UYONO 10

Upho ro Shephiyọ

Isẹ 8:4, 7

ỌDJẸKOKO: Wẹnẹ upho wẹn wo se vwo dje ẹkpo na fiotọ, o mi ji te ubiudu rẹ ihwo.

Kpare upho kpenu yẹrẹ vwo kpotọ. Kpare upho kpenu wọ vwọ kanrunumu ẹkpo eghanghanre, ji phi oruru phiyọ oma rẹ ihwo na vẹ ọke wo de se ẹkpo rẹ Baibol ro shekpahen ẹdjọeguo. Vwẹ upho kpotọ wọ da ta ota kpahen emu rẹ oshọ, ẹnwan yẹrẹ wọ da guọnọ kpare urhurusivwe rẹ ihwo kpahen obo wọ cha ta.

Wọ da kpare uphọ kpenu ọkieje kọ cha họhọ nẹ wọ van ku ihwo wọ ta ota kẹ na. Wo ruo kerẹ eha rudje-e, ọ cha nẹrhẹ ihwo tẹnrovi we ukperẹ ovuẹ na.
Wẹnẹ upho wẹn. Wẹnẹ upho wẹn kpenu wọ da guọnọ dje oruru phia, ọnana ji churobọ si oborẹ ihwo na bun te vẹ asan rẹ ayen hepha. Wẹnẹ upho wẹn kpotọ wọ da ta ota kpahen omaemuophiyọ yẹrẹ ẹnwan.
Oborẹ ota wẹn cha kpata te. Wọ sa ta ota kpata wo vwo dje omavwerhovwẹn phia. Siẹrẹ wo de djekpahen ẹkpo eghanghanre, wọ ta ota kpata-a.

Ihwo wọ ta ota kẹ na che ru gede gede wo de wẹnẹ upho siẹvuọvo. Ota wẹn da kpata gan nọ, ihwo rhe che nyo fiotọ-ọ.