Jihova Karophiyọ Josẹf

Ọke rẹ Josẹf vwọ hẹ uwodi, Fero rọ dia ovie rẹ Ijipt da vwerhẹn evwerhẹn rẹ ohwo vuọvo sa fan otọ rọye-en. Odibo rọyen ọvo da vuẹ nẹ Josẹf sa fan otọ rẹ evwerhẹn rọyen na. Fero da tanẹ e mu Josẹf rhe kpakpata.

Fero da nọ: ‘Wọ sa fan otọ rẹ evwerhẹn mẹ na?’ Josẹf da vuẹ Fero: ‘Emu cha vọn Ijipt ẹgbukpe ighwrẹn, ẹkẹvuọvo, ẹgbukpe ighwrẹn re cha vwọ kpahọn, owẹnvwe che fi. Gba sane ohwo ro vwo aghwanre, ọ sẹro rẹ emu na rere owẹnvwe vwo jẹ ihwo wẹn ehwe.’ Fero da ta: ‘Me sane owẹ! Wẹ yen cha dia ohwo rivẹ ro me vwo ẹgba vwẹ Ijipt!’ Mavọ yen Josẹf vwọ riẹn otọ rẹ evwerhẹn rẹ Fero na? Jihova yen vwẹ ukẹcha kẹ.

Josẹf da sẹro rẹ emu vwẹ ẹgbukpe ighwrẹn na. Ẹgbukpe ighwrẹn na vwọ wan nu, owẹnvwe de rhi fi vwẹ akpọneje, kirobo rẹ Josẹf tare. Ihwo ki nẹ kasan kasan cha, ayen me rhe dẹ emu mie Josẹf. Ọsẹ rọyen, Jekọp de nyo nẹ emu hẹ Ijipt, o de ji emeshare rọyen ihwe kpo oboyin ra dẹ emu.

Emọ rẹ Jekọp de bru Josẹf ra, Josẹf vughe ayen ugege yena. Ẹkẹvuọvo, iniọvo rọyen rhe vughe-e. Ayen da vwẹ uyovwin kpotọ vwọ kẹ, kirobo rọ vwerhẹn evwerhẹn na ọke rọ vwọ hẹ eghene. Josẹf guọnọ riẹn sẹ iniọvo rọyen na ji vwo ẹwẹn rẹ utuoma. Ọtiọyena, ọ da vuẹ ayen: ‘Ovwan rhe bẹbẹ ni ẹkuotọ avwanre. Ovwan guọnọ riẹn asan avwanre da vwiẹrẹ.’ Ayen da ta: ‘Ẹjo! Avwanre iniọvo 12 ri nẹ Kenan rhe. Ọvo ghwure, ubrevwiẹ avwanre vẹ ọsẹ avwanre hẹ obo uwevwin.’ Josẹf da ta: ‘Ovwan ra reyọ ubrevwiẹ na rhe tavwen mi ke se ovwan gbuyota.’ Ayen de rhivwin kpo.

Ọke rẹ emu rayen vwọ rhoma re, Jekọp de ji emọ na rhivwin kpo Ijipt. Ayen de mu Benjamin, ubrevwiẹ rayen nene oma. Josẹf davwen iniọvo rọyen ni ro vwo phi uko rẹ idọnọ efuanfon rọyen phiyọ ekpu rẹ Benjamin, ọ sa vwọ vuẹ ayen nẹ ayen choro. Idibo rẹ Josẹf vwọ mrẹ uko na vwẹ ekpu rẹ Benjamin, o de gbe iniọvo na unu. Ayen da rẹ Josẹf nẹ o gboja kẹ ayen ukperẹ Benjamin.

Josẹf da rhe mrẹvughe nẹ iniọvo rọyen wene re. Ọ rha sa yọnrọn oma rọye-en. Ọ da viẹ, ọ da je ta: ‘Mẹvwẹ Josẹf, oniọvo ovwan. Ọsẹ mẹ jehẹ akpọ?’ O gbe iniọvo na unu mamọ. Josẹf da vuẹ ayen: ‘Ovwan jẹ oborẹ ovwan ruru na da ovwa-an. Ọghẹnẹ yen ji vwe rhe mi vwo sivwin arhọ rẹ ihwo. Asaọkiephana, ovwan re mu ọsẹ mẹ rhe kpakpata.’

Ayen de rhivwin kpo ra vuẹ ọsẹ rayen omamọ iyẹnrẹn nana, ayen de ji muo rhe Ijipt. Josẹf vẹ ọsẹ rọyen rhoma mrẹ ohwohwo re, dede nẹ ikpe buebun wanre.