Die Yen Phia kẹ Avwanre Siẹrẹ E de Ghwu?

Ohwo ru wo vwo ẹguọnọ kpahen ghwuru jovwo re? Vwẹ ọke ọgangan nana, wo se roro: ‘Die yen phia siẹrẹ e de ghwu? A sa rhoma mrẹ ihwo re vwo ẹguọnọ kpahen ri ghwuru?’ Vwo oniso rẹ uvi rẹ ẹkpahọnphiyọ rẹ Baibol na vwọ kẹ avwanre vwẹ uyono nana vẹ ọ rọ vwọ kpahọn.

1. Die yen phia siẹrẹ e de ghwu?

Jesu reyọ ughwu vwo dje ovwerhẹn okokodo. Ohwo rọ vwerhẹn ovwerhẹn okokodo riẹn obo re phia-a. Mavọ yen ughwu vwọ họhọ ovwerhẹn? Ohwo de ghwu nu, oma rha miavwọ-ọ. Ọ rha dia ẹdia ọruvwohwo-o, otoro obo ro vwo ẹguọnọ rẹ igbeyan vẹ ihwo rẹ orua rọyen te-e. Baibol na da ta: “Ihwo ri ghwuru riẹn emu ọvuọvo-o.”—Se Aghwoghwo 9:5.

2. Erere vọ yen a cha mrẹ siẹrẹ a da riẹn uyota ro shekpahen ughwu?

Ihwo buebun djoshọ rẹ ughwu kugbe ihwo ri ghwure! Ẹkẹvuọvo, wọ sa mrẹ uchebro womarẹ oborẹ Baibol na ta kpahen ughwu. Jesu da ta: “Uyota na ko ru ovwan phihọ ọmuvwiẹ.” (Jọn 8:32) Vwọ fẹnẹ oborẹ ẹga evo tare, Baibol na yonori nẹ erhi na ghwẹ. Ọtiọyena, o vwo ohwo vuọvo rọ rioja siẹrẹ o de ghwu-u. Ọ je vwọ dianẹ ihwo ri ghwuru na riẹn emuọvo-o, ayen cha sa wan avwanre oma-a. Eriyina, o rhe fo nẹ avwanre ga yẹrẹ nẹrhovwo rhe ihwo ri ghwuru-u.

Ihwo evo tare nẹ ayen vẹ ihwo ri ghwuru sa ta ota kuẹgbe. Ẹkẹvuovọ, ọyena efian. Kirobo wo ghwe yono na, ihwo ri ghwuru “riẹn emu ọvuọvo-o.” Ọtiọyena, ihwo ri rorori nẹ ayen nene ihwo ri ghwure ta ota kuẹgbe phiẹn oma rayen, kidie emekashe rẹ Idẹbono ri ruẹ kerẹ ihwo ri ghwuru na yen ayen nene ta ota. Kọyen, uyota ro shekpahen ihwo ri ghwuru na sẹro rẹ avwanre nẹ abọ rẹ emekashe rẹ Idẹbono. Jihova tare nẹ e nene ihwo ri ghwure ta ota-a, kidie ọ riẹnre nẹ ọyena sa nẹrhẹ a vẹ emekashe rẹ Idẹbono ru kugbe; ọyena cha so imuoshọ kẹ avwanre.—Se Urhi Rivẹ 18:10-12.

3. Yono kpahen ẹdia rẹ ihwo ri ghwure hepha

Vwẹ akpọneje, esegbuyota rẹ ihwo vwo kpahen obo re phia siẹrẹ e de ghwu fẹnẹre. Vwọrẹ uyota, ọ dia ayen eje yen gbare-e.

• Die yen ihwo rehẹ ekogho wẹn ta kpahen ihwo ri ghwure?

IVIDIO: Ẹdia vọ Yẹn Ihwo ri Ghwuru Hepha?—Ẹbẹre ra Reyọ Norhe (1:19)

Se Aghwoghwo 3:20, ovwan ta ota kpahen enọ nana:

• Vwo nene ẹkpo ri Baibol na, die yen phia siẹrẹ ohwo de ghwu?

• O vwo ẹbẹre ọvo rẹ ugboma rẹ ohwo ro ghwẹ-ẹ?

Baibol na vuẹ avwanre kpahen ughwu ri Lazarọs, ugbeyan ri Jesu. Wo che vwo se Jọn 11:11-14, vwo oniso rẹ oborẹ Jesu ta kpahen ẹdia rẹ Lazarọs hepha. Ovwan ta ota kpahen enọ nana:

• Die yen Jesu reyọ ughwu vwo dje?

• Die yen ọyena yono avwanre kpahen ẹdia rẹ ihwo ri ghwuru hepha?

• Mavọ yen oma ru we kpahen oborẹ Baibol na ta kpahen ughwu?

4. Uyota ro shekpahen ughwu na che fierere kẹ avwanre

A da riẹn uyota ro shekpahen ughwu, oshọ rẹ ihwo ri ghwuru rhe che mu avwanre-e. Se Aghwoghwo 9:10, ovwan ta ota kpahen onọ nana:

• Ihwo ri ghwuru sa wan avwanre oma?

Uyota rọhẹ Baibol na je sẹro rẹ avwanre nẹ efian rẹ ihwo guẹn nẹ a ga yẹrẹ nẹrhovwo kẹ ihwo ri ghwuru. Se Aizaya 8:19 kugbe Ẹvwọphia 4:11, ovwan ta ota kpahen onọ nana:

• Mavọ wo rorori nẹ oma ru Jihova kpahen ihwo re ga ihwo ri ghwure yẹrẹ e re guọnọ ukẹcha rayen?

5. Uyota ro shekpahen ihwo ri ghwuru bru avwanre uche

E yono ihwo buebun nẹ siẹrẹ ayen de ghwu, e che gboja kẹ ayen fikirẹ imwemwu rẹ ayen ru wanre. Ẹkẹvuọvo, ọ vwerhoma ra vwọ riẹn nẹ ohwo vuọvo rioja siẹrẹ o de ghwu-u, eriyin ji te ihwo ri tobọ ru erọnvwọn ebrabra. Se Rom 6:7, ovwan ta ota kpahen onọ nana:

• Vwo nene oborẹ Baibol na tare, ughwu nẹrhẹ ohwo vrabọ rẹ umwemwu. Ọtiọyena, wo rorori nẹ ohwo ro ghwure rioja fikirẹ imwemwu ro ru wanre?

A vwọ riẹn Jihova phiyọ ye, ka cha mrẹvughe nẹ o gboja kẹ ihwo ri ghwure-e. Se Urhi Rivẹ 32:4 kugbe 1 Jọn 4:8, ovwan ta ota kpahen enọ nana:

• Ọghẹnẹ ro vwo iruemu re djunute vwẹ awọreta ri Baibol yena sa rhọnvwe nẹ e gboja kẹ ihwo ri ghwure?

• Uyota ro shekpahen ihwo ri ghwure na se bru we uche? Kẹ, diesorọ?

ỌDJẸKOKO

Ohwo de ghwu nu, akpọ rọyen ko vwoba. Ihwo ri ghwure rioja-a, ayen cha sa wan ihworakpọ oma-a.

Ẹrhomafuẹrẹn

• Die yen phia siẹrẹ ohwo de ghwu?

• Mavọ yen uyota ro shekpahen ughwu vwo fierere kẹ avwanre?

• Mavọ yen uyota ro shekpahen ughwu vwo bru avwanre uche?

HIẸ GUỌNỌ

Mrẹ oborẹ ubiota na “erhi” ghini mudiaphiyọ vwẹ Baibol na.

“Die Yen Erhi Na?” (Uyovwinrota rọhẹ jw.org)

Mrẹvughe se Ọghẹnẹ torhẹ irumwemwu vwẹ erhanre.

Ushi Ọyen Asan ra da Rioja? (3:07)

Ofori nẹ oshọ rẹ ihwo ri ghwure mu avwanre?

Ihwo ri Ghwuru Na, E Sa Chọn Wẹ Uko Yẹrẹ Wan Wẹ Oma? Ayen Ghini Yerẹn? (ibroshọ)

Mrẹ oborẹ ọshare ọvo vwọ mrẹ uchebro ọke ro vwo yono uyota ro shekpahen obo re phia kẹ ohwo siẹrẹ o de ghwu.

“Oma Vwerhen Ovwẹ Kpahen Ẹkpahọnphiyọ ri Baibol na ro Phẹnre rẹ Ọhọ Hepha” (Uwevwin Orhẹrẹ ri February 1, 2015)