Asan Vọ Yen E Se Bẹtẹl?

Bẹtẹl, ọyen odẹ rẹ Hibru, ro mudiaphiyọ “Uwevwin rẹ Ọghẹnẹ.” (Jẹnẹsis 28:17, 19) Odẹ nana fo asan rẹ Iseri ri Jihova da vwẹrote iruo aghwoghwo na vwẹ asan sansan vwẹ akpọ na. Ẹko Rọvwẹrote na ga vwẹ esiri rẹ ukoko na rọhẹ New York, vwobẹ America, etiyin yen ayen da vwẹrote iruo re ruẹ vwẹ eghọn ukoko rehẹ ẹkuotọ sansan vwẹ akpọneje. E se ihwo re wian vwẹ etiyin, orua ri Bẹtẹl. Kerẹ orua, ayen yerẹn kuẹgbe, wian kuẹgbe, riemu kuẹgbe, ji yono Baibol na kuẹgbe.​—Une Rẹ Ejiro 133:1.

Ọyen asan oghẹresan rẹ ihwo re vwoma vwoze da wian kuẹgbe. Eshare vẹ eya re vwomakpahotọ vwọkẹ eruo rẹ ọhọre rẹ Ọghẹnẹ vẹ ẹyan-obaro rẹ iruo rẹ Uvie na, yen dia Bẹtẹl. (Matiu 6:33) A hwosa kẹ aye-en, ẹkẹvuọvo a kẹ ayen iwevwin rẹ ayen dia, emu rẹ ayen ria, vẹ imigho rẹ ayen vwọ vwẹrote oma rayen. Kohwo kohwo rọ ga vwẹ Bẹtẹl vwo iruo ro ruẹ, ọ sa dia evunrẹ ọfisi, ukoni, yẹrẹ asan ra da riemu. Evo wian vwẹ asan ra da teyen ẹbe, efa fọnrhọn emwa, vwẹrote iwevwin, rhuẹrẹ ekuakua sansan, yẹrẹ ruiruo efa.

Asan ra da wian gangan vwọkẹ ẹyan-obaro rẹ iruo aghwoghwo rẹ Uvie na. A bọn Bẹtẹl rere uyota ri Baibol na se vwo te ihwo buebun obọ. Etiyin e de ru ibroshọ nana. Ẹko Rọvwẹrote iruo rẹ Iseri ri Jihova yen vwẹrote esio rọyen, kẹ ayen reyọ vwo rhe iniọvo ri ruiruo rẹ efanfan vwẹ akpọneje womarẹ intanẹti, a me rha vwẹ ijini re djẹ kpatakpata vwọ teyen ayen phia vwẹ Bẹtẹl, ukuotọ rọyen ke mu ayen vwo rhe ikoko re vrẹ 110,000. Enana idjerhe sansan rẹ ihwo re wian vwẹ Bẹtẹl vwo toroba ẹyan-obaro rẹ iruo rẹ aghwoghwo na rọ guọnọ okpakpa asaọkiephana.​—Mak 13:10.

• Amono yen ga vwẹ Bẹtẹl, mavọ yen a vwẹrote ayen wan?

• Iruo rọ guọnọ okpakpa vọ yen owian re ruẹ vwẹ Bẹtẹl vwẹ ukẹcha kẹ?