Mavọ Yen E Ghwoghwo Iyẹnrẹn Esiri na Wan?

Womarẹ Uvie rọyen, Jihova che si ebẹnbẹn rẹ ihworakpọ eje vwo no kẹrẹkpẹ. Iyẹnrẹn nana fo obo re di phiyoma-a. Jesu guọnọre nẹ idibo rọyen ghwoghwota nana kẹ ihwo eje! (Matiu 28:19, 20) Mavọ yen Iseri ri Jihova vwo ruẹ nene iji ri Jesu nana?

1. Mavọ yen Matiu 24:14 vwo ruẹgba nonẹna?

Jesu da ta: “Ka cha ta ota rẹ iyẹnrẹ esiri na wan akpọ na ejobi.” (Matiu 24:14) Oma vwerhen Iseri ri Jihova rẹ ayen vwo ruiruo ọghanghanre nana. Avwanre ghwoghwo iyẹnrẹn esiri na vwẹ akpọneje vwẹ ejajẹ re vrẹ 1,000! Iruo rode nana guọnọ ẹgbaẹdavwọn ọgangan vẹ ọrhuẹrẹphiyotọ. E che se ruo ababọ rẹ ukẹcha ri Jihova-a.

2. Die yen avwanre ruẹ e se vwo ghwoghwota kẹ ihwo?

Avwanre ghwoghwota kẹ ihwo vwẹ kasan kasan. Kerẹ Inenikristi rẹ ẹgbukpe ujorin rẹsosuọ, avwanre ghwoghwota kẹ ihwo vwẹ “uwevwi” rayen. (Iruo Rẹ Iyinkọn Na 5:42) Ona nana nẹrhẹ e se ghwoghwota kẹ iduduru rẹ ihwo kukpe kukpe. Ọ vwọ dianẹ ihwo ghwa dia uwevwi-in, avwanre ji ruẹ aghwoghwo azagba. Avwanre guọnọ kuphẹn kuphẹn ra vwọ vuẹ ihwo efa kpahen Jihova vẹ ọhọre rọyen.

3. Ono yen vwo oghwa ro vwo ghwoghwo iyẹnrẹn esiri na?

Inenikristi uyota eje yen vwo oghwa ayen vwo ghwoghwo iyẹnrẹn esiri na. Ẹro ọghanghanre yen avwanre vwo ni iruo nana. Avwanre davwẹngba eje vwo ghwoghwota kẹ ihwo kidie arhọ rayen hẹ ẹdia rẹ imuoshọ. (Se 1 Timoti 4:16.) A hwosa kẹ avwanre vwẹ iruo nana-a, kidie Baibol na tare nẹ, “ọphẹ ovwan mrẹrẹ, ọphẹ ovwan je vwọ kẹ rhe.” (Matiu 10:7, 8) Ọ dia ihwo eje yen rhiabọreyọ ovuẹ nana-a. Ẹkẹvuọvo, avwanre ruo yanran kidie ọyen ẹbẹre ọvo rẹ ẹga avwanre, ọ je kẹ Jihova aghọghọ.

HIẸ KODO

4. Avwanre davwẹngba vwo ghwoghwota kẹ ihwo eje

IVIDIO: Aghwoghwo re Ruẹ “re te Oba rẹ Akpọ Na” (7:33)

• Die yen vwerhen owẹ oma kpahen ẹgbaẹdavwọn rẹ Iseri ri Jihova vwo ghwoghwota na?

Se Matiu 22:39 kugbe Rom 10:13-15, ovwan ta ota kpahen enọ nana:

• Mavọ yen iruo aghwoghwo avwanre vwo djephia nẹ avwanre vwo ẹguọnọ rẹ irivẹ avwanre?

• Ẹro vọ yen Jihova vwo ni ihwo ri ghwoghwo iyẹnrẹn esiri na?—Ni owọ 15.

5. Avwanre iruiruo rẹ Ọghẹnẹ

Idje buebun djerephia nẹ Jihova yen suẹn owian na. Kerẹ udje, vwẹ New Zealand oniọvo ọshare ọvo re se Paul mrẹ aye ọvo vwẹ aghwoghwo ri nuwevwin kpuwevwin vwẹ oghẹruvo ọvo. Vwẹ urhiọke rẹ ẹdẹ yena, aye na reyọ odẹ na, Jihova vwọ nẹrhovwo rhe Ọghẹnẹ, rọ vwọ vuẹ nẹ o ruo ohwo ọvo se vwo bro rhe. Paul da ta: “Unọke erha vwọ wan nu, me da vwẹ obọ hworo ẹchẹ rọyen.”

Se 1 Kọrẹnt 3:9, ovwan ta ota kpahen onọ nana:

• Mavọ yen idje kerẹ obo re phiare vwẹ New Zealand vwo djephia nẹ Jihova yen suẹn iruo aghwoghwo na?

Se Iruo Rẹ Iyinkọn Na 1:8, ovwan ta ota kpahen onọ nana:

• Diesorọ a vwọ guọnọ ukẹcha ri Jihova e se vwo ruiruo rẹ aghwoghwo na gba?

Wọ riẹnre jovwo?

Vwẹ uyono rẹ uvwre rẹ udughwrẹn re ruẹ kudughwrẹn kudughwrẹn, e yono avwanre obo re ghwoghwota. Wo de kpo uyono nana jovwo re, die wo roro kpahen iyono ra vwọphia?

6. Avwanre kerhọ rẹ iji rẹ Ọghẹnẹ re vwo ghwoghwota

Vwẹ ẹgbukpe ujorin rẹsosuọ, ihwo re vwọsua davwẹngba vwọ dobọ rẹ aghwoghwo rẹ idibo ri Jesu ji. Inenikristi rẹ ẹgbukpe ujorin rẹsosuọ chochọn rẹ uturhi rẹ ayen vwo ghwoghwo “iyẹnrẹ esiri na.” (Filipae 1:7) Iseri ri Jihova ji ruẹ ọtiọyen nonẹna.a

IVIDIO: A Chochọn rẹ Iyẹnrẹn Esiri na Vwo Nene Urhi (2:28)

Se Iruo Rẹ Iyinkọn Na 5:27-42, ovwan ta ota kpahen onọ nana:

• Diesorọ avwanre cha sa dobọ rẹ iruo aghwoghwo na ji-i?—Se awọ 29, 38, kugbe 39.

ỌDJẸKOKO

Jesu vwẹ iji kẹ idibo rọyen nẹ ayen ghwoghwo iyẹnrẹn esiri na kẹ ẹgborho na eje. Jihova vwẹ ukẹcha kẹ ihwo rọyen vwo ruiruo nana.

Ẹrhomafuẹrẹn

• Mavọ yen a wan ghwoghwo iyẹnrẹn esiri na vwẹ akpọneje?

• Mavọ yen iruo aghwoghwo avwanre vwo djephia nẹ avwanre vwo ẹguọnọ rẹ irivẹ avwanre?

• Wo rorori nẹ iruo aghwoghwo na sa kẹ ohwo omavwerhovwẹn? Kẹ, diesorọ?

HIẸ GUỌNỌ

Mrẹ oborẹ Iseri ri Jihova vwo ghwoghwota kẹ ihwo vwẹ irere ride.

Aghwoghwo Azagba rẹ Oghẹresan rẹ Ruru Vwẹ Paris 5:11

Ukẹcha vọ yen Iseri ri Jihova vwọ kẹ ihwo re djẹ nẹ ẹkuotọ rayen?

E Vwo Ghwoghwota Kẹ Ihwo Re Djẹ Nẹ Ẹkuotọ Rayen (5:59)

Nabọ kerhọ rẹ aye ọvo ro gbikun rẹ obo rọ vwerhoma te a vwọ dia oghwoghwota ọkieje.

Oma Vwerhen Ovwẹ nẹ Mi Jẹ Iruo Nana (6:29)

Yono kpahen ophikparobọ avwanre vwẹ aguare ro toroba ẹyan-obaro rẹ aghwoghwo rẹ iyẹnrẹn esiri na.

“Ihwo ri Ghwoghwo Uvie na Mu Ẹdjọ Rayen Kpo Aguare” (Uvie rẹ Ọghẹnẹ Suẹn Re!, uyovwinrota 13)