UYONO 42
Die Yen Baibol na Ta Kpahen Ẹdia ri Kpogono vẹ Orọnvwe?
Vwẹ ẹkuotọ evo, ihwo vwo imuẹro nẹ oma cha sa vwerhen ohwo-o jokpanẹ ọ rọvwọnre. Dedena, ọ dia ihwo eje re rọvwọnre yen oma vwerha-an; ọ je dia ihwo eje rehẹ ẹdia ri kpogono yen oma vwerha-an. Baibol na tare nẹ orọnvwe vẹ ẹdia ri kpogono ọyen okẹ.
1. Erere vọ yen a cha mrẹ siẹrẹ a da dia kpogono?
Baibol na da ta: “Ohwo rọ rọvwọ aye rọ sa phihọ otọ riẹn ru; ọ ro rhe sioma nẹ orọvwe kọye ma riẹn ru.” (Se 1 Kọrẹnt 7:32, 33, 38.) Idjerhe vọ yen ohwo rọhẹ ẹdia ri kpogono vwọ “ma riẹn ru”? Inenikristi rehẹ ẹdia ri kpogono vwo ọrivẹ rẹ ayen vwẹrote-e. Ọtiọyena, ayen vwo ugbomọphẹ. Kerẹ udje, evo sa hẹre iruo aghwoghwo rayen phiyọ vọnvọn, kerẹ e vwo kpo ẹkuotọ efa de rhe ghwoghwo iyẹnrẹn esiri na. Ma rho kparobọ, ayen vwo ọke buebun ayen vwo sikẹrẹ Jihova.
2. Erere vọ yen a cha mrẹ siẹrẹ a da rọvwọn vwo nene urhi?
Kerẹ ihwo rehẹ ẹdia ri kpogono, orọnvwe ji vwo erere. Baibol na da ta: “Emu ivẹ yovwi nọ ọvo.” (Aghwoghwo 4:9) Eta yena uyota, ma rho vwọ kẹ Inenikristi re reyọ odjekẹ ri Baibol vwo ruiruo vwẹ orọnvwe rayen. Ihwo re rọvwọnre vwo nene urhi veri nẹ ayen che vwo ẹguọnọ, muọghọ je vwẹrote ohwohwo. Ọnana nẹrhẹ ẹwẹn rayen totọ vwọ vrẹ ihwo ivẹ re de dia kuẹgbe. Ẹwẹn rẹ emọ rayen je nabọ totọ.
3. Ẹro vọ yen Jihova vwo ni orọnvwe?
Ọke rẹ Jihova vwo ru orọnvwe rẹsosuọ, ọ da ta: “Ọshare [cha] . . . yan jẹn ọsẹ rọye vẹ oni rọye vwo kọ rhe gbanọ aye rọye, aye ke dia oma ọvo.” (Jẹnẹsis 2:24) Jihova guọnọre nẹ aye gbe ọshare vwo ẹguọnọ rẹ ohwohwo ji tinkamu ohwohwo rẹ ayen je vwọ herọ na. Jokpanẹ kẹ ọvo gbe igberadja, a cha sa fan orọnvwe na-a. Vwẹ ẹdia tiọyena, Jihova vwẹ uphẹn kẹ ọrivẹ re gbe igberadja ruru na nẹ o brorhiẹn se ọ cha fan orọnvwe na.a (Matiu 19:9) Jihova rhọnvwephiyọ orọnvwe rẹ eya buebu-un.—1 Timoti 3:2.
HIẸ KODO
Yono kpahen obo wo se vwo vwo omavwerhovwẹn ji ru ubiudu ri Jihova ghọghọ te wọ rọvwọnre yẹrẹ wọ hẹ ẹdia ri kpogono.
4. Nabọ reyọ okẹ ri kpogono wẹn vwo ruiruo vọnvọn
Jesu ni ẹdia ri kpogono kerẹ okẹ. (Matiu 19:11, 12) Se Matiu 4:23, ovwan ta ota kpahen onọ nana:
Mavọ yen Jesu reyọ okẹ ri kpogono na vwọ ga Ọsẹ rọyen vẹ ihwo efa wan?
Kerẹ Jesu, Inenikristi riavwerhen rẹ ẹdia ri kpogono rayen. Hworo IVIDIO na, ovwan ta ota kpahen onọ ro nenire.
Idjerhe oyoyovwin vọ yen Inenikristi re je rọvwọ-ọn sa vwọ reyọ okẹ ri kpogono rayen vwo ruiruo vọnvọn?
Wọ Riẹnre Jovwo?
Baibol na djunute ikpe rẹ ohwo che te tavwen ọ ke rọvwọ-ọn. Ẹkẹvuọvo, ọ tare nẹ a hẹrhẹ te ọke rẹ ‘urhuru sivwe rẹ ọke emọ da wanvrẹ nu.’ Ọnana ọke rẹ urhurusivwe ọgangan re vwo kpahen ehware da sa nẹrhẹ eghene bru orhiẹn chọ.—1 Kọrẹnt 7:36.
5. Vwẹ aghwanre sanẹ ọrivẹ orọnvwe wẹn
A vwọ sanẹ ọrivẹ orọnvwe yen orhiẹn rọ ma ghanre wo che bru. Se Matiu 19:4-6, 9, ovwan ta ota kpahen onọ nana:
Diesorọ o vwo fo nẹ Onenikristi brokpakpa rọvwọ-ọn?
Baibol na sa chọn wẹ uko vwọ riẹn obo ro fori nẹ wọ guọnọ vwẹ oma rẹ ọrivẹ. Ma rho kparobọ, guọnọ ọrivẹ orọnvwe ro vwo ẹguọnọ ri Jihova.b Se 1 Kọrẹnt 7:39 kugbe 2 Kọrẹnt 6:14. Ovwan ta ota kpahen enọ nana:
Diesorọ o vwo fo nẹ a rọvwọn Onenikristi ọvo?
Mavọ yen wo rorori nẹ oma che ru Jihova siẹrẹ avwanre da rọvwọn ohwo ro vwo ẹguọnọ rọye-en?
A da vwẹ eranvwe ivẹ re fẹnẹ ohwohwo vwo voro otọ, ayen cha rioja. Vwẹ idjerhe vuọvo na, Onenikristi rọ rọvwọn ohwo rọhẹ ukoko na-a che vwo ebẹnbẹn buebun
6. Vwẹ ẹro rẹ Jihova vwo ni orọnvwe vwo no
Vwẹ Izrẹl awanre, eshare evo fan orọnvwe vẹ eya rayen fikirẹ ojevwe romobọ. Se Malakae 2:13, 14, 16, ovwan ta ota kpahen enọ nana:
Diesorọ Jihova vwo vwo utuoma kpahen ihwo ri fan orọnvwe vwo nene idjerhe rọye-en?
Igberadja vẹ orọnvwe ẹfan so ojaẹriọ vwọ kẹ ọrivẹ re gbe igberadja ruru vẹ emọ na
Hworo IVIDIO na, ovwan ta ota kpahen onọ ro nenire.
Ọ da dianẹ wọ rọvwọn ohwo rọ ga Jihova-a, die wo se ru rere orọnvwe wẹn se vwo phikparobọ?
7. Vwẹ iwan ri Jihova vwo ruiruo vwẹ orọnvwe wẹn
Ọkiọvo, ohwo cha davwẹngba mamọ ọ ke sa vwẹ iwan ri Jihova vwo ruiruo vwẹ orọnvwe rọyen.c Ẹkẹvuọvo, Jihova brẹba kẹ ihwo ri ru ọtiọyen. Hworo IVIDIO na.
Se Hibru 13:4, ovwan ta ota kpahen enọ nana:
Wo rorori nẹ iwan ri Jihova ri shekpahen orọnvwe che fierere kẹ avwanre? Kẹ, diesorọ yẹrẹ diesorọ o vwo jẹ dia ọtiọyen?
Jihova guọnọre nẹ Inenikristi ru orọnvwe rayen yẹrẹ fan orọnvwe na vwo nene urhi, kirobo rẹ igomẹti rẹ ẹkuotọ buebun tare. Se Taitọs 3:1, ovwan ta ota kpahen onọ nana:
Ọ da dianẹ wọ rọvwọn re, o muwẹro nẹ igomẹti rhọnvwephiyọ orọnvwe wẹn na?
OHWO SA NỌ: “Diesorọ a vwọ rọvwọn? Aye vẹ ọshare ra sa de dia uwevwin ọvuọvo?”
Die yen ẹkpahọnphiyọ wẹn?
ỌDJẸKOKO
Orọnvwe vẹ ẹdia ri kpogono eyen okẹ ro nẹ obọ ri Jihova rhe. E sa kẹ ohwo aghọghọ vẹ evunvọnvwẹ siẹrẹ e de yerin akpọ nene ọhọre ri Jihova.
Ẹrhomafuẹrẹn
Mavọ yen ohwo sa vwọ vwẹ ẹdia ri kpogono rọyen vwo ruiruo vwẹ idjerhe ro shephiyọ?
Diesorọ Baibol na vwọ tanẹ a rọvwọn Onenikristi ọvo?
Die yen emu vuọvo rẹ Baibol na tare nẹ ọ sa nẹrhẹ a fan orọnvwe?
HIẸ GUỌNỌ
Die yen o mudiaphiyọ a vwọ rọvwọn “vwẹ odẹ rẹ Ọrovwohwo”?
“Enọ rẹ Ihwo ri Se Ẹbe Avwanre Nọre” (Uwevwin Orhẹrẹ ri July 1, 2004)
Ni ividio ivẹ re sa chọn wẹ uko vwo bru omamọ rẹ orhiẹn ri shekpahen a vwọ kọn phiyọ ohwo vẹ orọnvwe.
Mrẹ oboresorọ oniọvo ọshare ọvo vwọ tanẹ oborẹ Jihova vwọ kẹ ọyen ghanre vrẹ kemu kemu ro vwo ze.
Ọrhọ yen erọnvwọn evo ri fori nẹ ohwo fuẹrẹn tavwen o ki roro kpahen orọnvwe ẹfan yẹrẹ omaẹhẹriẹ?
“Muọghọ kẹ Ọrhuẹrẹphiyotọ rẹ Ọghẹnẹ Vwọ kẹ Orọnvwe” (Uwevwin Orhẹrẹ ri December 2018)
a Ni Eta rẹ Odjefiotọ 4 ro shekpahen ohẹriẹ siẹrẹ e re gbe igberadja-a.
b Vwẹ ẹkuotọ evo, emiọvwọn yen sanẹ ọrivẹ rẹ orọnvwe kẹ emọ rayen. Ọ da dia ọtiọyen, emiọvwọn ri vwo ẹguọnọ che roro se ohwo na vwo ẹguọnọ ri Jihova ukperẹ ayen vwo roro kpahen igho yẹrẹ otitivwe rẹ ohwo na.
c Ọ da dianẹ ohwo rẹ wẹ vẹ ọyen gba dia uwevwin ji bremu wẹ-ẹn, wọ vwọ yanjẹ ohwo na vwo yẹrẹ rọvwọn ọyen orhiẹn romobọ