Vwẹ Obo ra Vwọ Tua Vwẹ Ukoko na Vwo Jiri Ọmemama Wẹn
“OHWO ọvo ro yono ẹbe kodo vwẹ ọke awanre re muọghọ kẹ da ta: Wo che se te asan wọ ra siẹrẹ wo rhe vughe asan na-a, ọ da tobọ dianẹ erọnvwọn shephiyọ kẹ wẹ.”
Baibol na djunute udje rẹ ihwo buebun ri bru ẹkẹn kẹ oma, ayen da je yanmuo. Noa wian owian ro te omarẹ ẹgbukpe 50 vwọ “kare okọ ro vwo sivwi evwruwevwi rọye.” Ọmraro Mosis “vwẹ ẹro so osa na.” (Hibru 11:7, 26) Jihova da rha vwẹ iruo kẹ Joshua ro vwo phi ẹkuotọ ri Kenan kparobọ.—Urhi Rivẹ 3:21, 22, 28; Joshua 12:7-24.
Vwẹ ẹgbukpe ujorin rẹsosuọ, ọyinkọn Pọl ji vwo obo rọ tẹnrovi. Ọ riẹnre nẹ Jesu tare nẹ a “cha ta ota rẹ iyẹnrẹ esiri na wan akpọ na ejobi.” (Matiu 24:14) Jesu vuẹ Pọl nẹ ọ vuẹ ihwo rẹ ẹgborho na kpahen ọyen, ọtiọyena, Pọl da vwẹ ukoko buebun vwo mu vwẹ asan sansan.—Iru 9:15; Kọlose 1:23.
Ọkieje yen idibo ri Jihova vwo brọghọ phiyọ Jihova oma, womarẹ ẹkẹn rẹ ayen bru kẹ oma je yanmu. Mavọ yen avwanre se vwo vwo obo ra vwọ tua vwẹ ukoko na nonẹna? Ẹkẹn vọ yen avwanre se bru kẹ oma, kẹ, die yen owọẹjẹ ra sa jẹ vwọ yanmu ayen?
Mavọ yen avwanre se vwo bru omamọ rẹ ẹkẹn kẹ oma?
Ihwo se bru ẹkẹn sansan re fẹnẹre kẹ oma. Ẹkẹvuọvo, ẹkẹn rẹ ihwo re ga Jihova brẹ kẹ oma fẹnẹ ọ rẹ ihwo re ga-a. Vwọ kẹ ihwo buebun vwẹ akpọ na, obo re ma ghanre kẹ ayen rẹ ayen vwọ tua yen efe kugbe otitivwe. Ofori nẹ ọnana dia oborẹ avwanre vwọ tua-a. Avwanre brọghọ phiyọ Jihova oma siẹrẹ a da vwọ tua erọnvwọn re cha chọn avwanre uko vwọ ga. (Matiu 6:33) Ẹguọnọ rẹ avwanre vwo kpahen Jihova vẹ ihwo efa yen che mu avwanre vwo ru ọtiọyen.—Matiu 22:37-39; 1 Timoti 4:7.
Avwanre se bru ẹkẹn ra vwọ hẹre ẹga ra vwọ kẹ Jihova phiyọ yẹrẹ ru yovwinphiyọ vwẹ iwan ra guọnọ mie Inenikristi. Ẹkẹvuọvo, e jẹ ọ dianẹ ẹguọnọ re vwo kpahen Jihova vẹ ihwo efa yen che muẹ avwanre vwo ru ọtiọyen. Dedena, ọ sa bẹn ọkiọvo re vwo yerin muo. Kẹ, die yen sa chọn avwanre uko vwo yerin mu ẹkẹn re bru kẹ oma?
A Guọnọ Owenvwe Ọgangan A sa Vwọ Yanmu Ẹkẹn re Bru kẹ Oma
Roro kpahen oborẹ Jihova ma akpọ na wan. Jihova ghare iruo rẹ emama rọyen na phiyọ uvwre rẹ ẹdẹ esan. (Jẹnẹsis 1:5, 8, 13, 19, 23, 31) Vwẹ ọtonphiyọ rẹ ẹdẹ ọvuọvo rẹ emama rọyen na, ọ riẹn obo ro vwo vwẹ ẹwẹn ro che ru vwẹ ẹdẹ yena, o de ghini ru ọtiọyen. (Ẹvwọphia 4:11) Job da ta: Obo ri je Jihova “ọye o ruẹ.” (Job 23:13) O muẹro nẹ oma vwerhen Jihova mamọ rọ vwọ “mrẹ emu kemu rọ mare” je tanẹ “oyovwiri gangan.”—Jẹnẹsis 1:31.
A da guọnọ yanmu ẹkẹn re bru kẹ oma, ofori nẹ e vwo owenvwe ọgangan ra vwọ yanmu ayen. Die yen cha chọn avwanre uko vwo vwo owenvwe ọtiọyena? Ọke rẹ akpọ na vwọ dia reghe reghe diodi, Jihova riẹnre nẹ o che vwo erhuvwu vwẹ obaro obọ. A da vwẹrokere Jihova vwo roro kpahen obo ri che nẹ obuko rẹ ẹkẹn re bru kẹ oma rhe vẹ erhuvwu ra cha mrẹ, ke che vwo ẹwẹn re vwo ruo. Roro kpahen ikuegbe ri Tony rọhẹ ẹgbukpe 19. Vwẹ ẹdẹ rẹsosuọ ro vwo kin oghọn ukoko rọhẹ Western Europe, oma da vwerhọn mamọ. Vwo nẹ ọke yena rhe, ọkieje kọye Tony vwọ nọ oma rọyen, ‘Mavọ yen ọ cha vwerhoma te ra vwọ dia je ga vwẹ asan ọtiọyen?’ Kidie nẹ ọkieje yen o vwo roro kpahan obo rọ sa vwọ ga vwẹ etiyin, kọ wian gangan rere o se vwo yerin mu obo ro bru kẹ oma na. Ikpe buebun vwọ wan nu e de durhie nẹ ọ rhe ga vwẹ oghọn ukoko na, oma vwerhenrọ dẹn.
Emuọfa rọ sa chọn avwanre uko vwo yerin mu ẹkẹn re bru kẹ oma yen, a vẹ ihwo ri ru ọtiọyen re vwọ ghwọrọ ọke kuẹgbe. Ọke rẹ Jayson rọhẹ ẹgbukpe 30 asaọkiephana vwọ hẹ emeghene, oma rẹ iruo rẹ aghwoghwo na vwerhọ-ọn. Ẹkẹvuọvo, o vwo wontọ nẹ isikuru nu, ọ da rhe dia ọkobaro ọkieje. Die yen chọn Jayson uko vwo vwo ẹwẹn rọ vwọ dia ọkobaro? Ọ da ta: “Mi nene ihwo re dia ekobaro ta ota je wian kugbe vwẹ iruo rẹ aghwoghwo na, ọnana ghene chọn vwẹ uko mamọ.”
E de si Ẹkẹn re Bru kẹ Oma Phiyotọ, Ọ sa Chọn Avwanre Uko Vwọ Yanmu Ayen
E se vwo ẹruọ rẹ obo re roro siẹrẹ a da ta ayen phia. Solomọn tare vwẹ Baibol na nẹ eta rẹ aghwanre sa chọn avwanre uko vwo bru omamọ rẹ erhiẹn vwẹ akpeyeren. (Aghwoghwo 12:11) E de si iroro tiọyena phiyotọ, ke se roro kpahan ayen ọkieje. Ọnana yen sorọ rẹ Jihova vwọ vuẹ ivie rẹ Izrẹl nẹ ayen si Urhi na reyọ komobọ. (Urhi Rivẹ 17:18) Ọtiọyena, e se si ẹkẹn re bru kẹ oma phiyotọ vẹ obo ra sa vwọ yanmu ayen. E ji se si ebẹnbẹn evo re se hirharoku phiyotọ vẹ obo re se vwo phi ayen kparobọ. Vwọba, e de ru ehiahiẹ kpahen obo ro fori nẹ a riẹn, je nokpẹn rẹ ukẹcha mie ihwo efa, ọ je cha chọn avwanre uko vwọ yanmu ẹkẹn re bru kẹ oma.
Ọke ri Geoffrey rọ ga kerẹ ọkobaro oghẹresan ọke grongron re vwẹ ẹkuotọ ri Asia ọvo vwo bru ẹkẹn kẹ oma, ọ da nẹrhẹ ẹwẹn rọyen te otọ. Erọnvwọn gan kẹ mamọ ọke rẹ aye rọyen vwo ghwu. Ọmọke vwọ wan nu, Geoffrey de brorhiẹn ro vwo bru ẹkẹn kẹ oma rọ cha nẹrhẹ o muomaphiyọ iruo rẹ aghwoghwo na. O vwo si obo rọ guọnọ ru phiyọ ọbe je nẹrhovwo kpahọn nu, o de brorhiẹn rọ vwọ vwẹ uyono ri Baibol vwo mu kẹ ihwo kpokpọ erha vwẹ emeranvwe yena. Kẹdẹ kẹdẹ kọyen ọ vwọ fuẹrẹn asan ro ru te, ọ me rha fuẹrẹn ẹyan obaro rọyen vwẹ ẹdẹ ihwihwe. Ọ sa yanmu ẹkẹn ro bru kẹ oma na? E. Oma vwerhen Geoffrey dẹn nẹ o se vwo ihwo ẹne kpokpọ rọ vwẹ Baibol na yono.
Bru Ẹkẹn Itete kẹ Oma re Cha Chọn Wẹ Uko Vwọ Yanmu Iride
Ẹkẹn evo re bru kẹ oma sa họhọ obo ra cha sa yanmu-u. Tony, re djunute siẹvure na guọnọ ga vwẹ oghọn ukoko ri Iseri ri Jihova, ẹkẹvuọvo, o niro nẹ ọ cha sa phia-a. O roro ọtiọyen kidie o vwo ewene buebun ro che ru vwẹ akpeyeren rọyen, jẹ ọ je rhe vwomakpahotọ kẹ Ọghẹnẹ-ẹ. Ẹkẹvuọvo Tony de brorhiẹn ro vwo ru ewene ji bromaphiyame. O vwo bromaphiyame nu, ọ da ga kerẹ ọkobaro ubrọke je dia ọkobaro ọkieje ọke vwọ yanran na. O si ẹdẹ rọ cha vwọ yanmu ayen ọvuọvo phiyọ ikalẹnda rọyen. Ọ vwọ ga kerẹ ọkobaro ọkieje te ọkievo re, o de rhi vwo vwẹ ẹwẹn nẹ ọyen sa ga vwẹ oghọn ukoko.
A je sa yanmu ẹkẹn ride re bru kẹ oma siẹrẹ a da tuọnphiyọ vẹ ẹkẹn itete. Avwanre da yanmu ẹkẹn itete re bru kẹ oma je mrẹ obo ra wian te ra sa vwọ yanmu ayen, ọyena cha nẹrhẹ e vwo owenvwe ra vwọ yanmu ẹkẹn ride. A da je vwẹ ọkieje vwọ fuẹrẹn asan re ru te, o ji che mu avwanre vwọ yanmu obo re bru kẹ oma. Ọ je sa dia ọtiọyen siẹrẹ a da nẹrhovwo rhe Jihova ọkieje kpahen orhiẹn rẹ avwanre bruru na. Ọyinkọn Pọl bru avwanre uche nẹ a “nẹ ẹrhovwo kẹdẹ kẹdẹ.”—1 Tẹsalonaika 5:17.
Wo jẹ Oma Rhọ Wẹ-ẹ, Wian Ọkieje Vwọ Yan mu Ẹkẹn ru wo Bru kẹ Oma
Omamọ rẹ ọrhuẹrẹphiyotọ vẹ owenvwe ọgangan sa chọn avwanre uko, jẹ ọkiọvo, ọ je sa họhọ nẹ a cha sa yanmu obo re bru kẹ oma-a. E se yono vwo nẹ udje rẹ odibo Mak. Ọ guọnọ rhoma nene Pọl kpo oyan rẹ imishọnari rọyen na, ẹkẹvuọvo Pọl rhọnvwe kẹ-ẹ, o muẹro nẹ ọ darọ mamọ. (Iru 15:37-40) Ofori nẹ Mak yono vwo nẹ obo re phiare na rhe rere ọ rhoma rhuẹrẹ obo rọ vwọ tua na phiyọ. Ọtiọyen o ghini ru. Ọke vwọ yanran na, Pọl da ta omamọ rẹ ota kpahen Mak, o ji nene ọyinkọn Pita wian kugbe vwẹ Babilọn. (2 Timoti 4:11; 1 Pita 5:13) Ọ sa dianẹ uphẹn rẹ oghẹresan rọ ma rho ri Mak vwori yen o vwo si kpahen ikuegbe rẹ akpeyeren ri Jesu vẹ iruo rẹ aghwoghwo rọyen.
E ji se hirharoku egbabọse evo ra vwọ davwẹngba vwọ yanmuẹ ẹkẹn re bru kẹ oma na. Ukperẹ ofu vwo dje avwanre, ofori nẹ a rhoma fuẹrẹn ẹkẹn re bru kẹ oma, rhuẹrẹphiyọ yẹrẹ wene. Ebẹnbẹn da vwomaphia, o ji fo nẹ a davwẹngba vwọ yanmu ẹkẹn re bru kẹ oma. Ovie Solomọn da ta: “Phi iruo wẹn ejobi phihọ obọ rẹ Ọrovwohwo na, obo wo rori ejobi kọ mudia ga.”—Isẹ 16:3.
Ọkievo, erọnvwọn evo sa nẹrhẹ ọ bẹn ra vwọ yanmu ẹkẹn re bru kẹ oma. Kerẹ udje, jẹ omakpokpọ evwo yẹrẹ oghwa rẹ orua sa nẹrhẹ ọ bẹn ra vwọ yanmu ẹkẹn re bru kẹ oma. Ẹkẹvuọvo e jẹ avwanre karophiyọ nẹ obo re ma ghanre ro fori nẹ a tẹnrovi yen arhọ ri bẹdẹ—vwẹ odjuvwu yẹrẹ vwẹ Iparadaisi vwẹ otọrakpọ na. (Luk 23:43; Fiilipae 3:13, 14) Mavọ yen e se vwo vwo? Ọyinkọn Jọn de si: “Ohwo ro ru ọhọre rẹ Ọghẹnẹ kọ dia bẹdẹ.” (1 Jọn 2:17) Ẹdia ru wọ hepha rha vwẹ uphẹn kẹ wẹ vwọ yanmu ẹkẹn ọvo wo bru kẹ oma-a, wọ je sa “djẹ oshọ rẹ Ọghẹnẹ, rere wọ yọnrọn irhi rọye.” (Aghwoghwo 12:13) Obo ra vwọ tua vwẹ ukoko na chọn avwanre uko vwọ tẹnroviẹ eruo rẹ ọhọre rẹ Ọghẹne. Ọtiọyena, e gbe jẹ a vwẹ ayen vwo jiri ọmemama rẹ avwanre.
[Ekpeti]
Ẹkẹn re se Bru kẹ Oma
○ Isese ri Baibol ri kẹdẹ kẹdẹ
○ E vwo se Uwevwin Orhẹrẹ re phiẹ phiyọ ada vẹ Awake! na
○ E vwo ruẹ ẹrhovwo avwanre yovwẹnphiyọ
○ E vwo dje omamọ ẹwẹn ọfuanfon na phia
○ A vwọ yanphiaro vwọ kẹ iruo rẹ ẹga efa
○ E vwo ruẹ ona rẹ eyono vẹ aghwoghwo rẹ avwanre yovwẹnphiyọ
○ E vwo yono ona rẹ aghwoghwo rẹ ifonu, ọ ri kpregede, kugbe asan ra da chueki