Jesu Yan Vwẹ Enu rẹ Ame

Ọ diẹ ihwo re muọga ọvo yen Jesu sivwinri-i yẹrẹ ihwo ri ghwuru ọvo yen ọ rhọvwọn nushi-i, o ji vwo ẹgba ro vwo sun odju vẹ osio. Ọ vwọ nẹrhovwo vwẹ enu rẹ ugbenu nu, Jesu da mrẹ nẹ ọgbọghọ rode ọvo herọ vwẹ Urhie rẹ Galili. Iyinkọn rọyen hẹ evunrẹ urhie na, ayen davwẹngba ayen vwo bi okọ na. Jesu de wontọ nẹ ugbenu na, kọ yan vwẹ enu rẹ urhie na ro vwo bru ayen ra. Iyinkọn na vwọ mrẹ nẹ ohwo ọvo yan vwẹ enu ame na, oshọ de mu ayen. Ẹkẹvuọvo, Jesu da vuẹ ayen: ‘Ovwan djoshọ-ọ, omẹvwẹ.’

Pita da ta: ‘Ọrovwori, ọ da ghene dia owẹ, gba vuẹ vwẹ nẹ me yan bru we rhe.’ Jesu da vuẹ Pita: ‘Yanrhe.’ Pita de wontọ nẹ okọ na, ọ da yan vwẹ enu rẹ urhie na bru Jesu ra. Ẹkẹvuọvo, o vwo sikẹrẹ re, Pita de ni ọgbọghọ na, oshọ de muo. Ko divwẹn. Pita de kperi: ‘Ọrovwori, sivwin uvwe!’ Jesu da yọnrọn obọ rọyen, ọ da ta: ‘Diesorọ wo vwo vwo ẹwẹn ivivẹ? Esegbuyota wẹn rhọ?’

Jesu vẹ Pita da ro okọ na, ugege yena, ọgbogho na da fuen. Wọ sa vwẹ ẹro roro oborẹ oma ru iyinkọn na? Ayen da ta: “Wẹwẹ ghine Ọmọ rẹ Ọghẹnẹ.”

Ọ dia ọke nana ọvo yen Jesu vwo ru oka rẹ igbunu nana-a. Ọke ọfa rẹ Jesu vẹ iyinkọn na vwo bi okọ kpo ẹbẹre ochekọ rẹ urhie na, Jesu de re sherhẹn vwẹ obuko rẹ okọ na. Ọke rọ vwọ vwerhẹn, ọgbọghọ rode ọvo da tonphiyọ. Odju ọgangan na kọ fa ame ro okọ na. Iyinkọn na da ra rhọvwọn Jesu, jẹ ayen kperẹ: ‘Oyono, avwanre che ghwu! Chọn avwanre uko!’ Jesu de vrẹn, ọ da vuẹ urhie na: “Fotovwin riẹin.” Siẹvuọvo na, ọgbogho vẹ odju ọgangan na da rhe fọ. Jesu da nọ iyinkọn na: ‘Esegbuyota rẹ ovwan rhọ?’ Ayen ke ta kẹ ohwohwo: “Aphopho kugbe urhie dede nyupho rọyen.” Iyinkọn na da rhe mrẹvughe nẹ ayen da vwẹroso Jesu kare kare, oshọ rẹ emu vuọvo rhe che mu aye-en.