ẸBẸRE 2
Mavọ Wọ Sa Vwọ Riẹn Ọghẹnẹ Vwọrẹ Uyota?
1, 2. Udje vọ yin djerephia nẹ a guọnọ orọnvwọn ọvo rọ sa chọn avwanre uko vwọ riẹn ẹga ruyota?
MAVỌ avwanre sa vwọ riẹn Ọghẹnẹ? Ofori ravwọ fuẹrẹn iyono rẹ ẹga na eje? Ọ cha bẹn. E de se ru ọtiọyen dede, mavọ avwanre sa vwọ riẹn ọrẹ uyota na?
2 Fikirẹ iyono sansan rẹ ihwo yono kpahen Ọghẹnẹ, kẹ ofori nẹ a guọnọ idjerhe rẹ ihwoeje rhọnvwe phiyọ ra sa vwọ mrẹ uyota na vughe. Kerẹ udje: E gbe dje nẹ ihwo ivẹ phraphro kpahen amwa vwẹ obẹ eki. Ohwo rọ shẹ amwa na nẹ amwa na iyadi erha, jẹ ohwo rọ cha dẹ amwa na siẹ nẹ o te iyadi erha-a. Mavọ yen a sa vwọ riẹn obo rẹ amwa na gron te? Ka vwẹ itepu vwọ ma.
3. Diesorọ e vwo si Baibol na?
3 Orọnvwọn ọvo herọ re se vwo vughe ẹga ruyota? E, ọyehẹ Baibol na. Ọghẹnẹ vwẹ ihwo vwo si Baibol na rere kohwo kohwo sa vwọ riẹn fiotọ. Iduima buebun eyen a teyenphia re. A fan ẹbẹre-ọvo yẹrẹ ọsoso ri Baibol na vwo kpẹ ejajẹ ri te omarẹ 2,600 re. Ihwo buebun ki se se kpahen Ọghẹnẹ vwẹ ejajẹ rayen.
4. Evuẹ vọ yehẹ evunrẹ Baibol na?
4 Baibol na ọyen okẹ ọghanghanre ro nẹ obọ rẹ Ọghẹnẹ rhe. Ọ vuẹ avwanre kpahen erọnvwọn rẹ avwanre ra sa riẹn komobọ-ọ. Ọ vuẹ avwanre kpahen ihwo re dia obodjuvwu. O dje iroro rẹ Ọghẹnẹ, okarohwo rọ hepha, vẹ ọhọre rọyen phia. Ọ vuẹ avwanre kpahen obo rẹ Ọghẹnẹ vẹ ihwo gbe yerin wan ẹgbukpe uriorin buebun re wanre. Ọ tota kpahen erọnvwọn re cha phia vwẹ ọke rọ cha ọbaro na. O ji dje obo ra sa vwọ mrẹ idjerhe ro sun ohwo kpẹ arhọ ri bẹdẹ na.
Oboresorọ Wo Vwo Se Baibol na Gbuyota
5. Udje vọ yin djere phia nẹ Baibol na vẹ erianriẹn okokodo rhọnvwe phiyẹ ohwohwo?
5 Erọnvwọn buebun herọ re sa nẹrhẹ avwanre vwo imwẹro nẹ Baibol na ghini Ota rẹ Ọghẹnẹ. Ọvo rọyen kẹ ọna, Bai_bol na vẹ erianriẹn okokodo rhọnvwe phiyẹ ohwohwo. Vwẹ ọke rẹ awanre, ihwo roro nẹ e mwu akpọ na kpahen orọnvwọn. Kerẹ udje, ihwo evo vwo imwẹro nẹ e mwu akpọ na kpahen eni, efa nẹ e mwuro kpahen ogbeyin. Obo rẹ Baibol na tare vẹ obo rẹ egberianriẹn rakpọ na yonori rhọnvwe phiyẹ ohwohwo, ọvo usun rẹ ihwo ri si Baibol na tare nẹ a “vwẹ akpọ na ya enu rẹ odiodi.”—Job 26:7.
6. Die yen ma kẹ avwanre imwẹro nẹ Baibol na nẹ obọ rẹ Ọghẹnẹ rhẹ?
6 Orugba rẹ aroẹmrẹ ri Baibol ọyen obo rọ ma kẹ avwanre imwẹro nẹ Baibol na ghini nẹ obọ rẹ Ọghẹnẹ rhẹ. Vwọ fẹnẹ ihwo re bọepha, Ọghẹnẹ riẹn obo rẹ obaro na cha dia, kemu kemu rọ tare ruẹgba.
7. Erhọ yen aroẹmrẹ ri Baibol evo ri rugba ọke awanre?
7 Aroẹmrẹ ri Baibol buebun rugba vwẹ ọke awanre. Kerẹ udje, ẹgbukpe 700 e ki rhi vwiẹ Jesu, ọyen Baibol na vwọ ta phiyotọ nẹ orere ri Bẹtlẹhẹm ọyen e de che vwiẹ. Ọtiọyen ọ ghene phia. (Maika 5:2; Matiu 2:3-9) Baibol na je ta nẹ ọmọtobẹ yin che vwiẹ Jesu, a je cha shẹ idọnọ efuanfon ọgban. Aroẹmrẹ yena ji rugba. Ohworakpọ cha sa ta eta tiọna phiyotọ i mi rugba-a!—Aizaya 7:14; Zẹkaraya 11:12, 13; Matiu 1:22, 23; 27:3-5.
8. Erhọ yen aroẹmrẹ ri Baibol evo ri ruẹgba nonẹna, kẹ die yẹn ayen dje phia?
8 Aroẹmrẹ ri Baibol buebun ruẹgba nonẹna. E jẹ e djunute evo:
“Ẹgborho che vrẹn vwọ so ẹgborho, uvie cha vwọ so uvie; otọ che mu kpogho, owẹvwe che fi vwẹ asan buebu kugbe ọtiekọ.”—Luk 21:10, 11.
Imwemwu buebun” cha vọn akpọ na.—Matiu 24:12.
“Vwẹ oba rẹ ẹdẹ na . . . ihwo cha guọnọ omaobọ rẹ ayen nọ, e cha guọnọ igho nọ, . . . i che phuoma nọ, . . . i gbi che mu ọghọ kẹ esẹ vẹ ini-i, . . . e gbi se fue ọhọre rẹ aye-en, . . . ke djoma, ki tuoma rẹ emu esiri, . . . ke guọnọ omavwerhe jẹ ẹguọnọ rẹ Ọghẹnẹ vwo.”—2 Timoti 3:1-5.
Wọ mrẹ erọnvwọn nana re phia nonẹna? Orugba rẹ aroẹmrẹ ri Baibol na djerephia nẹ Baibol na diẹ ọbe ghevweghe-e. Obọ rẹ Ọghẹnẹ ọyẹn o nurhe!—2 Timoti 3:16.
Baibol na Wene Re?
9, 10. Die yin djerephia nẹ Ọghẹnẹ reyẹ uphẹn vwọ kẹ ihworakpọ nẹ i wene Baibol na-a?
9 E gbe dje nẹ wo vwo ikọpini romobọ wẹn, wo de ji si irhi phiyotọ vwọ kẹ ihwo re wiowian kẹ wẹ. Ọ da dianẹ ohwo ọvo ko wene irhi na, die wo che ru? Wọ rha davwẹngba wọ vwọ kpọ ayen vi? Ọtiọyen ọ je hepha, Ọghẹnẹ vwẹ uphẹn kẹ ihwo nẹ i wene Ota rọyen rọ diẹ Baibol na-a.
10 Ihwo re davwẹngba rẹ ayen vwo wene iyono ri Baibol na se phikparobọ-ọ. Avwanre da reyẹ Baibol re vwori nonẹna vwọ vwanvwe i re siri ọke awanre, eje na ọvuọvo. Ọnana djerephia tanẹ Baibol na ji wene-e.