Ukẹcha ro me Yovwin Vwọ kẹ Ihwo ri Vwere Uvweri

NONẸNA IHWO BUEBUN RUẸ EHIAHIẸ KPAHEN ỌMIAOVWẸ RẸ UGHWU RẸ OHWO RE VWO ẸGUỌNỌ KPAHEN. Kirobo ra ta ota kpahen vwẹ uyovwinrota rọ wanre na, uchebro ro me yovwin rẹ egbaerianriẹn vwọphia rhọvwenphiyọ oborẹ Baibol na tare. Ọnana ghwe djephia nẹ uchebro ri Baibol na kpo awanre-e. Baibol na vọnre vẹ uchebro ra sa vwẹroso. O vwo evuẹ rẹ uchebro vwọ kẹ ihwo ri vwere uvweri ra cha sa mrẹ vwẹ asan ọfa-a.

• Imuẹro nẹ ihwo rẹ avwanre vwo ẹguọnọ kpahen ri ghwuru rioja-a

  Baibol na da ta vwẹ Aghwoghwo 9:5 nẹ “ihwo ri ghwuru riẹn emu ọvuọvo-o.” ‘Iroro rẹ ayen jẹre ejobi mi ghwru.’ (Une rẹ Ejiro 146:4) E vwo dje kpo obaro, Baibol na vwẹ ughwu vwo dje ovwerhẹn okokodo.​—Jọn 11:11.

• Esegbuyota ọgangan re vwo kpahen Ọghẹnẹ rẹ ẹguọnọ, nẹrhẹ udu rẹ ohwo gan

  Vwẹ Une rẹ Ejiro 34:​15, Baibol na da ta: “Ẹro rẹ Ọrovwohwoa re nẹ ọvwata, erhọn rọye rhie phihọ kẹ oviẹ rayen.” Ra vwọ ta ẹwẹn avwanre kẹ Jihova vwẹ ẹrhovwo yovwin vrẹ ukẹcha ra mrẹ siẹrẹ e de nene ohwo ọfa ta ota, ọ jẹ chọn avwanre uko vwọ rhuẹrẹ iroro rẹ avwanre phiyọ. Ọ chọn avwanre uko vwọ bọn oyerinkugbe rọ kpẹkpẹre vẹ Ọmemama rẹ avwanre, rọ sa vwẹ ẹgba rọyen vwo bru avwanre uche.

• Omamọ rẹ akpọ re se phi ẹro phiyọ

  Vwẹ ẹwẹn roro ọke rọ cha vwẹ obaro na, ra cha vwọ rhọvwọn ihwo ri ghwuru nẹ ushi! Baibol na ta ota kpahen ọke yena abọ buebun, ro vwo dje oborẹ akpọ na cha dia. Ọ tare nẹ Ọghẹnẹ “che rien ameoviẹ eje vwo nẹ ẹro [avwanre], ughwu rha cha dia ọfa-a, uvweri yẹrẹ oviẹ yẹrẹ ọmiaovwẹ rha cha dia ọfa-a.”​—Ẹvwọphia 21:​3, 4.

Ihwo ri vwo esegbuyota kpahen Jihova rọ dia Ọghẹnẹ ro vwo Baibol na mrẹ ẹgba rẹ ayen vwo yerin ghene uvweri, kidie ayen phi ẹro phiyọ evrẹnushi na. Kerẹ udje, Ann rẹ ọshare rọyen rọhẹ ẹgbukpe 65 ghwu jovwo da ta: “Baibol na kẹ vwẹ imuẹro nẹ ihwo rẹ avwanre ri ghwure rioja-a, Ọghẹnẹ cha rhọvwọn ihwo eje rehẹ evunrẹ ẹkarophiyọ rọyen. Uyota nana yen cha ẹwẹn mẹ kọke kọke mi de roro kpahen ughwu rẹ ọshare mẹ na, ọtiọyena, kọ nẹrhẹ mi yerin ghene ughwu rẹ ọshare mẹ na, rọ dia obo re ma bra kparobọ rọ phia kẹ vwẹ re!”

Tiina ra ta ota kpahen vwẹ ọvo usun rẹ iyovwinrota nana da ta: “Me mrẹ ukẹcha rẹ Ọghẹnẹ rhanvwẹ ọke rẹ ọmọshare mẹ Timo vwo ghwu. Jihova chọn vwẹ uko mamọ vwẹ ọke rẹ ukpokpogho mẹ. Mi vwo imuẹro ọgangan kpahen ive rẹ evrẹnushi rọhẹ Baibol na. Ive nana bọn vwẹ gan je chọn vwẹ uko vwo chirakon rhi te ọke re me cha vwọ rhoma mrẹ Timo.”

Eta nana yen ihwo uriorin buebun ri vwo imuẹro nẹ a sa vwẹroso Baibol na je ta. Ọ da tobọ dianẹ wo nẹ ive ri Baibol na phiyọ evwerhẹn ghevweghe yẹrẹ obo re dia uyota-a, wọ sa hiẹ guọnọ erọnvwọn ri djerephia nẹ uchebro vẹ ive rehẹ evun rọyen eje muẹro. Ọnana sa nẹrhẹ wọ mrẹ nẹ ukẹcha ro me yovwin kparobọ ra sa vwọ kẹ ihwo ri vwere uvweri nẹ Baibol na rhe.

YONO KPOBAROPHIYỌ KPAHEN IPHIẸROPHIYỌ VWỌ KẸ IHWO RI GHWURU

Ni ividio sansan ri shekpahọn vwẹ wẹbsaiti rẹ avwanre, jw.org

ẸDIA VỌ YEN IHWO RI GHWURU HEPHA?

Die yen phia kẹ avwanre siẹrẹ avwanre de ghwu? Ẹkpahọnphiyọ ro fiotọ ri Baibol na vwọphia vọnre vẹ ọbọngan kugbe onẹrhẹvwe

Kpo ẸBE VẸ ERỌNVWỌN EFA > IVIDIO (Ẹbẹre rẹ Ividio: BAIBOL NA)

WỌ GUỌNỌ NYO IYẸNRẸN ESIRI?

Tivọ yen wọ da sa mrẹ iyẹnrẹn esiri dede nẹ erharhe iyẹnrẹn vọn asan eje?

Kpo IYONO RẸ BAIBOL > UFUOMA VẸ OMAVWERHOVWẸN