Iruo vọ Yen Ẹko Rọvwẹrote na Ruẹ Nonẹna?

Vwẹ ẹgbukpe ujorin ẹsosuọ, “iyinkọn vẹ ekpako” rehẹ Jerusalẹm yen ga kerẹ ẹko rọvwẹrote na; ayen brorhiẹn eghanghanre rẹ ukoko na eje yan nene. (Iruo 15:2) Ayen ku evun gbe vwo brorhiẹn, kidie ayen fuẹrẹn Baibol na ji nene odjekẹ rẹ ẹwẹn ọfuanfon na. (Iruo 15:25) Ọtiọyen ọ je hepha nonẹna.

Ọghẹnẹ reyọ ayen vwo ruẹ ọhọre rọyen. Iniọvo ra vwẹ ẹwẹn ọfuanfon jẹreyọ re ga kerẹ Ẹko Rọvwẹrote na, vwo ẹguọnọ kpahẹn Ota rẹ Ọghẹnẹ mamọ, ayen je nabọ vwẹrote iruo rẹ ẹga na. Ayen vwoma kudughwrẹn kudughwrẹn vwọ jiroro kpahẹn ọdavwẹ rẹ iniọvo rehẹ akpọneje. Ẹko Rọvwẹrote na vwẹ odjekẹ ri Baibol na vwo rhe ukoko na womarẹ ileta, iniruo okinriariẹ vẹ ihwoefa, kirobo rọ hepha vwẹ ẹgbukpe ujorin ẹsosuọ. Ọnana nẹrhẹ avwanre eje se nene odjekẹ vuọvo. (Iruo 16:4, 5) Ayen vwẹrote iruo aghwoghwo na, esio rẹ ẹbe, vẹ evwomuo rẹ iniọvo re ga vwẹ ẹdia sansan vwevunrẹ ukoko na.

Ayen nene odjekẹ rẹ ẹwẹn ọfuanfon na. Ẹko Rọvwẹrote na vwẹroso odjekẹ ri Jihova, Osun rẹ Akpọ vẹ Odjuvwu, kugbe Jesu rọ diẹ Ọgbuyovwin rẹ ukoko na. (1 Kọrẹnt 11:3; Ẹfesọs 5:23) Ayen nẹ oma rayen kerẹ isu-un. Ayen vẹ iniọvo ichekọ ra vwẹ ẹwẹn ọfuanfon jẹreyọ na “nene Omogodẹ na kpo kasan kasan rọ rare.” (Ẹvwọphia 14:4) Oma vwerhen ayen siẹrẹ avwanre da karophiyọ ayen vwẹ ẹrhovwo avwanre.

• Amono yen ẹko rọvwẹrote na vwẹ ẹgbukpe ujorin ẹsosuọ?

• Idjerhe vọ yen Ẹko Rọvwẹrote na vwo nene odjekẹ rẹ Ọghẹnẹ nonẹna?