UYONO 56
Sẹro rẹ Oyerinkugbe Rọhẹ Ukoko Na
Avwanre dahẹ uvwre rẹ iniọvo na, oma ru avwanre kerẹ Ovie Devid rọ vwọ ta: “Mavọ oyovwi te rọ vwerhe te rẹ iniọvo da dia kugbe vwẹ okugbe!” (Une Rẹ Ejiro 133:1) Oyerinkugbe avwanre dia emu rọ de phia kpregede-e. Avwanre ohwo vuọvo che toroba.
1. Die yen a jokaphiyọ vwẹ uvwre rẹ ihwo rẹ Ọghẹnẹ?
Wo de kpo uyono vwẹ ẹkuotọ ọfa, ọkiọvo wo che nyo ejajẹ raye-en, ẹkẹvuọvo ayen che dede uwe sasasa, je nẹrhẹ udu wẹn totọ. Diesorọ? Kidie avwanre vwẹ ọbe vuọvo vwo yono Baibol na vwẹ akpọneje. Avwanre je davwẹngba vwo dje ẹguọnọ kẹ ohwohwo. Otoro asan ra dia-a, e se “se odẹ rẹ Ọrovwohwo . . . [ji] ku evun gbe ọvo vwọ ga.”—Zẹfanaya 3:9.
2. Die yen wo se ru vwo titi oyerinkugbe rọhẹ ukoko na?
“Guọnọ ohwohwo nẹ otọ rẹ evun rhe.” (1 Pita 1:22) Mavọ yen wọ sa vwọ vwẹ uchebro yena vwo ruiruo? Ukperẹ wọ vwọ tẹnrovi jẹgba rẹ ihwo efa, tẹnrovi omamọ rẹ iruemu rayen. Wo nene ihwo re họhọ owẹ ọvo ghwọrọ ọke kuẹgbe-e, davwẹngba vwọ riẹn iniọvo re fẹnẹ owẹ. A sa wian gan wo si koka koka rẹ ẹwẹn rẹ omaẹfẹnẹ nẹ oma.—Se 1 Pita 2:17.a
3. Die yen wo che ru wẹ vẹ oniọvo ọvo vwẹ ukoko na da ghwọ?
Dede nẹ avwanre yerẹn kuẹgbe, avwanre gbare-e. Ọke evo, ayen se ku avwanre phiyotọ yẹrẹ ru obo re da avwanre. Kọyensorọ Baibol na vwọ ta: “Ovwan . . . vwo ghovwo ohwohwo.” Ọ da je ta: “Kirobo rẹ Jihova vwo ghovwo ovwan na, eriyin we ji vwo ghovwo rhe.” (Se Kọlose 3:13.) Avwanre ru obo re da Jihova ọke buebun, dedena o vwo ghovwo. Ọ je guọnọ nẹ e vwo ghovwo iniọvo avwanre. Wọ da mrẹvughe nẹ wo ru ohwo chọ, jowọ wọ vwọ rhuẹrẹ phiyọ.—Se Matiu 5:23, 24.b
HIẸ KODO
Guọnọ idjerhe wo se vwo toroba oyerinkugbe vẹ ufuoma rọhẹ ukoko na.
Die yen wo che ru vwọ guọnọ ufuoma?
4. Phi omaẹfẹnẹ kparobọ
Avwanre guọnọ vwo ẹguọnọ rẹ iniọvo rẹ avwanre. Ẹkẹvuọvo, ọ bẹn re vwo rhiabọreyọ ihwo re fẹnẹ avwanre. Die yen sa chọn avwanre uko? Se Iruo Rẹ Iyinkọn Na 10:34, 35, ovwan ta ota kpahen enọ nana:
Koka koka rẹ ihwo yen Jihova rhiabọreyọ kerẹ Iseri rọyen. Mavọ yen ọyena se vwo wene ẹro wo vwo ni ihwo re fẹnẹ owẹ?
Uruemu rẹ omaẹfẹnẹ vọ yen ihwo vwori vwẹ ekogho wẹn ru wọ guọnọ kẹnoma kẹ?
Se 2 Kọrẹnt 6:11-13, ovwan ta ota kpahen onọ nana:
Die yen wo se ru vwo sikẹrẹ iniọvo wẹn ri nẹ asan sansan rhe?
5. Fobọ vwo ghovwo wọ guọnọ ufuoma
Jihova vwo ghovwo avwanre ghwologhwolo dede nẹ ọ guọnọ evwoghovwo rẹ avwanre-e. Se Une Rẹ Ejiro 86:5, ovwan ta ota kpahen enọ nana:
Mavọ yen evwoghovwo ri Jihova rho te?
Diesorọ evwoghovwo rọyen vwọ da wẹ aro?
Ẹdia vọ yen sa nẹrhẹ ọ bẹn avwanre vẹ ihwo efa vwo yerin kugbe?
Mavọ yen a sa vwọ vwẹrokere Jihova je sẹro rẹ oyerinkugbe rọhẹ uvwre rẹ avwanre vẹ iniọvo rẹ avwanre? Se Isẹ 19:11, ovwan ta ota kpahen onọ nana:
Ohwo ọvo da nẹrhẹ ophu mu we, die yen wo se ru vwọ rhuẹrẹ ẹdia na phiyọ?
Ọke evo, avwanre gbe ihwo efa kuẹ. Ọyena da phia, die yen ofori nẹ e ru? Hworo IVIDIO na, ovwan ta ota kpahen onọ ro nenire.
Vwevunrẹ ividio na, die yen oniọvo aye na ruru vwọ guọnọ ufuoma?
6. Guọnọ erhuvwu vwẹ oma rẹ iniọvo wẹn
E vwo siẹkẹrẹ iniọvo na phiyọ ye, jẹ e vughe asan rẹ ayen da gan vẹ ovwiẹrẹ rayen. Mavọ yen a sa vwọ tẹnrovi asan rẹ ayen da gan? Hworo IVIDIO na, ovwan ta ota kpahen onọ ro nenire.
Die yen sa chọn wẹ uko vwọ mrẹ omamọ rẹ iruemu rẹ iniọvo wẹn vwori?
Omamọ rẹ iruemu avwanre yen Jihova tẹnroviẹ. Se 2 Ikun Rivie 16:9a, ovwan ta ota kpahen onọ nana:
Mavọ yen oma ru we wọ vwọ riẹn nẹ Jihova tẹnroviẹ omamọ rẹ iruemu wẹn?
Diamọnd ro vwo erhuvwu ji vwo echobọ dede, ẹkẹvuọvo ọ je ghanre. Vwẹ idjerhe vuọvo na, iniọvo rẹ avwanre eje gbare-e, ẹkẹvuovo ayen ghanre kẹ Jihova
IHWO EVO TA: “Mi ki vwo ghovwo, ohwo na che ru obo re cha nẹrhẹ mi vwo ghovwo.”
Diesorọ avwanre vwo brokpakpa vwo ghovwo ihwo efa?
ỌDJẸKOKO
Wo se toroba oyerinkugbe rọhẹ ukoko na womarẹ wo vwo dje ẹguọnọ kẹ iniọvo wẹn ji vwo ghovwo ayen eje.
Ẹrhomafuẹrẹn
Mavọ yen wo se vwo phi omaẹfẹnẹ kparobọ?
Die yen wo se ru ọ da dianẹ wẹ vẹ oniọvo ọvo ghwọ?
Diesorọ wọ vwọ guọnọ vwẹrokere evwoghovwo ri Jihova?
HIẸ GUỌNỌ
Yono kpahen oborẹ udje ri Jesu ọvo sa vwọ chọn avwanre uko vwọ kẹnoma kẹ uruemu re vwo gun ihwo efa ẹdjọ.
Ofori nẹ e yovwunu ọ da tobọ dianẹ avwanre riẹnre nẹ e ru chọ-ọ?
“Unueyovwon Ọyen Idjerhe Ọvo re Vwo Titi Ufuoma” (Uwevwin Orhẹrẹ ri November 1, 2002)
Mrẹ oborẹ ihwo evo vwọ kẹnoma kẹ uruemu rẹ omaẹfẹnẹ.
Roro kpahen idjerhe efa wọ sa vwọ rhuẹrẹ ebẹnbẹn phiyọ bẹsiẹ ayen ki djobọte ufuoma rọhẹ ukoko na.
“Rhuẹrẹ Ẹghwọ Phiyọ vẹ Ẹwẹn rẹ Ẹguọnọ” (Uwevwin Orhẹrẹ ri May 2016)
a Eta rẹ odjefiotọ 6 fuẹrẹn oborẹ ẹguọnọ vwo mu Inenikristi vwọ kẹnoma kẹ ẹhra rẹ ega ri pho mu ohwo.
b Eta rẹ odjefiotọ 7 fuẹrẹn obo ra sa vwọ rhuẹrẹ ebẹnbẹn ri churobọ si ekiẹchuọ vẹ urhi phiyọ.