Mavọ Yen Avwanre se Vwo Vwobọ Vwẹ Ẹroevwote rẹ Ọguan Ruvie Avwanre?

Ọguan Ruvie rẹ Iseri ri Jihova, ọyen asan rẹ avwanre da ga Ọghẹnẹ. Ọtiọyena, ọyen okpuphẹn rode revwo vwobọ vwẹ orufon, ẹroevwote vẹ ẹrhuẹrẹ rẹ ọguan na. Ọnana jẹ ẹbẹre-ọvo rẹ ẹga ọfuanfon ravwọ kẹ Ọghẹnẹ, avwanre eje se vwobọ vwọ.

Vwomakpahotọ vwo ru ọguan na fon siẹrẹ e de ru uyono nu. Oma vwerhen iniọvo na rẹ ayen vwo hwerhe Ọguan Ruvie na, siẹrẹ e de ru uyono nu. E ji ruẹ orufon rẹ Ọguan Ruvie na ọkeneje. Ọkpako yẹrẹ odibo rowian yen kobaro rẹ iruo nana, ọke buebun, o nene ọbe re si erọnvwọn re che ru phiyọ. Evo hworhẹ otọ rẹ ọguan na, ayen rien egbara na, je rhuẹrẹ ayen phiyọ, efa rien ighegbe, kuẹ erhurhu kuẹfia, yẹrẹ frẹ odi rehẹ egodo na vẹ e rehẹ otafe rẹ egodo na. Siẹrẹ ọ da hanvwe, e ruẹ orufon rẹ asan eje, obọ ọvo ẹgbukpe. A da vwẹ iruo evo vwọkẹ emọ na, jẹ e yono ayen nẹ ofori nẹ e muọghọ kẹ asan ra da ga Ọghẹnẹ.​—Aghwoghwo 5:1.

Vwomakpahotọ vwọkẹ ẹrhuẹrẹ rẹ Ọguan Ruvie na. Kukpe kukpe yen a fuẹrẹn Ọguan Ruvie na, te obotafe te obevun rọyen. Obo ra mrẹ Ọguan na phiyọ kọyen e nẹ vwo ruiruo rẹ ẹroevwote rẹ Ọguan Ruvie na, ọtiọyena e rhe muẹ igho ghwọrọ-ọ. (2 Ikun Rivie 24:13; 34:10) Ọguan Ruvie ra nabọ vwẹrote, ọyen asan ro fo ẹga rẹ avwanre vwọ kẹ Ọghẹnẹ. Avwanre de vwobọ vwẹ iruo nana, kẹ e se djephia nẹ avwanre vwo ẹguọnọ kpahen Jihova vẹ uwevwin rọyen. (Une Rẹ Ejiro 122:1) Ọnana je sa dia omamọ oseri vwọkẹ ihwo rehẹ ekogho na.​—2 Kọrẹnt 6:3.

• Diesorọ o vwo fo nẹ a vwẹrote asan rẹ avwanre da ga Ọghẹnẹ?

• Ọrhuẹrẹphiyotọ vọ yen herọ vwọkẹ orufon rẹ Ọguan Ruvie?