede nẹ Iseri na hirharokuẹ ẹvwọsuọ egangan ri nẹ obọ rẹ ihwo ri suẹn evo vẹ erharhe rẹ ikoko evo rehẹ akpọ na cha, ayen ji muomaphiyọ iruo aghwoghwo na ghene. a (Mak 13:13) Kpobarophiyọ, a hwosa kẹ Iseri ri Jihova fikirẹ iruo aghwoghwo na-a. Ukperẹ ọtiọyen, ayen vwẹ ọke rayen kpahotọ je reyọ ẹbe rayen vwọ kẹ ihwo ọphẹ. Itetoro ro nẹ otọ rẹ ẹwẹn rhe yen e vwo biẹcha iruo rayen na.
DIE WO RORORI? E ghwoghwo “iyẹnrẹ esiri rẹ uvie na” nene akpọneje re? Orugba rẹ aroẹmrẹ nana se mudiaphiyọ nẹ omamọ rẹ erọnvwọn cha phia vwẹ obaro na?
[Eta rehẹ obotọ na]
a Wọ da guọnọ evuẹ efa, ni ividio erha nana “Faithful Under Trials,” “Purple Triangles,” kugbe “Jehovah’s Witnesses Stand Firm Against Nazi Assault,” rẹ Iseri ri Jihova ruru.
[Ẹkpo rọ teyenphia]
“Ọke rẹ Jihova rhọnvwephiyọ eje, yen avwanre che vwo ghwoghwo iyẹnrẹn esiri rẹ Uvie na vẹ oruru, womarẹ a vwọ reyọ kuphẹn kuphẹn yẹrẹ kidjerhe kidjerhe vwọ vwẹ ovuẹ na vwo te ihwo obọ.”—2010 YEARBOOK OF JEHOVAH’S WITNESSES.