Jesu Sivwin Ohwo Vwẹ Ẹdẹ rẹ Urovwoma

Ihwo rẹ Farisi na vwo utuoma kpahen Jesu, kẹ ayen guọnọ idjerhe ayen vwo muo. Ayen tare nẹ ofori e vwo sivwin ohwo vwẹ Ẹdẹ rẹ Urovwoma-a. O vwo Ẹdẹ rẹ Urovwoma ọvo rẹ Jesu vwọ mrẹ orhuẹro ọvo rọ yare igho vwẹ urhuvwu na. Jesu da vuẹ idibo rọyen: ‘Ovwan cha mrẹ oborẹ ẹgba rẹ Ọghẹnẹ che sivwin ọshare nana wan.’ Jesu de dje enya phiyotọ, o de gbe kugbe vẹ ekpẹn, ọ da reyọ vwo si ẹro rẹ ọshare na. Jesu da ta kẹ: ‘Yanran, ra hworhẹ ẹro wẹn vwẹ ẹtẹrhe ame rẹ Sailom.’ Ọshare na vwo ru ọtiọyen, ẹro rọyen de rhie, ọna yen obọ rẹsosuọ ọshare na vwọ mrorẹ vwẹ akpeyeren rọyen.

O gbe ihwo unu mamọ. Ayen da ta: ‘Ọnana dia ọshare ro chidia etinẹ da yare igho na, gbanẹ ohwo ọfa rọ họherọ?’ Ọshare na da ta: ‘Omẹvwẹ re vwiẹre kerẹ orhuẹro na!’ Ihwo na da nọ: ‘Kẹ mavọ wọ vwọ mrorẹ?’ Ọ vwọ vuẹ ayen obo re phiare, ayen da reyọ bru ihwo rẹ Farisi na ra.

Ọshare na da vuẹ ihwo rẹ Farisi na: ‘Jesu yen vwẹ orọnvwọn ọvo vwo si ẹro mẹ, ọ da tanẹ me ra hworhẹ. Mi vwo ru ọtiọyen, ẹro mẹ de rhie.’ Ihwo rẹ Farisi na da ta: ‘Jesu de sivwin uwe vwẹ Ẹdẹ rẹ Urovwoma, kọyen ọ dia ẹgba rẹ Ọghẹnẹ yen o vwo ruo-o.’ Ẹkẹvuọvo, ihwo na da ta: ‘Ọ rha dia ẹgba rẹ Ọghẹnẹ-ẹ, o chese ru emu igbevwunu-u.’

Ihwo rẹ Farisi na de se ọsẹ vẹ oni rẹ ọshare na, ayen da nọ ayen: ‘Mavọ yen ẹro rẹ ọmọ rẹ ovwan se vwo rhie?’ Oshọ ko muẹ ọsẹ vẹ oni na kidie ihwo rẹ Farisi na tare nẹ kohwo kohwo ro vwo esegbuyota kpahen Jesu, a cha djẹ nẹ uwevwin ẹga na. Ayen da ta: ‘Avwanre riẹnre-e. Ovwan nọ komobọ.’ Ihwo rẹ Farisi na da nọ ọshare ro rhuẹro jovwo na enọ buebun, te ẹdia rẹ ọshare na da ta: ‘Obo me riẹnre eje ọyen me vuẹ ovwan nure na. Diesorọ ovwan je vwọ nọ vwẹ enọ?’ Ivun de miovwo ihwo rẹ Farisi na, ayen da djẹ ro otafe.

Jesu vwọ mrẹ ọshare na, ọ da nọ: ‘Wo vwo esegbuyota kpahen Mesaya na?’ Ọshare na da ta: ‘Mi che vwo esegbuyota kpahọn siẹrẹ me da mrẹ.’ Jesu da ta: ‘Mẹvwẹ yen Mesaya na.’ Ọyena uruemu esiri yen Jesu djephia na kidie o sivwin ọshare na nu, ọ da je chọn uko vwo vwo esegbuyota.