Ihwo rẹ Izrẹl Ro Kenan

ẸGBUKPE ujorin buebun tavwen ihwo rẹ Izrẹl ke ro Kenan, Jihova veri nẹ ọ cha reyọ otọ na vwọkẹ emọ rẹ Ebraham. Asaọkiephana, ihwo rẹ Izrẹl muegbe rẹ ayen cha vwọ ro Otọ rẹ Uve na vwẹ otọ usuon ri Joshua.

Ọghẹnẹ brorhiẹn rọ vwọ ghwọrọ ihwo ri Kenan. Ayen nẹrhẹ otọ na vọn vẹ ọfanrhiẹn kugbe ohwekufia. Kọyen sorọ ihwo rẹ Izrẹl vwọ ghwọrọ irere ri Kenan kare kare.

Tavwen ayen ke ro otọ na, Joshua de ji eshare ivẹ nẹ ayen re ni otọ na, ayen da dia uwevwin ri Rehab vwẹ orere ri Jẹriko. Rehab rhiabọdede eshare ivẹ na, ọ da sẹro rayen dede nẹ ọ riẹnre nẹ ayen ihwo rẹ Izrẹl. Rehab se Ọghẹnẹ rẹ Izrẹl gbuyota kidie o nyo kpahen oborẹ Ọghẹnẹ sivwin ihwo rọyen wan re. Ọ da vuẹ eshare ivẹ na nẹ ayen duvwu iyori rere e vwo jẹ evwruwevwin rọyen ẹghwọrọ.

Ihwo rẹ Izrẹl da rhe ro Kenan, ayen vwo te Jẹriko, Jihova de ru igbevwunu, igbẹhẹ ri Jẹriko de she totọ. Isodje ri Joshua da họrhọ ro orere na, ayen da ghwọrọ totọ, ẹkẹvuọvo, ayen sivwin Rehab vẹ orua rọyen. Vwẹ uvwre rẹ ẹgbukpe esan, Joshua de phi irere buebun kparobọ vwẹ Otọ rẹ Uve na. Ọyena vwọ wan nu, ka rhe ghare otọ na kẹ uvwiẹ ihwivẹ rẹ Izrẹl.

Ro vwo siẹkẹrẹ oba rẹ akpeyeren rọyen, Joshua de se ihwo na koko. O de gbikun rẹ oborẹ Jihova nene esẹ ride rayen yerin, o de bru ayen uche nẹ ayen ga Jihova. Ọke ri Joshua vẹ ekpako na vwo ghwu nu, ihwo rẹ Izrẹl da yanjẹ Jihova vwo ra ga eghẹnẹ rẹ efian. Vwẹ omarẹ ẹgbukpe 300, ẹgborho na rha sa yọnrọn irhi ri Jihova kirobo rọ guọnọre-e. Uvwre rẹ ọke yena, Jihova da fọ kẹ ivwighrẹn rayen, nẹ i shenyẹ ayen kerẹ ihwo ri Filistia. Ẹkẹvuọvo, ọke rẹ ihwo rẹ Izrẹl de kperi se Jihova, kọ vwẹ iguẹdjọ vwo muẹ ri sivwin ayen. Iguẹdjọ 12 yen o vwo mu.

Kirobo rẹ ọbe rẹ Iguẹdjọ gbikun rọyen, Otniẹl yen oguẹdjọ rẹsosuọ, Samsin da rha dia oguẹdjọ rọ koba, rọ dia ohwo ro me vwo ẹgba rọ dia akpọ na re. Ikuegbe rẹ ọbe rẹ Iguẹdjọ na yono avwanre nẹ, revwo nyupho ri Jihova ghwa ebruphiyọ cha, jẹ ẹmenyo ghwa okpetu cha.

​—E muro kpahen Joshua; Iguẹdjọ; Livitikọs 18:24, 25.