Odjekẹ vwọ kẹ Uyono rẹ Akpeyeren Avwanre vẹ Iruo Ruvie Na

Iyovwinreta

1. Odjekẹ nana cha vwẹ ukẹcha kẹ ihwo eje ri vwẹ ẹbẹre vwẹ Uyono rẹ Akpeyeren Avwanre vẹ Iruo Ruvie na. E jẹ ihwo ri vwẹ ẹbẹre fuẹrẹn odjekẹ ro shekpahen ẹbẹre rayen kirobo ra vwerọphia vwevunrẹ Ọbe Uyono Rẹ Akpeyeren Avwanre vẹ Iruo Ruvie Na kugbe odjekẹ nana tavwen ayen ki muegbe ẹbẹre rayen. Uphẹn rhiephiyọ vwọ kẹ ighwoghwota ejobi rẹ ayen vwo vwobọ vwẹ ẹbẹre rẹ Isese ri Baibol kugbe Muomaphiyọ Iruo Aghwoghwo Na. Ihwo efa re nabọ cha uyono, re rhọnvwephiyọ iyono ri Baibol na, ri ji yeren akpọ nene oborẹ ayen yonori ji se vwobọ vwọ. E jẹ Oniruo rẹ Uyono rẹ Akpeyeren Avwanre vẹ Iruo Ruvie Na nene kohwo kohwo rọ je dia oghwoghwota-a rọ guọnọ vwobọ vwẹ ẹbẹre isese ri Baibol vẹ muomaphiyọ iruo aghwoghwo fuẹrẹn iwan ra guọnọre rere ọ vwọ riẹn sẹ o muwan. E je ru echidiotọ na vwẹ irharo ohwo rọ vwẹ Baibol na yono (yẹrẹ irharo ọsẹ yẹrẹ oni rọ dia oniọvo). Iwan vuọvo na yen a je guọnọ mie ohwo rọ guọnọ dia oghwoghwota ro ji bromaphiyame-e.—od uyowin. 8 ẹko. 8.

ETA RẸ ỌTONPHIYỌ

2. Ibrẹro ọvo. Kudughwrẹn kudughwrẹn, a da so une je nẹrhovwo ra vwọ ton uyono na phiyọ nu, ochidiagbara rẹ Uyono na cha kpare urhurusivwe rẹ iniọvo na kpahen obo re che yono. Ochidiagbara na me tẹnrovi ẹkpo ri che fierere vwọ kẹ inọvo na.

EFE RỌHẸ OTA RẸ ỌGHẸNẸ

3. Ota: Ibrẹro ihwe. Uyovwinrota na vẹ ẹkpo ivẹ yẹrẹ erha hẹ evunrẹ Ọbe Uyono rẹ Akpeyeren vẹ Iruo Ruvie Na. Ọkpako yẹrẹ odibo rowian ro muwan yen cha ta ota nana. Siẹrẹ a da cha ton ọbe ri Baibol kpokpọ phiyọ vwẹ isese ri Baibol rẹ kudughwrẹn kudughwrẹn, e che hworo ividio vwọ tuọnphiyọ. Ọtota na se djunute oborẹ ividio na vẹ uyovwinrota na shephiyọ ohwohwo wan. Ẹkẹvuọvo, e jẹ ọtota na vwo imuẹro nẹ ọ ta ota kpahen ẹkpo re djunute vwẹ ọbe uyono na. Ọ je reyọ ihoho rehẹ ọbe rẹ uyono na vwo dje ẹkpo re ma ghanre fiotọ. O ji se djunute ẹkpo efa ra rionbọra ọ da dianẹ i che toroba odjefiotọ rẹ ẹkpo rehẹ ota na.

4. Efe Eghanghanre: Ibrẹro ihwe. Enọ vẹ ẹkpahọnphiyọ, o vwo ọtonphiyọ yẹrẹ okuphiyọ-ọ. Ọkpako yẹrẹ odibo rowian ro muwan yen cha vwẹrote ẹbẹre nana. Ọtota na nọ otu na enọ na eje. Vwọba, o se brorhiẹn sẹ e se ẹkpo ri Baibol ra rionbọra na. Aroẹbrẹ 30 kpotọ yen ihwo vwọ kpahenphiyọ.

5. Isese ri Baibol: Ibrẹro ẹne. Oniọvo ọshare yen a cha ghare ẹbẹre nana kẹ. Oniọvo na se asan ri Baibol na ọvo, ọ ta ota vuọvo vwẹ ọtonphiyọ yẹrẹ okuphiyotọ rẹ isese na-a. Ofori nẹ ochidiagbara rẹ uyono na vwẹ ukẹcha kẹ iniọvo na rere ayen se vwo se gbagba, ghwraghwraghwra, vẹ ẹruọ kugbe upho ro shephiyọ, ayen dunuji vwẹ asan ro fori, ji se vwo nene obo rẹ ayen ta ota wan rere ọhọ rẹ asan na vwọ teyenphia. Ọ vwọ dianẹ ẹkpo rẹ Isese ri Baibol evo pha krẹkrẹ, jẹ efa pha grongron na, kofori nẹ Oniruo rẹ Uyono rẹ Akpeyeren vẹ Iruo Uvie Na vwo oniso rẹ asan rẹ ẹgba rẹ iniovo rọ cha ghare isese na vwọ kẹ muru.

MUOMAPHIYỌ IRUO AGHWOGHWO NA

6. Ibrẹro ihwiorin. E ru ẹbẹre nana rere ihwo ejobi vwo vwo uphẹn rẹ ayen vwo yono ona re vwo ghwoghwota, ji ru yovwinphiyọ vwẹ aghwoghwo kugbe eyono rẹ ihwo. Ọkiọvo, a sa ghare ẹbẹre nana kẹ ekpako. E jẹ iniọvo ri vwẹ isese ri Baibol vẹ i ri vwẹ ẹbẹre vwẹ Muomaphiyọ Iruo Aghwoghwo na wian kpahen ẹkpo ro nẹ ibroshọ rẹ Eyono yẹrẹ Vwo Ẹguọnọ Rẹ Ihwo re si phiyọ ibrakẹti kẹrẹ ota rayen vwevunrẹ Ọbe Uyono Akpeyeren Avwanre vẹ Iruo Uvie Na. Ọkiọvo, ẹbẹre na se vwẹ ọtaẹtakuẹgbe. Ọkpako yẹrẹ odibo rowian ro muwan yen che ru ẹbẹre nana.—Ni ẹkorota 15 ro shekpahen obo re ru otaẹtakuẹgbe.

7. Ton Otaẹtakuẹgbe Phiyọ: A sa ghare ẹbẹre nana kẹ oniọvo rẹ ọshare yẹrẹ aye. A da ghare ẹbẹre nana kẹ oniọvo ọshare, ọshare yen cha vwẹ ukẹcha kẹ yẹrẹ ohwo rẹ orua rọyen, ọtiọyen ọ je hepha vwọ kẹ aye. Ayen se chidia yẹrẹ mudia ruo.—Vwọ ke evuẹ efa kpahen uyovwinrota rẹ obo ayen cha ta vẹ obo rẹ ayen che ruo wan. ni ẹkoreta 12 vẹ 13.

8. Ra Vwọ Yanmuẹ Ihwo re Ghwoghwota Kẹ: A sa ghare ẹbẹre nana kẹ oniọvo rẹ ọshare yẹrẹ aye. A da gharẹ ẹbẹre nana kẹ oniọvo ọshare, ọshare yen cha vwẹ ukẹcha kẹ, ọtiọyen ọ je hepha vwọ kẹ aye (km-E 5/97 aruọbe. 2) Ayen se chidia yẹrẹ mudia ruo. Ohwo ro vwo ota na mi ru udje obo rọ cha ta siẹrẹ o de rhivwin bru ohwo ọ vẹ ọyen gba ta ota jovwo ra.—Vwọ ke evuẹ efa kpahen uyovwinrota rẹ obo ayen cha ta vẹ obo rẹ ayen che ruo wan, ni ẹkoreta 12 vẹ 13.

9. Re Vwo Gbe Idibo: A sa ghare ẹbẹre nana kẹ oniọvo rẹ ọshare yẹrẹ aye. A da ghare ẹbẹre nana kẹ oniọvo ọshare, ọshare yen cha vwẹ ukẹcha kẹ, ọtiọyen ọ je hepha vwọ kẹ aye. (km-E 5/97 aruọbe. 2) Ayen se chidia yẹrẹ mudia ruo. Siẹrẹ e de ruẹ udje rẹ uyono ri Baibol rọ tonphiyọ jovwo re a ghwa guọnọ eta rẹ ọtonphiyọ yẹrẹ okuphiyọ-ọ jokpanẹ ọyen ẹkpo ohwo na wian kpahan. Ọ dia urhi nẹ e se ẹkoreta na eje rehẹ asan re yono na phia-a, ọ da tobọ dianẹ e se se ayen eje.

10. Dje Oborẹ Wo se Gbuyota Fiotọ: Ọ da dia ota, e jẹ oniọvo ọshare ruo. Ọ da dia udje, oniọvo ọshare yẹrẹ aye se ruo. A da ghare ẹbẹre nana kẹ oniọvo ọshare, ọshare yen cha vwẹ ukẹcha kẹ yẹrẹ ohwo rẹ orua rọyen, ọtiọyen ọ je hepha vwọ kẹ aye. E jẹ oniọvo na reyẹ ona vwọ nabọ dje ẹkpahọnphiyọ onọ na fiotọ womarẹ evuẹ ra rionbọra na. Oniọvo na se brorhiẹn ro vwo djunute ọbe ra rionbọra na vwẹ ẹbẹre nana.

11. Ota: Oniọvo ọshare yen a cha ghare ẹbẹre nana kẹ, ọ me je ta kẹ otu na. A da reyọ ota na nẹ ẹkpo ọvo vwẹ apẹndis A ri ibroshọ rẹ Vwo Ẹguọnọ Rẹ Ihwo, e jẹ oniọvo na kanrunumu obo a sa vwọ reyọ awọreta ri Baibol na vwo ruiruo vwẹ aghwoghwo na. Kerẹ udje, o se dje ọke ro me fo ra vwọ reyọ owọ ri Baibol ọvo vwo ruiruo, ji dje obo ro mudiaphiyọ kugbe obo re se vwo nene ohwo ta ota kpahọn. A da reyọ ota vwo nẹ ẹkpo ọvo rehẹ ọvo usun rẹ uyono rẹ ibroshọ rẹ Vwo Ẹguọnọ Rẹ Ihwo na, e jẹ oniọvo na tẹnrovi obo ra sa vwọ vwẹ ẹkpo na vwo ruiruo vwẹ aghwoghwo na. Ọ sa kanrunumu udje rọhẹ ẹkpo 1 rẹ uyono na yẹrẹ owọ ri Baibol ọfa rọhẹ uyono na, o de shephiyọ.

12. Uyovwinrota Na: Evuẹ rehẹ ẹkorota nana vẹ ọ rọ vwọ kpahọn shekpahen ẹbẹre rẹ “A Vwọ Ton Otaẹtakuẹgbe Phiyọ” vẹ “A Vwọ Yanmuẹ Ohwo Na”. Jokpanẹ e djunute, obo oniọvo na ru yen ọ vwọ vuẹ ohwo na kpahen uyota ri Baibol ọvo ro shephiyọ vẹ ẹdia rọyen ji ru ọrhuẹrẹphiyotọ ayen vwọ ta ota kpobaro phiyọ. E jẹ oniọvo na sanẹ uyovwinrota ro fo aruọke ro ji shephiyọ vwẹ ekogho na. Ọ da guọnọ o se brorhiẹn rọ vwọ vwẹ ọbe ọvo yẹrẹ hworo ividio ọvo rehẹ Ekpeti Uyono Avwanre vwọ kẹ. Ukperẹ udje na vwọ dia ọ re se ku afọnrhe, e jẹ oniọvo na ru udje obọdẹn rẹ otaẹtakuẹgbe, kerẹ e vwo dje ọdavwẹ romobọ phia ji nẹ ẹdia ohwo na hepha vwo nene ta ota.

13. Obo re Ruo Wan: E jẹ oniọvo na reyọ ona obo re ruẹ aghwoghwo wan vwẹ ekogho na vwo ru udje na. Kerẹ udje:

(1) Nẹ Uwevwin kpo Uwevwin: Ona nana churobọ si e vwo ghwoghwo nẹ anurhoro kpo anurhoro—sẹ a yanran komobọ, womarẹ ifonu, yẹrẹ ileta—kugbe a vwọ yanmu ohwo re nene ta ota kugbe jovwo vwẹ aghwoghwo rẹ nẹ uwevwin kpo uwevwin.
(2) Aghwoghwo ri Kpregede: Ọnana ona ra vwọ reyọ uphẹn ro rhiephiyọ vwo wene ikuegbe ghevweghe vwo kpo ota eghwoghwo. O churobọ si e vwo nene ihwo rehẹ asan re de ruiruo, isikuru, asan ra dia, imoto, yẹrẹ asan efa ta ota kpahen ẹkpo ri Baibol re se ri.
(3) Aghwoghwo Azagba: Ọnana churobọ si imikpekpa re dje ẹbe phiyọ, re vwo ghwoghwota kẹ ihwo vwẹ asan ra da chueki, aghwoghwo rẹ urhuvwu, aghwoghwo vwẹ asan ra da heha, asan rẹ ihwo mu imoto rayen phiyọ, yẹrẹ asan efa rẹ ihwo hepha.

14. A Vwọ Vwẹ Ividio vẹ Ẹbe Vwo Ruiruo: Vwo nene ẹdia na, oniọvo na se brorhiẹn rọ vwọ vwẹ ividio yẹrẹ ẹbe vwo ruiruo. Ota na de vwẹ ividio yẹrẹ oniọvo na kọ guọnọ vwẹ ividio vwo ruiruo e jẹ o dje ividio na ko ohwo na je ta ota kpahọn ẹkẹvuọvo o hworo-o.

AKPEYEREN RẸ INENIKRISTI

15. A da so une nu, ibrẹro 15 rọ vwọ kpahọn, vwo ẹbẹre ọvo yẹrẹ ivẹ ra rhuẹrẹphiyọ rere ọ vwẹ ukẹcha kẹ iniọvo na vwọ vwẹ Ota rẹ Ọghẹnẹ vwo ruiruo vwẹ akpeyeren rayen. Jokpanẹ ke djerephia, ọ rha dia ọtiọye-en, a sa ghare ẹbẹre nana kẹ ekpako yẹrẹ idibo rowian ri muwan, jokpa rẹ ẹbẹre rẹ ọdavwẹ rukoko rẹ ekpako ọvo cha vwọphia. Ọ da dia otaẹtakuẹgbe, ọtota na sa nọ enọ efa vwọba enọ re vwomaphia vwẹ ẹbẹre nana. E jẹ ota rẹ ọtonphiyọ rọyen dia kprẹn rere o se vwo dje ẹkpo na phia ji vwẹ uphẹn kẹ otu na vwo toroba otaẹtakuẹgbe na. Ota na de vwo ẹriẹnmie, o che yovwin ohwo ra riẹnmie na vwọ dia enu umukpe da vwẹ ẹkpahọnphiyọ rọyen phia ukperẹ asan ro chidia, ọ da dia obo ro se ru.

16. Uyono ri Baibol Rukoko: Ibrẹro ọgban. Ọkpako ro muwan yen a cha ghare ẹbẹre nana kẹ. (Odibo rowian ro muwan sa vwẹ ẹbẹre nana vwọphia ọ da dianẹ ekpako na ghwe bu-un.) Ekpako na yen che brorhiẹn rẹ ohwo ro muwan rọ vwọ reyọ Uyono ri Baibol Rukoko na vwọphia. Ihwo ra rhọnvwe kẹ davwẹngba rẹ ayen vwọ vwẹ uyono na phia vwẹ idjerhe ro fiotọ rere ayen sa vwọ yan mu ọke, ayen kanrunumu ẹkpo ri Baibol ra guọnọre, je chọn iniọvo na uko vwọ riẹn oborẹ ayen sa vwẹ obo re yonori na vwo ruiruo. Ihwo ra rhọnvwenphiyọ nẹ i muwan re vwọ vwẹ ẹbẹre nana phia cha riẹn ru siẹrẹ ayen da fuẹrẹn odjekẹ ro shekpahen obo re ruẹ ẹbẹre rẹ enọ vẹ ẹkpahọnphiyọ wan. (w23.04 aruọbe. 24, ekpeti) A da nabọ fuẹrẹn ẹkpo re che yono vwẹ udughwrẹn na nu, o rhe fo ra vwọ rhoma ghwọrọ ọke vwẹ uyono na-a. Ọ da dia obo re se ru, ofori e rhe wene iniọvo re cha vwẹrote uyono na vẹ iniọvo ri che se kẹ ayen kudughwrẹn kudughwrẹn. Ochidiagbara rẹ Uyono na da vwẹ odjekẹ phia nẹ e ru uyono na krẹn, oniọvo rọ vwẹrote ẹbẹre yena yen che brorhiẹn rẹ obo ro che ruo wan. Ọ sa tanẹ e se ẹkoreta evo-o.

ETA RẸ OKUPHIYỌ

17. Ibrẹro erha. Ochidiagbara rẹ Uyono na che ru ọdjẹkoko rẹ ẹkpo kiriguo rẹ uyono na.Ọke da herọ o se durhie otu na vwọ ta eta kpahen ẹkpo re ghanre vwọ kẹ ayen. O ji djunute obo re che yono vwẹ udughwrẹn rọ vwọ kpahọn. O se djunute onọ ọvo ra cha kpahenphiyọ vwẹ uyono rọ cha na. Ọke da herọ, o se se odẹ rẹ ohwo ro vwo Isese ri Baibol vẹ iniọvo ri che vwobọ vwẹ ẹbẹre rẹ Muomaphiyọ Iruo Aghwoghwo Na vwẹ udughwrẹn rọ cha na. Jokpanẹ ke djerephia, ọ rha dia ọtiọye-en, e jẹ ochidiagbara na ru aghwoghwo ri fori, ji se ileta ri fori kẹ ukoko na siẹrẹ o de ruẹ ọdjẹkoko na nu. Aghwoghwo re ruẹ ọkieje, kerẹ i ri shekpahen ọrhuẹrẹphiyotọ rẹ ada kugbe orufon, e ruẹ ayen vwẹ umukpe-e, ukperẹ ọtiọyen, a vwẹ ovuẹ na tamu ophapha rẹ ovuẹ na. Ọ da dianẹ ọke ra rhuẹrẹphiyọ kẹ ọdjẹkoko rẹ ochidiagbara na che te vwo ru aghwoghwo yẹrẹ se ileta-a, e gbe jẹ ọ vuẹ ihwo ri vwo ota vwẹ ẹbẹre rẹ Akpeyeren rẹ Inenikristi nẹ ayen bru eta rayen krẹn rere a sa mrẹ ọke vwo ru ọtiọyen. (Ni ẹkoreta 16 vẹ 19.) A cha vwẹ une vẹ ẹrhovwo vwo ku uyono na phiyọ.

UJIRI VẸ UCHEBRO

18. Ohwo ro vwo isese ri Baibol vẹ i ri vwo ẹbẹre vwẹ muomaphiyọ iruo aghwoghwo na da ta ota ra ghare kẹ ayen nu, ochidiagbara rẹ Uyono na vwo omarẹ ibrẹro ọvo rọ vwọ vwẹ ujiri vẹ uchebro re mu kpahen ẹkpo ra guọnọre nẹ ọ wian kpahen na vwọphia kẹ ohwo ọvuọvo. Ọke ochidiagbara rẹ uyono na de durhie oniọvo ro vwo ota, o che djunute ẹkpo ra guọnọre nẹ ọ wian kpahen na-a. Ẹkẹvuọvo, siẹrẹ oniọvo na da ta ota rọyen nu, ochidiagbara na da je nabọ jiro nu, ọ sa ta ota kpahen ẹkpo rẹ oniọvo na wian kpahen, ji djunute oborẹ oniọvo na ru yovwin te vwẹ ẹkpo yena yẹrẹ ọ ta kpahen oboresorọ rẹ oniọvo na vwọ rhoma wian kpahen ẹkpo yena. Ochidiagbara na je sa ta ota kpahen ẹbẹre ọfa rẹ udje na siẹrẹ o de no nẹ o che fierere kẹ ohwo ro vwo ota na yẹrẹ otu na. Ọ je sa vwẹ uchebro ro fori ro nẹ ibroshọ rẹ Vwo Ẹguọnọ Rẹ Ihwo yẹrẹ Isese vẹ Eyono yẹrẹ ọbe rẹ Ministry School na vwọphia, o mi ji ru ọtiọyen vwẹ ehoho ọke e de ru uyono na nu yẹrẹ vwẹ ọke ọfa, uchebro na mi shekpahen asan ra tare nẹ ọ wian kpahen yẹrẹ ẹbẹre ọfa rẹ ota rọyen na.⁠—⁠Vwọ kẹ evuẹ efa ri shekpahen ẹdia ro te ochidiagbara rẹ Uyono rẹ Akpeyeren vẹ Iruo Ruvie Na kugbe obruche na, ni ẹkoreta 19, 24, vẹ 25.

ỌKE

19. E jẹ eta rẹ iniọvo na yẹrẹ uchebro rẹ ochidiagbara rẹ Uyono na vrẹ ọke ra rhuẹrẹphiyọ na-a. Dede nẹ Ọbe Uyono rẹ Akpeyeren vẹ Iruo Uvie Na djunute ọke rẹ ẹbẹre vuọvo, e de ru ẹbẹre na ejobi nu, o re fo a vwọ reyọ evuẹ efa vwọba-a rere e vwo ru ọke na ejobi re. Siẹrẹ iniọvo evo de ru ọke vrẹ, e jẹ ochidiagbara rẹ Uyono rẹ Akpeyeren vẹ Iruo Ruvie Na yẹrẹ obruche na vwẹ uchebro vwọ kẹ ayen vwẹ ehoho. (Ni ẹkoreta 24 vẹ 25.) E jẹ uyono na eje, te une vẹ erhovwo dia unọke 1 gbe ibrẹro 45.

EKION RẸ ONIRUO RẸ OKINRIARIẸ

20. Siẹrẹ oniruo rẹ okinriariẹ de rhi kin ukoko na, e jẹ e ru uyono na nene obo ra rhuẹrẹphiyọ vwẹ Ọbe Uyono rẹ Akpeyeren vẹ Iruo Ruvie Na, jokpa rẹ ewene nana: A cha vwẹ ota rẹga rẹ ibrẹro 30 rẹ oniruo okinriariẹ cha ta vwo wene Uyono ri Baibol Rukoko rọhẹ ẹbẹre rẹ Akpeyeren rẹ Inenikristi. Ochidiagbara rẹ Uyono na che ru ọdjẹkoko rẹ uyono na vẹ ọ rọ cha na, ru aghwoghwo, ji se ileta ri fori tavwen o ki durhie oniruo rẹ okinriariẹ na. Siẹrẹ oniruo rẹ okinriariẹ na da ta ota rẹga na nu, ọ cha vwẹ une rọ jẹre vwo ku uyono na phiyọ. O se durhie oniọvo ọfa nẹ ọ nẹrhovwo rẹ okuphiyọ. E che ru iklasi ọfa vwẹ ọke rẹ oniruo rẹ okinriariẹ da rhe-e. Ẹko rọ jẹ ephẹrẹ ọfa se ru uyono rayen ọke rẹ oniruo rẹ okinriariẹ de kiẹn ukoko na. Ẹkẹvuọvo, ẹko na cha vwomaba ukoko na ọke rẹ oniruo rẹ okinriariẹ na da cha ta ota rẹga na

UDUGHWRẸN RẸ OSIKOKO YẸRẸ ỌGHWẸKOKO

21. E che ru uyono vuọvo vwẹ udughwrẹn rẹ osikoko yẹrẹ ọghwẹkoko-o. E jẹ a vwẹ ẹkarophiyọ vwọ kẹ ukoko na nẹ ohwo ọvuọvo yẹrẹ orua fuẹrẹn ọrhuẹrẹphiyotọ rẹ uyono rẹ udughwrẹn yena.

UDUGHWRẸN RẸ ẸKAROPHIYỌ

22. Ẹkarophiyọ na de she phiyọ uvwre rẹ udughwrẹn na, e che ru omẹvwa rẹ uvwre rẹ udughwrẹn yena-a.

ONIRUO RẸ UYONO RẸ AKPEYEREN VẸ IRUO RUVIE

23. Ọkpako rẹ ekpako na sanere yen cha dia oniruo rẹ Uyono rẹ Akpeyeren vẹ Iruo Ruvie Na. O vwo oghwa rọ vwọ mrẹvughe nẹ e ru uyono na abavo, ji nene odjekẹ nana. Ọyen vẹ obruche na ta ota kugbe ọkieje. Ugege rẹ Ọbe Uyono rẹ Akpeyeren vẹ Iruo Ruvie Na ghwa vwọ rhe ye, ọyen oniruo rẹ Uyono rẹ Akpeyeren vẹ Iruo Ruvie Na vwọ ghare ota kẹ ihwo vwẹ uvwre rẹ emeranvwe ivẹ yena. Ọnana churobọ si eta eje rehẹ Ọbe Uyono rẹ Akpeyeren vẹ Iruo Ruvie Na kugbe ohwo rọ cha dia ochidiagbara vwo nẹ usun rẹ ekpako rẹ ẹko rẹ ekpako na rhọnvwe kẹ nẹ i muwan. (Ni ẹkoreta 3-16 vẹ 24.) Ọ da ghare eta rẹ iniọvo rehẹ isikuru na, o mi roro kpahen edje rẹ oniọvo vuọvo rọhẹ isikuru na, ọhọ, kugbe ugbomọphẹ rẹ ota kpahen ota rẹ a ta na. Ọ je reyọ oka rẹ ona nana vwo ruiro ọke rẹ ọ da ghara ẹbẹre efa rẹ omẹvwa na. E jẹ a ghare eta rẹ iniọvo rehẹ isikuru na, ọ da havwen mamọ udughwrẹn erha tavwen ẹdẹ rẹ ayen cha vwọ ta ota na ki te. E jẹ a vwẹ Ifọmu rẹ Uyono rẹ Akpeyeren rẹ Avwanre vẹ Iruo Ruvie Na (S-89) vwọ ghare eta rẹ isese ri Baibol vẹ muomaphiyọ iruo rẹ aghwoghwo na. E jẹ omuẹro nẹ oniruo rẹ uyono rẹ akpeyeren vẹ iruo rẹ uvie na vwẹ ọbe rẹ ọrhuẹrẹphiyotọ rẹ ihwo ri vwẹ eta na vwọ tamuẹ ophapha rẹ ovuẹ rẹ ukoko na. Ẹko rẹ ekpako sa sane ọkpako yẹrẹ odibo rowian ọfa nẹ ọ chọn uko. Ẹkẹvuọvo, ekpako ọvo yen ghare ẹbẹre ri churobọ si isese ri Baibol vẹ muomaphiyọ iruo rẹ aghwoghwo na-a.

OCHIDIAGBARA RẸ UYONO RẸ AKPEYEREN VẸ IRUO RUVIE NA

24. Kudughwrẹn kudughwrẹn, ọkpako ọvo cha dia ochidiagbara rẹ Uyono na. (Odibo rowian ro muwan sa vwẹrote ẹbẹre nana siẹrẹ ekpako rehẹ ukoko na rhe bu-un.) O vwo oghwa ro vwo muegbe rẹ ọdjẹkoko ra cha vwọ ton uyono na phiyọ vẹ ọ re che vwo kuophiyọ. Ọyen ji che durhie ihwo ri vwo eta, siẹrẹ ekpako rehẹ ukoko na rhe bu-un, ọ je sa ta ota vwẹ uyono na. Jẹ eta rọ cha vwọ kpẹvwẹ, ji vwo durhie ọtota ọfa dia kprẹn. Ekpako na eje yen che brorhiẹn rẹ ekpako ri muwan kẹ ẹdia nana. Nọke ra ruọke, a cha ghare iruo rẹ ochidiagbara na kẹ ekpako ri muwan. A sa ghare iruo rẹ ochidiagbara na kẹ oniruo rẹ Uyono rẹ Akpeyeren vẹ Iruo Ruvie Na abọ buebun vwọ vrẹ ekpako efa ri muwan. Ọkpako ro muwan rọ vwọ vwẹrote Uyono ri Baibol Rukoko, ji se muwan rọ vwọ dia ochidiagbara rẹ uyono na. Biko karophiyọ nẹ ọkpako rọ dia ochidiagbara na yen cha vwẹ uchebro vẹ ujiri phia vwọ kẹ iniọvo ri vwo Isese ri Baibol vẹ ẹbẹre rẹ muomaphiyọ iruo aghwoghwo na, e jẹ o ru ọtiọyen vwọrẹ ẹguọnọ. Ochidiagbara na ji vwo oghwa rọ vwọ mrẹvughe nẹ uyono na kuphiyọ vwẹ ọke ra rhuẹrẹphiyọ na (Ni ẹkoreta 17 vẹ 19.). O de wen ochidiagbara na, asan da je herọ, e se mu maikrofon phiyọ enu rẹ umukpe na rere ọ vwẹ maikrofon na vwo ruiruo siẹrẹ o de durhie ihwo ri vwo eta, jẹ ihwo ri vwo eta hẹ asan rẹ ayen da cha ta ota na re. Ochidiagbara na ji se chidia enu rẹ umukpe na ọke rẹ ohwo ro vwo Isese ri Baibol vẹ e rẹ ẹbẹre rẹ Muomaphiyọ Iruo Aghwoghwo Na de ru ẹbẹre rayen. Ọnana sa nẹrhẹ a yan mu ọke.

OBRUCHE

25. Owian rẹ obruche na, ọyen ọ vwọ vwẹ uchebro kẹ ekpako yẹrẹ idibo rowian vwẹ ehoho siẹrẹ a da guọnọ fikirẹ ota rayen vwẹ Uyono rẹ Akpeyeren vẹ Iruo Ruvie Na, ota rotu, ayen da vwẹrote yẹrẹ se vwẹ Uyono rẹ Uwevwin Orhẹrẹ vẹ Uyono ri Baibol Rukoko. Ni ẹkorota 19.

IKLASI EFA

26. Siẹrẹ ihwo ri vwo eta vwẹ isikuru na de bun mamọ, a sa ghare ayen phiyọ iklasi efa. Vwẹ iklasi ọvuọvo, ofori nẹ ọkpako ro muwan dia obruche. Ọkpako rọ cha vwẹrote ẹdia nana rha herọ-ọ, odibo rowian ro muwan je sa vwẹrote. Ekpako na yen che brorhiẹn rẹ ohwo ro muwan vwọ kẹ ẹdia nana kugbe sẹ e che rhe wene. Ofori nẹ obruche na nene odjekẹ rọhẹ ẹkorota 18. Siẹrẹ iklasi ọfa da herọ, e de ghwe ru ẹbẹre rẹ Efe Eghanghanre na rọhẹ obotọ rẹ Efe Rọhẹ Ota rẹ Ọghẹnẹ nu, iniọvo ra ghare phiyọ iklasi yena na gbe vrẹ kpo iklasi na. Ayen vwomaba iniọvo ri chekọ siẹrẹ e de ru uyono rẹ Muomaphiyọ Iruo Aghwoghwo Na nu.

IVIDIO

27. Ividio ra rhuẹrẹphiyotọ yen e che vwo ru ẹbẹre nana. A cha mrẹ ividio re che vwo ruiruo vwẹ uyono rẹ uvwre rẹ udughwrẹn na vwẹ aplikeshọni rẹ JW Library^® ra sa vwẹ ifonu, itablẹti vẹ erọnvwọn efa vwo rhie.

S-38-UR 9/25