Ọviẹn ro Nyupho rẹ Ọghẹnẹ

Jekọp vwiẹ Josẹf vwẹ ọke ọghwo rọyen. Iniọvo rọyen ekpako mrẹvughe nẹ ọsẹ rayen vwo ẹguọnọ rọyen mamọ. Mavọ wo rorori nẹ oma che ru ayen kpahen ọnana? Ayen rioma kpahen Josẹf, ji vwo utuoma kpahọn. Ọke rẹ Josẹf vwo vwerhẹn evwerhẹn, ọ da vuẹ iniọvo rọyen kpahọn. Ayen rorori nẹ evwerhẹn na mudiaphiyọ nẹ ayen cha vwẹ uyovwin kpotọ kẹ Josẹf ẹdẹ ọvo. Ọ da nẹrhẹ utuoma rẹ ayen vwo kpahọn na rhoma ganphiyọ!

O vwo ẹdẹ ọvo rẹ iniọvo rẹ Josẹf vwọ vwẹrote igegede rẹ ọsẹ rayen vwẹ asan rọ kẹrẹ orere rẹ Shikem. Jekọp de ji Josẹf nẹ ọ ra nokpẹn rayen. Ayen vwọ kpaẹro mrẹ Josẹf rọ cha, ayen da ta: ‘Ọ rọ vwerhẹn evwerhẹn na yen cha na. E jẹ e hwe!’ Ayen de muo phiyọ ukpotọ okokodo. Ẹkẹvuọvo Juda da ta: ‘Ovwan hwe-e! E jẹ a shẹ kpo eviẹn.’ Ayen da shẹ Josẹf kẹ ihwo rẹ Midian ri kpo Ijipt, idọnọ ọfuanfon 20.

Iniọvo rẹ Josẹf de duvwun iwun rọyen phiyọ ọbara rẹ ẹvwe, ayen da vwẹ ewun na rhe ọsẹ rayen, ayen da ta: ‘Ọnana dia ewun rẹ ọmọ wẹn?’ Jekọp de roro nẹ eranvwe rọ djoma yen hwe Josẹf. Ọ darọ mamọ. Ohwo vuọvo se bro uche-e.

Josẹf vwo te Ijipt, a da shẹ kẹ onotu ọvo re se Potifa. Ẹkẹvuọvo, Jihova yanjẹ Josẹf vwo-o. Potifa da mrẹ nẹ Josẹf ọgbowian, a sa je vwẹrosuọ. O rhe kri-i, Potifa da tanẹ Josẹf vwẹrote ekuakua ro vwori eje.

Aye rẹ Potifa de noso nẹ Josẹf, ọyen eghene ro vwo erhuvwu mamọ ro ji vwo ẹgba. Kẹdẹ kẹdẹ kọyen o vwo kpokpo Josẹf nẹ o nene vwerhẹn. Die yen Josẹf che ru? Ọ senre, ọ da ta: ‘Ẹjo! Ọnana chọre. Onini mẹ vwẹroso ovwẹ, wẹwẹ aye rọyen. Mi de nene uwe vwerhẹn, ji mi ru umwemwu vwọso Ọghẹnẹ!’

Ẹdẹ ọvo vwo te, aye rẹ Potifa da guọnọ gba Josẹf nẹ o nene vwerhẹn. Aye na da yọnrọn iwun rọyen, ẹkẹvuọvo, Josẹf da djẹ vabọ. Potifa vwo te uwevwin, aye na da vuẹ nẹ Josẹf guọnọ nene ọyen gbe ọfanrhiẹn. Efian yen o gunru na. Ophu de mu Potifa mamọ, o de mu Josẹf phiyọ uwodi. Ẹkẹvuọvo, Jihova kpairoro vrẹ Josẹf kakaka-a.