UYONO 15

Ta Ota vẹ Imuẹro

1 Tẹsalonaika 1:5

ỌDJẸKOKO: Djephia nẹ wo vwo imuẹro kpahen obo wọ ta na, ọ je pha ghanghanre.

Nabọ muegbe. Nabo fuẹrẹn ota wẹn na wo se vwo vwo ẹruọ rẹ oborẹ Baibol na dje ẹkpo eghanghanre re herọ fiotọ. Davwẹngba wọ vwẹ eta elọlọhọ vwo dje ẹkpo eghanghanre na phia. Tẹnrovi oborẹ ẹkpo na sa vwọ vwẹ ukẹcha kẹ ihwo wọ ta ota kẹ na. Yare ukẹcha rẹ ẹwẹn ọfuanfon na.

Wo de muegbe rẹ ota wẹn na, ruo phia gorigori wọ sa vwọ nabọ riẹn fiotọ, ji vughe asan wo de se ru yovwinphiyọ.
Vwẹ eta rẹ imuẹro vwo ruiruo. Ukperẹ wo di vwo se eta rehẹ ọbe, reyọ eta romobọ wẹn vwọ ta ota. Jẹ eta wo che vwo ruiruo djephia nẹ wo vwo imuẹro kpahen obo wọ ta na.
Ta ota na vẹ ẹwẹn wẹn eje. Ta ota na phia e se vwo nyo obo wọ ta. Ni opharo rẹ ihwo wọ ta ota kẹ na siẹrẹ o de shephiyọ vwẹ ekogho wẹn.

Ta ota vẹ imuẹro ẹkẹvuọvo, wo vwo ruẹ aroeyivwo-o, wọ je gba ihwo reyọ ota wẹ-ẹn. Ọ da tobọ dianẹ wo ni obo wọ ta na ghanghanre, ta vwẹ idjerhe rẹ ẹguọnọ.