10 Ẹroẹvwọsuọ

OBORẸ O MUDIAPHIYỌ

Esẹ vẹ ini, igbeyan kugbe ihwo ra wiowian kẹ vwẹroso ihwo re ta uyota. Ayen yan nene irhi, ruẹ nene ive rayen, je ta uyota ọkieje.

OBORESORỌ Ọ VWỌ GHANRE

Vwẹ ọke sansan, fikirẹ uyota ru wọ ta ọkieje yen nẹrhẹ wo vwo ugbomọphẹ buebun.

“Idjerhe ro me yovwin rẹ ọsẹ vẹ oni sa vwọ vwẹroso owẹ, ọyen wo vwo djephia nẹ wọ ghwanre tedje, ọ dianẹ ọke wẹ vẹ ayen da herọ ọvo-o, ẹkẹvuọvo ji te ọke wẹ ọvo da herọ.”—Sarahi.

UCHEBRO RI BAIBOL: “Wa davwe oma rẹ ovwan.”—2 Kọrẹnt 13:5.

OBO WO SE RU

Tẹ ọ dianẹ wọ guọnọ nẹ a rhoma vwẹroso wẹ yẹrẹ a nabọ vwẹroso wẹ phiyọ, owọẹjẹ nana sa chọn wẹ uko.

Dia ohwo rẹ uyota. Wo de gun efian ihwo rha cha vwẹroso wẹ-ẹ. Wo de rhievun ta uyota, ma rho wọ da rhọnvwe echobọ wẹn, ọ cha nẹrhẹ ihwo efa vwẹroso wẹ.

“Erọnvwọn de shephiyọ ọ lọhọ a vwọ dia ohwo rẹ uyota. Ẹkẹvuọvo, wọ da ta uyota ọke obọ da chọ wẹ vwo ru orọnvwọn, ọ nẹrhẹ ihwo efa vwẹroso wẹ.”—Caiman.

UCHEBRO RI BAIBOL: “Guọnọ ruẹ emu rẹ ọghọ vwi kemu kemu ejobi.”—Hibru 13:18.

Dia ohwo ra vwẹrosua. Ehiahiẹ ọvo re ruru vwẹ America djerephia nẹ orọnvwọn ọvo kiriguo ra guọnọ mie ohwo rọ cha wian vwẹ ikọpini yen, ọ cha dia ohwo ra vwẹrosua. A vwọ dia ohwo ra vwẹrosua enẹna che fierere kẹ wẹ ọke wo de te omiragua re.

“Ọsẹ vẹ oni mẹ vwo oniso royen ọke me da wiowian ro te vwe vwẹ uwevwin jẹ ọ dianẹ ayen karophiyọ ovwẹ tavwe-en. Mi de ruo ọnana ọkieje, ọ nẹrhẹ ayen vwẹroso ovwẹ phiyọ.”—Sarah.

UCHEBRO RI BAIBOL: “Me vwẹ ẹro so nẹ wo se mu ọghọ nana kẹ vwẹ, o mu vwe ẹro nẹ wo ru nọ obo re me tare na.”—Filimọn 21.

Vwo odirin. Vwọ fẹnẹ oborẹ ugboma na rhua wan, rọ dia oborẹ ihwo me nẹ sua, ọ guọnọ ọke e ki se vwo oniso rẹ ohwo rọ ghwanre tedje re.

“Wọ rhẹro rọyen nẹ ọsẹ vẹ oni wẹn kugbe ihwo efa cha vwẹroso wẹ kidie nẹ wọ ta uyota abọvo-o. Ẹkẹvuọvo, ayen sa vwẹroso wẹ ọ da dianẹ wọ ta uyota ọkeneje.”—Brandon.

UCHEBRO RI BAIBOL: “Ovwan gba vwẹ . . . odiri” vwo rhuo oma.—Kọlose 3:12.