Mavọ Yen Ẹga Avwanre sa Vwọ Vwerhen Ọghẹnẹ Oma?

Kirobo ra mrẹre vwẹ uyono 13, ọ dia ẹga eje yen vwerhen Ọghẹnẹ oma-a. Ẹkẹvuọvo, a sa ga Ọmemama na vwẹ idjerhe rẹ oma da vwerhọn. Ọrhọ yen “omamọ rẹ egagọ [yẹrẹ ẹga]” rọ vwerhen Ọghẹnẹ oma? (Jems 1:27) E jẹ a mrẹ oborẹ Baibol na tare.

1. Die yen ofori nẹ e mu ẹga rẹ avwanre kpahen?

Ofori nẹ e mu ẹga avwanre kpahen Baibol na. Jesu da vuẹ Ọghẹnẹ: “Ota wẹn hẹ uyota.” (Jọn 17:17) Ẹga evo kpairoro vrẹ uyota rehẹ evunrẹ Baibol na. Ayen da reyọ iyono vẹ ẹkuruemu rẹ ihworakpọ vwo wene. Ẹkẹvuọvo, oma vwerhen Jihova kpahen ihwo re “sen urhi rẹ Ọghẹnẹ” na-a. (Se Mak 7:9.) Ukperẹ ọtiọyen, avwanre ru ubiudu ri Jihova ghọghọ siẹrẹ e de tinkamu oborẹ Baibol na tare ji nene uchebro rọyen.

2. Mavọ yen ofori nẹ a ga Jihova wan?

Kerẹ Ọmemama rẹ avwanre, Jihova fo ohwo ra vwẹ ẹga ọsoso kẹ. (Ẹvwọphia 4:11) Ọyena mudiaphiyọ nẹ e vwo ẹguọnọ rọyen je ga ọyen ọvo ababọ rẹ ema, yẹrẹ ihoho ra vwọ ba ga ẹga.—Se Aizaya 42:8.

Ofori nẹ ẹga “rọ fonro, ro fo ẹreyọ” yen a vwọ kẹ Jihova. (Rom 12:1) Ọyena mudiaphiyọ nẹ e che yerẹn akpọ nene irhi rọyen. Kerẹ udje, ihwo ri vwo ẹguọnọ ri Jihova yan nene irhi rọyen ri shekpahen orọnvwe. Ayen kẹnoma kẹ irueru echọchọ, kerẹ itaba ese, ihuvwun egangan ẹreyọ yẹrẹ udi ẹda vroma.a

3. Diesorọ e vwo kuomakugbe ihwo efa vwọ ga Jihova?

Emẹvwa ri kudughwrẹn kudughwrẹn avwanre nẹrhẹ e vwo uphẹn re vwo “jiri Ọrovwohwo na . . . vwẹ evun rẹ ukoko na.” (Une Rẹ Ejiro 111:1, 2) Idjerhe ọvo re vwo ru ọtiọyen, ọyen a vwọ sune vwo jiri Jihova. (Se Une Rẹ Ejiro 104:33.) Jihova guọnọre nẹ e kpo emẹvwa kidie o vwo ẹguọnọ avwanre, ọ je riẹn nẹ emẹvwa na cha nẹrhẹ e vwo omavwerhovwẹn bẹdẹ. Vwẹ emẹvwa na, avwanre bọn ohwohwo gan.

HIẸ KODO

4. A vwẹ ema vwọ ba ga ẹga-a

IVIDIO: Ọghẹnẹ Rhọnvwere nẹ A Vwẹ Ihoho Vwọba Ga? (3:26)

• Die yen phiare ọke rẹ evo usun rẹ ihwo rẹ Ọghẹnẹ vwọ guọnọ reyọ ema vwọ ba ga?

Ihwo evo guọnọ sikẹrẹ Ọghẹnẹ womarẹ ema rẹ ayen vwọ ba ga. Ẹkẹvuọvo, ọyena sa nẹrhẹ Jihova bi sheri kẹ ayen? Se Eyanno 20:4-6 kugbe Une Rẹ Ejiro 106:35, 36, ovwan ta ota kpahen enọ nana:

• Ihoho, ema yẹrẹ erọnvwọn efa vọ yen wọ mrẹ nẹ ihwo vwọ ba ga ẹga?

• Mavọ yen oma ru Jihova kpahen ema ra vwọ ba ga ẹga?

• Mavọ yen oma ru we kpahen ema ra vwọ ba ga ẹga?

5. Ra vwọ ga Jihova ọvo si avwanre nẹ abọ rẹ iyono rẹ efian

IVIDIO: Uyota Na Hirhe Ovwẹ Phiyọ Ọmuvwiẹ (5:16)

Se Une Rẹ Ejiro 91:14, ovwan ta ota kpahen onọ nana:

• Die yen Jihova veri nẹ o che ru kẹ avwanre siẹrẹ e de djephia nẹ e vwo ẹguọnọ rọyen womarẹ a vwọ ga ọyen ọvo?

6. Avwanre ga Ọghẹnẹ vwẹ emẹvwa avwanre

Avwanre jiri Jihova je bọn ohwohwo gan womarẹ une ẹsuọ vẹ ẹkpahọnphiyọ avwanre vwẹ emẹvwa. Se Une Rẹ Ejiro 22:22, ovwan ta ota kpahen enọ nana:

• Oma vwerhen owẹ kpahen ẹkpahọnphiyọ ra vwọphia vwẹ emẹvwa?

• Wọ guọnọ riẹn obo ra kpahanphiyọ enọ?

7. Oma vwerhen Jihova siẹrẹ a da vuẹ ihwo efa obo re yonori

O vwo idjerhe buebun re se vwo yono ihwo efa uyota rehẹ Baibol na. Se Une Rẹ Ejiro 9:1 kugbe 34:1, ovwan ta ota kpahen onọ nana:

• Ọrhọ yen orọnvwọn ọvo wo yono nẹ Baibol na rhe ru wọ guọnọ vuẹ ohwo ọfa kpahen?

ỌDJẸKOKO

Oma cha vwerhen Ọmemama avwanre siẹrẹ a da vwẹ ẹga kẹ ọyen ọvo, jiro vwẹ emẹvwa, ji yono ihwo efa kpahen oborẹ avwanre yonori.

Ẹrhomafuẹrẹn

• Mavọ yen a sa vwọ riẹn idjerhe ro me yovwin ra vwọ ga Ọghẹnẹ?

• Diesorọ a vwọ ga Jihova ọvo?

• Diesorọ o vwo fo nẹ e kuomakugbe ihwo re guọnọ ru obo re vwerhen Ọghẹnẹ oma?

HIẸ GUỌNỌ

Vwẹ ikuegbe rẹ “Me Rha Dia Ọviẹn kẹ Ẹdjọ Ọfa-a,” mrẹ oborẹ aye ọvo vwo siomanẹ edjọẹgọ.

“Baibol na Wene Ohwo” (Uwevwin Orhẹrẹ ri July 1, 2011)

Mrẹ obo re sa chọn wẹ uko vwọ kpahenphiyọ enọ vwẹ emẹvwa.

“Jiri Jihova Vwevunrẹ Ukoko Na” (Uwevwin Orhẹrẹ ri January 2019)

Mrẹ oborẹ eghene ọshare ọvo vwọ mrẹ erere nẹ emẹvwa dede nẹ ọ ghwa lọhọ ro se vwo kpo emẹvwa na-a.

Jihova Vwẹrote Vwe (3:07)

Ihwo buebun vwo imuẹro nẹ agbagba na churobọ si ẹga rẹ Inenikristi. Ẹkẹvuọvo, ofori nẹ a vwọ ba ga ẹga?

“Diesorọ Iseri ri Jihova Vwẹ Agbagba Vwo Ruiruo Vwẹ Ẹga Raye-en?” (Uyovwinrota rọhẹ jw.org)