کرغزستان کی سیر

کرغزستان برف‌پوش پہاڑوں سے گِھری سرزمین ہے۔ یہ وسطی ایشیا میں واقع ہے اور اِس کی سرحد قازقستان، اُزبکستان، تاجکستان اور چین سے ملی ہوئی ہے۔ اِس ملک کا 90 فیصد حصہ پہاڑوں سے گِھرا ہوا ہے۔ کرغزستان کو یہ اعزاز بھی حاصل ہے کہ تیان‌شان کے پہاڑی سلسلے کی سب سے اُونچی چوٹی یہاں واقع ہے جو سطح سمندر سے 7439 میٹر (‏24 ہزار 406 فٹ)‏ بلند ہے۔ کرغزستان کا تقریباً 4 فیصد حصہ جنگلات پر مشتمل ہے۔ دلچسپی کی بات ہے کہ پوری دُنیا میں اخروٹ کے جو بڑے بڑے قدرتی جنگلات پائے جاتے ہیں، اُن میں سے ایک کرغزستان میں ہے۔‏

کرغزستان کے لوگ مہمان‌نوازی اور دوسروں کی عزت کرنے کے لیے مشہور ہیں۔ وہ بڑوں کو بہت احترام سے مخاطب کرتے ہیں، سفر کے دوران اُنہیں اپنی سیٹ دے دیتے ہیں اور کھانے کی میز پر اُنہیں سب سے اہم جگہ پر بٹھاتے ہیں۔‏

عام طور پر لوگوں کے تین یا اِس سے زیادہ بچے ہوتے ہیں۔ عموماً سب سے چھوٹا بیٹا شادی کے بعد بھی اپنے ماں باپ کے ساتھ رہتا ہے اور بڑھاپے میں اُن کا خیال رکھتا ہے۔‏

چھوٹی عمر سے ہی لڑکیوں کو گھر کے کام‌کاج اور ہنر سکھائے جاتے ہیں تاکہ وہ اچھی بیویاں ثابت ہوں۔ 15 یا 16 سال کی عمر تک لڑکیاں گھر چلانے کے لیے پوری طرح تیار ہو جاتی ہیں۔ عام طور پر دُلہنوں کے لیے جہیز تیار کِیا جاتا ہے جس میں بستر، کپڑے اور ہاتھ کا بنا قالین شامل ہوتا ہے۔ دُلہا پیسوں اور مویشیوں کی شکل میں دُلہن کی قیمت ادا کرتا ہے۔‏

مختلف تقریبوں اور جنازوں پر ایک بھیڑ یا گھوڑے کو ذبح کِیا جاتا ہے۔ پھر اِس کے مختلف حصے کیے جاتے ہیں اور ہر شخص کے لیے ایک ایک حصہ رکھا جاتا ہے۔ یہ حصہ مہمانوں کی عمر اور مرتبے کے مطابق اُنہیں دیا جاتا ہے۔ اِس رواج میں بھی سب کے لیے احترام ظاہر کِیا جاتا ہے۔ پھر کرغزستان کا قومی کھانا بیش‌بارماک پیش کِیا جاتا ہے جسے ہاتھوں سے کھایا جاتا ہے۔‏