Ighene​—⁠Die Ovwan Cha Vwẹ Akpeyeren Rovwan Ru?

E GUỌNỌ obo ri me yovwin vwẹ evun rẹ akpeyeren.” Ọtiọyen ọyẹn eghene rẹ ọmọtẹ ọvo tare. Aphro herọ-ọ, wọ je guọnọ ọtiọyen. Ẹkẹvuọvo kẹ mavọ wọ sa vwọ mrẹ “obo ri me yovwin” vwẹ evun rẹ akpeyeren? Obo re hwarhiẹ iyẹnrẹn rẹ ikuegbe kugbe otu wẹn, ọkiọvo tobọ iyono wẹn, e sa ta tanẹ o se te we obọ woma rẹ ẹmrẹ r’igho obuebun kugbe avwerhe rẹ uyono rọvẹ ọghọ​—⁠rẹ ohwo vwo phikparobọ!

Dede na, Baibol na o si imighene orhọ tanẹ ẹvwọtua rẹ ophikparobọ rẹ ekuakua ọyen “odju re nene họnra.” (Aghwoghwo 4:⁠4) Emu ọvo rọ herọ, imighene krẹn eyen ghine se fe efe i mi ji titi. Iri yerin te ẹdia yena e mrẹ oma rayen vwẹ evun rẹ ẹdia rẹ imwenu kugbe ophiẹvwẹ. “Ọ họhẹ ekpeti ofefe,” ọyẹn obo rẹ emeghene rẹ Britain ọvo rọ vwọ tua uyono ọvo ro titiri tare. “Wo de ni evun rọyen, emu vuọvo herọ-ọ.” Uyota, ọkiọvo iruo sa ghwa efe kugbe otituvwe cha. Ẹkẹvuọvo ọ cha sa kẹwẹ ‘evunvọnvwẹn rẹwẹ-ẹn.’ (Matiu 5:⁠3) Vwọ vrẹn ọyena, 1 Jọn 2:17 o si avwanre orhọ tanẹ “akpọ na . . . wanvrẹn.” Ọ da tobọ dianẹ wo phikparobọ vwẹ evun rẹ akpọ nana, ọ cha dia ọrẹ ọmọke krẹn.

Aghwoghwo 12:1 de bru ighene uche: “Karohọ Ọmema wẹn vwẹ ọke re wọ vwọ eghene na.” E, idjerhe ro me yovwin kparobọ rẹ wọ vwọ vwẹ akpeyeren wẹn vwo ruiruo ọyehẹ vwẹ evun rẹ ẹga ri Jihova Ọghẹnẹ. Ẹkẹvuọvo ẹsosuọ, kẹ wo mwuwan wọ vwọ dia evun rẹ ẹga r’Ọghẹnẹ. Kẹ mavọ wo se vwo yerin mwo? Vwọba ọyena, die ọyẹn akpeyeren rẹ ẹga r’Ọghẹnẹ guọnọre?

Revwo Mwuwan ra vwọ Dia Oseri ri Jihova

Ẹsosuọ, ke ka wian kpahẹn ọdavwẹ ra vwọ ga Ọghẹnẹ​—⁠jẹ ọdavwẹ yena cha kpregede-e, ọ da tobọ dia nẹ ọsẹ vẹ oni wẹn Inene-ri-Kristi. Wẹwẹ vi Jihova che vwo oyerinkugbe romobọ wẹn. “Ẹrhovwo ẹnẹ ọyen cha chọn wẹn uko wẹwẹ vi Jihova vwo vwo oyerinkugbe romobọ wẹn,” ọtiọyen ọyẹn emeghene rọmọtẹ ọvo rọhẹ uvwre rẹ ẹgbukpe ihwegberha re tẹ ihwegbirhirin tare.​—⁠Une rẹ Ejiro 62:8; Jems 4:⁠8.

Rom 12:2 reyẹ ẹkpo rẹ owọẹjẹ ọfa rẹ wọ cha jẹ vwọ phia. Ọ da ta: “Re we se vughe ọhọre rẹ Ọghẹnẹ, obo ri yoma ro fo ẹreyọ kugbe obo re gbare.” Wọ tobọ mrẹ oma wẹn vwẹ ẹdia rẹ wo de vwo ẹwẹn ivivẹ kpahẹn erọvwọ evo re yonuwe wan re? Ọda dia ọtiọyen gba yan nene uchebro ri Baibol siẹnẹ ‘wọ mrẹvughe’ tanẹ erọvwọn nana uyota! Ru ehiahiẹ romobọ wẹn. Se Baibol na kugbe ẹbe ra fan nẹ Baibol rhe. Revwo yono kpahan Ọghẹnẹ ọdiẹ ọrẹ ọhọ rẹ erianriẹn romobọ-ọ. Ghwọrọ ọke vwo roro kpahẹn obo rẹ wo se siẹnẹ ọ sa vwọ ro ubiudu r’udje wẹn chidia. Ọnana cha nẹrhẹ ẹguọnọ wẹn kpahẹn Ọghẹnẹ ọ rho.​—⁠Une rẹ Ejiro 1:​2, 3.

Ọrọvwọkpahọn, davwẹgba wo vwo gbikun rẹ obo ru wo yono na vwọ kẹ emọ rẹ wọ vayen gba hẹ isikuru vwẹ ọke ghevweghe. Revwo ghwoghwo nẹ anurhoro kpẹ anurhoro ọyẹn owọ rọvwọkpahọn. Nọke kpẹ ọke wọ sa yan ghwẹ phiyẹ ọmọ rẹ wọ vọyen gbe kpẹ isikuru ọke wo de ghwoghwo, ọkeọvo ọnana sa nẹrhẹ wọ phariẹ ẹsosuọ. Ẹkẹvuọvo Baibol na phiudu phiyẹ avwanre awọ tanẹ “oma rẹ iyẹnrẹ na sa vo” avwanre-e. (Rom 1:16) Ovuẹ rẹ arhọ kugbe iphiẹrophiyọ ọyen wọ ghwa rhe! Die sorọ oma rọyen vwọ vo owẹ?

Asaọkiephana, ọ da dianẹ ọsẹ vẹ oni wẹn Inene-ri-Kristi, ọ sa dianẹ wo nene ayen kpo owian nana re. Ẹkẹvuọvo kẹ wo se ru vrẹn ọrẹ takpẹ wo mudia anurhoro rẹ wọ da fọ gbiẹin yẹrẹ ọrẹ wo de di phi ẹbe rẹ ọkiọke kugbe ọmọbe otete phiyẹ ada? Wẹwẹ ọvo komobọ sa ta ota vwẹ anurhoro, rẹ wọ da reyẹ Baibol vwo yono ohwo ro vwo uwevwin na? Ọrha dia ọtiọye-en, ke nokpẹn rẹ ukẹcha mie ọsẹ vẹ oni wẹn eyẹrẹ ọvo usun rẹ ihwo ri tedje vwẹ evun rẹ ukoko na. Jẹ ọ dia obo rẹ wọ tẹnrovi siẹnẹ wo se vwo mwuwan rẹ oghwoghwota rẹ ikun esiri na reji rhi bruphiyame-e!

Ọmọke de rhi te, kẹ wo che vwo ẹwẹn rẹ omaẹvwọkpahoto​—⁠rẹ wo vwo ve kẹ Ọghẹnẹ nẹ kẹ etinẹ yaran kẹ wọ vwẹ ẹga kẹ. (Rom 12:⁠1) Dede na, omaẹvwọkpahotọ ọ diẹ irueru rẹ odjahọn ọvo-o. Ọghẹnẹ guọnọre nẹ ihwoeje “vwẹ unu rhọvwe kọye ọ vwọ rhọ.” (Rom 10:10) Vwẹ ọke rẹ ebrophiyẹ-ame, ẹsosuọ wọ ka vwẹ unu ghwoghwo esegbuyota wẹn phia vwẹ azagba. Ebrophiyẹ-ame kọyen vwọ kpahọn. (Matiu 28:​19, 20) Arhọvwere, ebrophiyẹ-ame ọyẹn owọẹjẹ ọrhuarho. Ẹkẹvuọvo wo sioma phiyẹ uko-o ­fikiridie nẹ wo vwo ẹwẹn nẹ wo se she vwẹ idjerhe ọvo. Wọ da vwẹro so Ọghẹnẹ rọ vwọ kẹ wẹ ẹgba, ọ cha kẹ wẹ “[ogangan] rọ basa-an na” vwọ chọn wẹn uko mudia gan kokoroko.​—⁠2 Kọrent 4:7; 1 Pita 5:⁠10.

Vwẹ ọke rẹ ebrophiyẹ-ame, kẹ wọ rhe dia ọvo usun rẹ Iseri ri Jihova. (Aizaya 43:10) Ofori nẹ ọnana ru ewene ọgangan phia vwẹ obo rẹ wọ cha vwẹ akpeyeren wẹn ru. Omaẹvwọkpahotọ she kpahen nẹ wọ ‘sen oma wẹn.’ (Matiu 16:24) Wo se gbobọ nyẹ oboravwọtua romobọ evo wọ me ‘guọnọ Uvie r’Ọghẹnẹ ẹsosuọ.’ (Matiu 6:33) Ọke yena omaẹvwọkpahotọ kugbe ebrophiyẹ-ame ki che rhie uphẹn buebun phiyotọ wo se vwo ru ọyena. E ki je roro kpahẹn evo rayen.

Uphẹn Sansan ri Rhiephiyọ Ravwọ Ga Ọghẹnẹ Ọkieje

● Ọkobaro ọyen ọvo usun rẹ uphẹn na. Oghwoghwota rọ dia ọkobaro ọyẹn Onene-ri-Kristi rọ diẹ udje roghẹresan re bruphiyẹ-ame re, rọ rhuẹrẹ ọke phiyọ rọvwọ ghwọrọ siẹrẹ ọda havwe, inọke 70 emeravwe ọvuọvo vwo ghwoghwo ikun esiri na. Ravwọ ghwọrọ ọke buebun vwẹ evun rẹ ada ọ cha vwẹ ukẹcha kẹwẹ vwọ wian kpahẹn ona rẹ aghwoghwo kugbe uyono wẹn. Buebun rẹ ekobaro i rhiẹro mrẹ aghọghọ vwẹ ukẹcha rẹ ayen vwọ kẹ ireyono Baibol rayen rhe dia Iseri re bruphiyẹ-ame. Didi owian rẹ akpeyeren ọyen sa vọn vẹ omavwerhovwẹn kugbe evunvọnvwẹn tiọyen?

Rere ayen sa mrẹ igho vwọ vwẹro te oma rayen, buebun rẹ ekobaro i ruiruo rẹ ọmọke. Buebun fobọ mwegbe vwọ kẹ oghwa nana rẹ ayen vwo yono kpahẹn oka rẹ iruo ọvo evun rẹ isikuru eyẹrẹ woma rẹ esẹ vẹ ini rayen. Ọde dianẹ wẹwẹ kugbe ọsẹ vẹ oni wẹn de roro nẹ ọ dia emu rẹ erhuvwu vwọ kẹwẹ wo vwo yono omoka rẹ iruo ọfa siẹrẹ wo de wontọ nẹ ikọlẹji nu, gbe vwo imwẹro nẹ iroro wo vwo ruo, ọ diẹ ọrẹ efe-e, ẹkẹvuọvo jọ dia ọrẹ wọ vwọ chọn iruo rẹ uvie wẹn uko, ọkiọvo kugbe ọrẹ wọ je vwọ ga kerẹ oruiruo rẹ ọkieje.

Dede na, obo rẹ ọkobaro tọn ẹro viẹ vwẹ akpeyeren ọ diẹ iruo rakpeyeren rọye-en, ẹkẹvuọvo iruo r’uvie rọyen​—⁠rọvwọ vwẹ ukẹcha vwọ kẹ ihwoefa i vwo vwo arhọ! Die sorọ wọ rha reyẹ ọkobaro kerẹ oboravwọtua romobọ-ọ? Ọke buebun ọyen ọkobaro vwo sun ohwo kpẹ uphẹn efa. Kerẹ udje, ekobaro evo e kua kpẹ asan ra da ma guọnọ ighwoghwota rẹ Uvie na. Efa yono ejajẹ rẹ ẹkuotọ-ọfa ayen ke ga vwẹ ukoko rọhẹ ekogho rayen dia ra vwẹ ejajẹ rẹ ẹkuotọ ofa vwo ruẹ iyono rayen eyẹrẹ je tobọ vwẹ etọ rẹ awusheri. E, ọkobaro ọyen idjerhe rẹ akpeyeren ro vwo omamọ rẹ osa!

● Isikuru ri Baibol Vwọkẹ Eya gbe Eshare re Dia Inene-ri-Kristi uphẹn ọfa ro rhiephiyọ. Isikuru nana yono eya gbe eshare phiyẹ ewena rere Jihova vẹ ukoko rọyen sa reyọ ayen vwọ wian vọnvọn. E jẹ buebun rihwo ri wontọ ni isikuru nana vwo kpẹ asan rẹ a da ma guọnọ ewiowian vwẹ ẹkuotọ rayen. Ọ da dia obo rẹ evo se ru e jẹ ayen kpẹ ẹkuotọ ọrhorha. A je sa vwẹ evo muẹ kerẹ ekobaro roghẹresa vwẹ ọmọke, rere ayen kpẹ asan ri siomanu da ra reyọ owian ruvie na vwo mu.

● A vwẹ Isikuru ri Baibol Vwọkẹ Iniọvo Eshare Re je Rọvwọ-ọn vwo mu vwọ kẹ eyono rẹ ekpako kugbe idibo rowian re je rọvwọ-ọn. Iyovwinreta kerẹ eghwa rẹ ekpako ku­gbe idibo rowian, ẹroevwote rẹ ukoko, kugbe ota-ẹta rẹ azagba eyen e yono vwẹ uyono ­ọtuatuabọ rẹ edijana-ẹreren na. A vwẹ owian kẹ evo nẹ e ga vwẹ ẹkuotọ rayen nurhe. E mi rhe ji efa nẹ e yaran ra ga vwẹ ẹkuotọ-efa.

● Ẹga ri Bẹtẹl she kpahẹn ọwiowian rọ vwẹ oma kpahotọ nẹ ọyen ga vwẹ ọvo usun rẹ oghọn rẹ akon rowian rẹ Iseri ri Jihova. Evo usun rẹ orua ri Bẹtẹl e ga vwẹ asan re de ruẹ ẹbe ra fan ni Baibol rhe. A vwẹ owian rẹ ọchuko kerẹ ẹroevwote rẹ iwevwin kugbe ekuakua yẹrẹ ẹroevwote rẹ ugboma rẹ orua ri Bẹtẹl vwọ kẹ evo. Ewian na eje uphẹn rẹ ẹga ọfuanfon vwọ kẹ Jihova. Vwọba, ihwo rehẹ Bẹtẹl i vwo aghọghọ ayen vwọ riẹn tanẹ kemu kemu rẹ ayen ruẹ ọ vwẹ erere kẹ iniọvo rayen buebun rehẹ akpọ na ejobi.

Ọkiọvo e durhie iniọvo ri vwo ona robọ roghẹresan nẹ e rhe ga vwẹ Bẹtẹl. Dede na, e yono buebun rayen siẹrẹ ayen de te oboyin nu. Ihwo rehẹ Bẹtẹl e ga ọ diẹ ifikirẹ erere rẹ ekuakua-a ẹkẹvuọvo ayen vwo ọdavwaro kpahẹn ọrhuẹrẹphiyotọ rẹ emu ra ria rọherọ, uwevwin ra dia, kugbe imigho ravwọ kayen vwọ dẹ emerọvwọn komobọ. Emeghene ọvo rọhẹ Bẹtẹl dje ẹga rọyen tiọna: “Emu rigbunu! Owian na ghwa lọhọ-ọ, ẹkẹvuọvo ibruphiyọ buebun eyen tevwe obọ me vwọ ga vwẹ etinẹ.”

● Ẹga rẹ akpọeje ọ kẹ ohwo uphẹn revwo vwo obọ vwẹ ebabọn rẹ iwevwin rẹ oghọn sansan kugbe Eguan Ruvie. Idibo rẹ akpọeje, kirobo re se ayen, e yan kpẹ ẹkuotọ efa re phiobọ ba owian rẹ ebabọn. Ọnana oka rẹ ẹga ọfuanfon ọvo, rọ je họhọ owian rẹ ihwo re bọn uwevwinrẹga ri Solomon. (1 Ivie 8:​13-18) Ọrhuẹrẹphiyotọ rẹ ẹroevwo­te rẹ idibo re ga vwẹ akpọeje ọ je họhọ ọrẹ orua ri Bẹtẹl. Didi uphẹn ọyen iniọvo rẹ eshare kugbe erẹ eya vwori rẹ ayen vwọ ga vwẹ ẹbẹre rẹ owian nana vwọ kẹ ujiri ri Jihova!

Vwẹ Ẹwẹn Wẹn Ejobi Ga Jihova

Ravwọ ga Jihova ọyen idjerhe ro me yovwin rẹ wọ reyẹ akpeyeren wẹn ejobi vwo ru. Die sorọ wo rhe vwo ọrhuẹrẹphiyotọ rẹ oboravwọtua romobọ rẹ wọ vwọ ga Ọghẹnẹ ọkieje-e? Wọ vẹ ọsẹ kugbe oni wẹn, ekpako rehẹ ukoko wẹn, kugbe oniruo rẹ okinriariẹ jiroro rẹ ẹga rọkieje na kugbe. Wo de vwo omavwerhovwẹ kpahẹn Bẹtẹl, Isikuru ri Baibol Vwọkẹ Iniọvo Eshare Re je Rọvwọ-ọn, yẹrẹ Isikuru ri Baibol Vwọkẹ Eya gbe Eshare re Dia Inene-ri-Kristi, ki kpẹ emẹvwa rẹ ihwo re guọnọ ra rẹ e ruẹ vwẹ isikoko r’okinriariẹ kugbe eghwẹkoko r’ubrotọ.

A rhọvwere, ọ diẹ ihwoeje iyin se mwuwan yẹrẹ sa ga ọkieje-e. Ọkiọvo ebẹnbẹn rẹ omakpokpọ, ẹdia rẹ igho, kugbe oghwa rẹ orua e sa nẹrhẹ uche rẹ obo rẹ ohwo se ru havwen. Dede na, Inene-ri-Kristi re vwẹ omakpahotọ eje, ovwo obo ro ru wa-an e yan nene iji ri Baibol na: “Guọnọ Ọrovwohwo Ọghẹnẹ wẹn vwẹ udu wẹn ejobi, vwẹ ẹnwẹn wẹn ejobi, kugbe iroro wẹn ejobi.” (Mat. 22:37) Jihova guọnọre nẹ wo ru uche rẹ obo wo se ru eje rẹ ẹdia wẹn kẹwẹ uphẹn nẹ wo ru. Ọtiọyena vwẹ kẹdia kẹdia rẹ wọ hepha ejobi, tẹnrovi ẹga ri Jihova vwẹ evun rẹ akpeyeren wẹn. Vwo ọrhuẹrẹphiyoto rẹ oboravwọtua ru wo se ru. E, “karohọ Ọmema wẹn vwẹ ọke rẹ wọ vwọ eghene na”​—⁠ebruphiyọ kọ dia kẹwẹ bẹdẹ rẹ wo se vwo ru te ọtiọyen na!

Jokpẹnẹ kẹ edjere phia, asan ri nẹ Baibol rhe eje rẹ avwọba tota Baibol Ọfuanfon Na ọyen inurhe.