A Rhọvwọn Jesu Nushi Re

Jesu vwo ghwu nu, ọdafe ọvo re se Josẹf da vuẹ Pailet nẹ ọ guọnọ mu Jesu re shi. Josẹf da vwẹ emwa efuanfon vẹ ishani vwọ pharọ, o de muo phiyọ ushi kpokpọ. E de ghorie ukuta rode phiyọ anurhoro rẹ ushi na. Irherẹn na da vuẹ Pailet: ‘Oshọ mu avwanre nẹ idibo rẹ Jesu evo sa yanrhe rhi cho orivwin na, ayen me tanẹ o vrẹnushi re.’ Ọtiọyena, Pailet da vuẹ ayen: ‘Ovwan ra nabọ rhurhu ushi na, ovwan je rhẹrẹ.’

Ẹdẹ ẹrha vwọ wan nu, vwẹ edegburhiọke, eya evo de kpo ushi na ayen da mrẹ nẹ e ghorie ukuta na no. Ayen da mrẹ amakashe vwevunrẹ ushi na, ọ da vuẹ ayen: ‘Ovwan jẹ oshọ mu ovwa-an. A rhọvwọn Jesu nushi re. Ra vuẹ idibo rọyen nẹ ayen cha mrẹ vwẹ Galili.’

Meri rẹ Magdala de brokpakpa ra guọnọ Pita vẹ Jọn. Ọ da vuẹ ayen: ‘Ohwo ọvo mu orivwin rẹ Jesu reyọ!’ Pita vẹ Jọn da djẹ kpo ushi na. Ayen vwọ mrẹ nẹ ushi na ọfefe, ayen de rhivwin kpo uwevwin rayen.

Meri vwọ rhoma kpo ushi na, ọ da mrẹ emekashe ivẹ vwevunrẹ ushi na, ọ da ta kẹ ayen: ‘Me riẹn asan re mu Ọrovwovwe ra-a.’ Ọ da mrẹ ọshare ọvo, ko roro nẹ ọshare na vwẹrote ogba na, ọ da nọ: ‘Ọga, biko vuẹ vwẹ asan wo muro ra.’ Ẹkẹvuọvo, ọshare na vwọ tanẹ, “Meri!” ọ da rhe mrẹvughe nẹ ọyena Jesu. O de kperi: “Oyono,” ọ da gbanọ. Jesu da vuẹ: ‘Yanran ra vuẹ iniọvo mẹ nẹ wọ mrẹ vwẹ re.’ Kpakpata, Meri da djẹ bru idibo na ra ọ da vuẹ ayen nẹ ọ mrẹ Jesu re.

Vwẹ ẹdẹ vuọvo yena, idibo ivẹ ke yan nẹ Jerusalẹm kpo Emaọs. Ayen vwọ hẹ idjerhe, ọshare ọvo da vwomaba ayen, ọ da nọ ayen oborẹ ayen ta ota kpahan. Ayen da ta: ‘Wo ji nyo? Ẹdẹ erha re wanre na, irherẹn na hwe Jesu. Enẹna, eya evo tare nẹ o vrẹnushi re!’ Ọshare na da nọ ayen: ‘Ovwan vwo imuẹro kpahen eta rẹ emraro na? Ayen tare nẹ Kristi che ghwu, a me je rhọvwọn nushi rhe.’ Kọ nabọ dje isiesi ọfuanfon na vwọ kẹ ayen. Ayen vwo te Emaọs, idibo na da vuẹ ọshare na nẹ o nene ayen ro uwevwin. Ayen cha vwọ riemu ọ da nẹrhovwo, ayen da rhe mrẹvughe nẹ ọshare na Jesu. Ọ da ranvwiẹ.

Idibo ivẹ na de brokpakpa kpo uwevwin rọhẹ Jerusalẹm na, asan rẹ iyinkọn na hepha, ayen da vuẹ ayen obo re phiare. Ayen vwọ hẹ uwevwin na, Jesu da vwomaphia kẹ ayen eje. Ẹsosuọ, ayen vwo imuẹro nẹ ọyen Jesu-u. Ọ da vuẹ ayen: ‘Ovwan ni abọ mẹ, ovwan djobọte vwe. E siro phiyotọ nẹ Kristi na che vrẹnushi.’