Ẹlizabẹt Vwiẹ Ọmọ

A vwọ bọn igbẹhẹ rẹ Jerusalẹm re na, ẹgbukpe 400 wanvre re. O vwo orherẹn ọvo re se Zakaraya, ọ vẹ aye rọyen Ẹlizabẹt dia kẹrẹ orere na. Ikpe buebun yen ayen rọvwọnre jẹ ayen ji vwiẹ ọmọ-ọ. Ẹdẹ ọvo, Zakaraya vwọ torhẹ incẹns vwẹ uwevwin ẹga na, amakashe re se Gabrẹl da vwomaphia kẹ. Osho de mu Zakaraya, ẹkẹvuọvo, amakashe na da ta: ‘Wo jẹ oshọ mu we-e. Me ghwa omamọ iyẹnrẹn nẹ obọ rẹ Jihova rhe. Aye wẹn che vwiẹ ọmọshare, odẹ rọyen cha dia Jọn. Jihova sane Jọn vwọ kẹ owian ọghanghanre ọvo.’ Zakaraya da nọ: ‘Mavọ mi se vwo vwo imuẹro kpahen ota wẹn na? Me vẹ aye mẹ ghwore, avwanre rhe che se vwiẹ-ẹ.’ Gabrẹl da ta: ‘Ọghẹnẹ yen ji vwe rhe vuẹ wẹ iyẹnrẹn nana. Ẹkẹvuọvo kidie nẹ wo vwo imuẹro kpahen ota mẹ na-a, wọ rha cha sa ta ota bẹsiẹ e ki vwiẹ ọmọ na-a.’

Zakaraya dia uwevwin ẹga na krekri vrẹ obo ri jovwo vwẹ ẹdẹ yena. Ọtiọyena ọ vwọ ro otafe, ihwo na ke guọnọ riẹn obo re phiare. Zakaraya rha sa ta ota kẹ aye-en. Abọ kọyen ọ vwọ ta ota. Ihwo da mrẹvughe nẹ Ọghẹnẹ vwẹ ovuẹ ọvo vwọ kẹ.

Ọke vwọ yanran na, Ẹlizabẹt da rhe mrevun, o de vwiẹ ọmọshare kirobo rẹ amakashe na tare. Iniọvo vẹ igbeyan rọyen da rhe mrẹ ọmọ na. Oma vwerhen ayen mamọ. Ẹlizabẹt da ta: ‘E che se ọmọ na, Jọn.’ Ihwo na da ta: ‘O vwo ohwo vuọvo vwẹ orua avwanre ro vwo odẹ yena-a. Mu odẹ rẹ ọsẹ rọyen kẹ rọ dia Zakaraya.’ Ẹkẹvuọvo, Zakaraya de si eta nana kẹ ihwo na: ‘Jọn yen odẹ rọyen.’ Ugege yena, unu rẹ Zakaraya de rhie, kọ rhoma ta ota! Usi rẹ ọmọ na da ro orere rẹ Juda eje, kẹ ihwo roro: ‘Oka rẹ ohwo vọ yen ọmọ nana cha dia?’

Ẹwẹn ọfuanfon na da vọn Zakaraya oma. Ọ da ta: ‘E jẹ e jiri Jihova. O ve kẹ Ebraham nẹ o che ji osivwin rhe, Mesaya na, ro che sivwin avwanre. Jọn yen cha ọmraro rọ cha rhuẹrẹ idjerhe na vwọ kẹ Mesaya na.’

Orọnvwọn ọvo je phia kẹ omoni rẹ Ẹlizabẹt re se Meri. Uyono rọ vwọ kpahen ọnana cha vuẹ avwanre.