Gabrẹl Bru Meri Ra

Ẹlizabẹt vwo omoni ọvo re se Meri rọ dia orere rẹ Nazarẹt vwẹ Galili. Ọkarirhe ọvo re se Josẹf, yen kọnphiyọ Meri. Evun rẹ Ẹlizabẹt vwo te emeranvwe esan, amakashe re se Gabrẹl na da vwomaphia kẹ Meri. Ọ da ta: ‘Do, Meri. Ivun wẹn vwerhen Jihova mamọ.’ Ẹkẹvuọvo, o vwo ẹruọ rẹ oborẹ Gabrẹl ta na-a. Amakashe na da vuẹ: ‘Wọ cha mrevun ji vwiẹ ọmọshare, odẹ rọyen cha dia Jesu. O che sun kerẹ Ovie. Uvie rọyen cha dia bẹdẹ bẹdẹ.’

Meri da ta: ‘Mẹvwẹ ọmọtobẹ. Mavọ mi se vwo vwiẹ ọmọ?’ Gabrẹl da vuẹ: ‘O vwo emu vuọvo rọ bẹn kẹ Jihova-a. Ẹwẹn ọfuanfon cha chọn wẹ uko, ku wo che vwiẹ ọmọshare. Omoni wẹn re se Ẹlizabẹt je tobọ mrevun re.’ Meri da ta: ‘Mẹvwẹ odibo rẹ Jihova. E jẹ obo wọ tare na phia kẹ vwẹ.’

Meri da kọn bru Ẹlizabẹt ra. Ọke ro vwo yeren, ọmọ rọhẹ evun rẹ Ẹlizabẹt de pho. Ẹwẹn ọfuanfon na de mu Ẹlizabẹt vwọ ta: ‘Meri, Jihova bruphiyọ kẹ wẹ. Ọyen ọghọ rode rẹ oni rẹ Mesaya na vwọ rhe uwevwin mẹ.’ Meri da ta: ‘Mi jiri Jihova vẹ ubiudu mẹ ejobi.’ Meri da dia uwevwin rẹ Ẹlizabẹt emeranvwe erha, o ki rhivwin kpo Nazarẹt.

Josẹf vwo nyo nẹ Meri mrevun, o de vwo ẹwẹn ro vwo phi oba phiyọ oyan rayen na. Ẹkẹvuọvo, amakashe da vwomaphia kẹ vwevunrẹ evwerhẹn, ọ da vuẹ: ‘Wo jẹ oshọ mu we-e. Meri ru emu vuọvo-o.’ Ọtiọyena, Josẹf da rọvwọn Meri.