UYONO 33
Oborẹ Uvie rẹ Ọghẹnẹ Che Ru
Uvie rẹ Ọghẹnẹ suẹn re! Kẹrẹkpẹ, o che ru ewene rode vwẹ otọrakpọ na. E ja fuẹrẹn evo usun rẹ erọnvwọn iyoyovwin re se rhẹro rọyen vwẹ otọ rẹ Uvie rẹ Ọghẹnẹ.
1. Mavọ yen Uvie rẹ Ọghẹnẹ cha vwọ ghwa ufuoma vẹ orhiẹn abavo rhe otọrakpọ na?
Jesu rọ dia Ovie rẹ Uvie rẹ Ọghẹnẹ cha ghwọrọ irumwemwu kugbe usuon rẹ akpọ nana vwẹ ofovwin rẹ Amagidọn. (Ẹvwọphia 16:14, 16) Vwẹ ọke yena, aroẹmrẹ nana ko che rugba riẹriẹriẹ: “Ọmọke krẹ, oruimwemwu gbe cha dia-a.” (Une Rẹ Ejiro 37:10) Womarẹ Uvie na, Jesu che ruo rere ufuoma vẹ orhiẹn abavo sa vwọ dia evunrẹ akpọ na ejobi.—Se Aizaya 11:4.
2. Mavọ yen akpọ na cha dia siẹrẹ ihwo eje de ru ọhọre rẹ Ọghẹnẹ?
Vwẹ otọ rẹ Uvie rẹ Ọghẹnẹ, “Ọvwata cha re ughwẹ rẹ otọ na, kọ dia enu rọye bẹdẹ.” (Une Rẹ Ejiro 37:29) Vwẹro roro obo rọ cha dia wọ vwọ dia evunrẹ akpọ rẹ ihwo eje da dia evwata, e de vwo ẹguọnọ ri Jihova vẹ ohwohwo! A rha cha muọga-a, ihwo eje ke cha dia bẹdẹ.
3. Die yen Uvie rẹ Ọghẹnẹ che ru a da ghwọrọ irumwemwu na nu?
A da ghwọrọ irumwemwu nu, Jesu che su kerẹ Ovie vwẹ ẹgbukpe 1,000. Vwẹ ọke yena, Jesu vẹ ihwo 144,000 ri che nene sun cha vwẹ ukẹcha kẹ ihworakpọ vwọ dia gbagba ji vrabọ rẹ umwemwu. Vwẹ okuphiyọ rẹ ọke yena, akpọ na ko che hirhephiyọ iparadaisi, rọ je vọn vẹ ihwo oma vwerhan kidie ayen yọnrọn irhi ri Jihova. Ukuotọ rọyen, Jesu kọ cha vwẹ usuon na kẹ Jihova rhivwin. Ọtiọyena, ke che ‘ru odẹ ri Jihova fon.’ (Matiu 6:9, 10) O che djephia nẹ Jihova ọyen omamọ rẹ Osun ro vwo ọdavwẹ rẹ ihwo. Ọtiọyena, Jihova kọ cha ghwọrọ Eshu, emekashe rọyen kugbe kohwo kohwo ro gbevwọso usuon Rọyen. (Ẹvwọphia 20:7-10) Omamọ rẹ akpọ rẹ Uvie rẹ Ọghẹnẹ cha ghwa rhe na cha dia bẹdẹ.
HIẸ KODO
Roro kpahen oboresorọ o vwo mu avwanre ẹro nẹ Ọghẹnẹ cha reyọ Uvie rọyen vwo ru orugba rẹ ive eje rehẹ Baibol na ri shekpahen obaro na.
4. Uvie rẹ Ọghẹnẹ che phioba phiyọ usuon rẹ ihworakpọ
“Ohwo . . . tua ohwo muotọ kẹ umiovwo rọye.” (Aghwoghwo 8:9) Womarẹ Uvie rọyen, Jihova cha rhuẹrẹ ebẹnbẹn rẹ orhiẹn ehuhu soro.
Se Daniẹl 2:44 kugbe 2 Tẹsalonaika 1:6-8, ovwan ta ota kpahen enọ nana:
Die yen Jihova vẹ Ọmọ rọyen Jesu che ru kpahen isun rẹ ihworakpọ vẹ ihwo ri biẹcha ayen?
Mavọ yen oborẹ wo yono kpahen Jihova vẹ Jesu vwọ kẹ wẹ imuẹro nẹ ayen che brorhiẹn abavo?
5. Jesu yen Ovie ro me yovwin kparobọ
Kerẹ Ovie rẹ Uvie rẹ Ọghẹnẹ, Jesu che ru erọnvwọn iyoyovwin kẹ ihwo ro suẹn vwẹ otọrakpọ na. Hworo IVIDIO na wọ vwọ mrẹ oborẹ Jesu vwo djephia nẹ ọyen vwo owenvwe vẹ ẹgba ro nẹ obọ rẹ Ọghẹnẹ rhe rọ vwọ chọn ihworakpọ uko.
Jesu vwọ hẹ otọrakpọ na, o dje oborẹ Uvie rẹ Ọghẹnẹ che ru. Erhọ vwẹ usun rẹ ebruphiyọ nana re djunute yen wo me rhẹro rọyen? Se ẹkpo ri Baibol ri nenire re ta ota kpahen ebruphiyọ yena.
ỌKE RỌ VWỌ HẸ OTỌRAKPỌ NA, JESU . . . |
VWO NẸ OBO ODJUVWU, JESU . . . |
|---|---|
|
|
|
|
|
|
|
|
6. Uvie rẹ Ọghẹnẹ cha vwẹ omamọ rẹ akpọ rhe vwẹ obaro na
Uvie na che ru orugba rẹ ọhọre rẹ Ọghẹnẹ vwọ kẹ ihworakpọ vwẹ ẹsosuọ. Ayen cha dia bẹdẹ vwẹ iparadaisi vwẹ otọrakpọ na. Hworo IVIDIO na wọ vwọ mrẹ oborẹ Jihova vwọ reyọ Jesu rọ dia Ọmọ rọyen vwo ruẹ ọhọre rọyen gba.
Se Une Rẹ Ejiro 145:16, ovwan ta ota kpahen onọ nana:
Mavọ yen oma ru we wọ vwọ riẹn nẹ Jihova cha “vwẹ obo ri kohwo kohwo ọkpokpọ guọnọre kẹ”?
IHWO EVO TA: “Ihwo ejobi da wian kugbe, a sa rhuẹrẹ ebẹnbẹn rehẹ akpọ na phiyọ.”
Ebẹnbẹn vọ yen Uvie rẹ Ọghẹnẹ cha rhuẹrẹphiyọ rẹ isun rẹ ihworakpọ nana se ru-u?
ỌDJẸKOKO
Uvie rẹ Ọghẹnẹ che ru orugba rẹ oborẹ Ọghẹnẹ guọnọre. O che ru akpọ na phiyọ iparadaisi rọ vọnre vẹ ihwo esiri re cha ga Jihova bẹdẹ bẹdẹ.
Ẹrhomafuẹrẹn
Mavọ yen Uvie rẹ Ọghẹnẹ che vwo ru odẹ ri Jihova fon?
Die yen kẹ avwanre imuẹro nẹ Uvie rẹ Ọghẹnẹ che ru ive rehẹ Baibol na gba?
Ọrhọ vwẹ usun rẹ ebruphiyọ rẹ Uvie na cha ghwa rhe yen wo me rhẹro rọyen?
HIẸ GUỌNỌ
Mrẹ oborẹ Amagidọn mudiaphiyọ.
Fuẹrẹn obo re cha phia vwẹ ọke ri Jesu seri “ukpokpogho rode” na.—Matiu 24:21.
Mrẹ oborẹ erua se vwo roro kpahen ebruphiyọ rẹ Uvie na cha ghwa rhe.
Vwẹ uyovwinrota na, “Enọ Buebun Kpokpo Uvwe Ẹwẹn,” mrẹ oborẹ ohwo ọvo rọ vwọso oseghe rẹ usuon vwọ mrẹ obo rọ guọnọ.