یہوواہ سے دوبارہ دوستی کریں

ہر سال یہوواہ کی بہت سی بھٹکی ہوئی بھیڑیں اُس کے گلّے یعنی کلیسیا میں واپس آ جاتی ہیں۔ ذرا تصور کریں کہ ہر بھیڑ کے لوٹنے پر ’‏آسمان میں کتنی خوشی‘‏ منائی جاتی ہے!‏ (‏لُو 15:‏7،‏ 10‏)‏ اگر آپ کلیسیا میں بحال ہو گئے ہیں تو اِس بات کا پکا یقین رکھیں کہ یسوع مسیح، فرشتے اور یہوواہ خدا اِس بات پر بہت خوش ہیں کہ آپ دوبارہ سے کلیسیا کا حصہ بن گئے ہیں۔ لیکن اب جب آپ یہوواہ کے ساتھ اپنی دوستی کو مضبوط کر رہے ہیں تو آپ کو کچھ مشکلوں کا سامنا ہو سکتا ہے۔ اِن میں سے کچھ مشکلیں کیا ہیں اور آپ اِن سے کیسے نمٹ سکتے ہیں؟‏

آپ کو کن مشکلوں کا سامنا ہو سکتا ہے؟‏

بہت سے بہن بھائی یہوواہ کی طرف لوٹ آنے کے بعد بھی بڑے تکلیف‌دہ احساسات سے لڑ رہے ہیں۔ بادشاہ داؤد کے ساتھ بھی ایسا ہی ہوا۔ حالانکہ خدا نے اُنہیں اُن کے گُناہوں کے لیے معاف کر دیا تھا لیکن پھر بھی اُنہوں نے کہا:‏ ”‏مَیں اپنی غلطیوں کے بوجھ تلے دب گیا ہوں۔“‏ (‏زبور 40:‏12؛‏ زبور 65:‏3‏، ترجمہ نئی دُنیا‏)‏ جب یہوواہ سے دُور ہو جانے والا کوئی شخص اُس کے پاس لوٹ آتا ہے تو ہو سکتا ہے کہ شرمندگی اور پچھتاوے کا احساس اُس کے دل سے نہ جائے۔ ذرا بہن ایزابیلا کی بات پر غور کریں۔‏a وہ 20 سال سے زیادہ عرصے تک کلیسیا سے خارج رہیں۔ وہ کہتی ہیں:‏ ”‏مجھے اِس بات پر یقین کرنا بہت مشکل لگ رہا تھا کہ یہوواہ مجھے کبھی معاف کرے گا۔“‏ یاد رکھیں کہ اگر آپ بے‌حوصلہ ہو جائیں گے تو یہوواہ کے ساتھ آپ کی دوستی پھر سے کمزور پڑ جائے گی۔ (‏امثا 24:‏10‏)‏ پوری کوشش کریں کہ ایسا نہ ہو۔‏

کچھ بہن بھائی اِس بات سے گھبراتے ہیں کہ وہ اُن سب کاموں کو نہیں کر پائیں گے جن سے وہ یہوواہ کے ساتھ پھر سے دوستی کر سکتے ہیں۔ کلیسیا میں لوٹ آنے کے بعد انٹونی نامی بھائی نے کہا:‏ ”‏مَیں نے محسوس کِیا کہ مَیں بہت سی ایسی باتیں بھول گیا تھا جو مَیں نے ایک گواہ ہوتے ہوئے سیکھی تھیں۔“‏ اِس طرح کے احساسات کی وجہ سے کچھ لوگ دوبارہ سے پورے جی جان سے یہوواہ کی عبادت کرنے سے گھبراتے ہیں۔‏

مگر ذرا اِس مثال پر غور کریں۔ اگر ایک شخص کا گھر طوفان میں تباہ ہو جائے تو ہو سکتا ہے کہ وہ یہ سوچ کر گھبرا جائے کہ اِسے دوبارہ تعمیر کرنے میں بہت وقت اور محنت لگے گی۔ اِسی طرح اگر سنگین گُناہ کرنے کی وجہ سے یہوواہ کے ساتھ آپ کی دوستی تباہ ہو گئی ہے تو شاید آپ یہ سوچ کر گھبرا جائیں کہ اِسے دوبارہ قائم کرنے کے لیے آپ کو بہت محنت کرنی پڑے گی۔ لیکن ڈریں مت، اِس سلسلے میں آپ کو بہت سے طریقوں سے مدد مل سکتی ہے۔‏

یہوواہ خدا ہمیں یہ دعوت دیتا ہے:‏ ”‏آؤ، ہم آپس میں معاملہ سلجھا لیں۔“‏ (‏یسع 1:‏18‏، ترجمہ نئی دُنیا‏)‏ آپ پہلے ہی معاملے کو حل کرنے کے لیے کافی محنت کر چُکے ہیں۔ اور یہوواہ آپ کی اِس محنت کی بہت قدر کرتا ہے۔ ذرا سوچیں کہ یہوواہ کے پاس لوٹ آنے سے آپ نے اُسے یہ موقع دیا ہے کہ وہ اپنے دُشمن شیطان کو مُنہ توڑ جواب دے۔—‏امثا 27:‏11‏۔‏

یہوواہ کے پاس لوٹنے سے آپ پہلے ہی اُس کے قریب آ چُکے ہیں اور اُس نے یہ وعدہ کِیا ہے کہ وہ بھی آپ کے قریب آ جائے گا۔ (‏یعقو 4:‏8‏)‏ یہ بہت اچھی بات ہے کہ سب لوگ یہ دیکھیں کہ آپ کلیسیا میں واپس آ گئے ہیں۔ لیکن آپ کو اِس سے بھی بڑھ کر کچھ کرنے کی ضرورت ہے۔ آپ کو اپنے دل میں اپنے باپ اور دوست یہوواہ کے لیے محبت بڑھاتے رہنے کی ضرورت ہے۔ آپ ایسا کیسے کر سکتے ہیں؟‏

ایسے منصوبے بنائیں جنہیں آپ پورا کر سکیں

یہوواہ سے دوستی مضبوط کرنے کے لیے ایسے منصوبے بنائیں جنہیں آپ پورا بھی کر سکیں۔ بے‌شک آپ کو ابھی بھی یاد ہوگا کہ آپ نے یہوواہ اور فردوس کے حوالے سے اُس کے وعدوں کے بارے میں کیا سیکھا تھا۔ لیکن اب آپ کو یہوواہ کی عبادت کے لیے دوبارہ سے اچھا معمول قائم کرنے کی ضرورت ہے۔ مثال کے طور پر آپ کو باقاعدگی سے مُنادی کرنے، اِجلاسوں پر جانے اور بہن بھائیوں کے ساتھ وقت گزارنے کی ضرورت ہے۔ کیوں نہ اپنے لیے یہ منصوبے بنائیں:‏

باقاعدگی سے یہوواہ سے دُعا کریں۔‏ آپ کا آسمانی باپ جانتا ہے کہ شرمندگی کے بوجھ کی وجہ سے آپ کے لیے اُس سے دُعا کرنا مشکل ہو سکتا ہے۔ (‏روم 8:‏26‏)‏ لیکن پھر بھی ”‏دُعا کرنے میں لگے رہیں۔“‏ یہوواہ کو بتائیں کہ آپ اُس سے دوستی کرنے کی شدید خواہش رکھتے ہیں۔ (‏روم 12:‏12‏)‏ آندرے نامی بھائی بتاتے ہیں:‏ ”‏مجھ پر شرمندگی اور پچھتاوا حاوی ہونے لگتا تھا۔ لیکن ہر بار جب مَیں دُعا کرتا تھا تو مَیں بہتر محسوس کرتا تھا۔ مجھے اَور زیادہ ذہنی سکون مل جاتا تھا۔“‏ اگر آپ کو یہ سمجھ نہیں آتا کہ دُعا میں کیا کہیں تو بادشاہ داؤد کی دُعاؤں پر غور کریں جو اُنہوں نے اپنے گُناہوں کی معافی مانگنے کے لیے کیں۔ یہ دُعائیں 51 زبور اور 65 زبور میں لکھی ہیں۔‏

باقاعدگی سے بائبل کا مطالعہ کریں۔‏ ایسا کرنے سے آپ کا ایمان مضبوط ہوگا اور آپ کے دل میں یہوواہ کے لیے محبت بڑھے گی۔ (‏زبور 19:‏7-‏11‏)‏ اِس سلسلے میں ذرا فلپ نامی بھائی کی بات پر غور کریں جو کہتے ہیں:‏ ”‏مَیں باقاعدگی سے بائبل کا مطالعہ نہیں کرتا تھا اِس لیے میرا ایمان کمزور پڑ گیا اور مَیں یہوواہ کا دل دُکھا بیٹھا۔ مَیں یہ غلطی دوبارہ نہیں کرنا چاہتا تھا۔ اِس لیے مَیں نے باقاعدگی سے بائبل کا مطالعہ کرنے کا فیصلہ کِیا۔“‏ آپ بھی ایسا ہی کر سکتے ہیں۔ اگر آپ یہ جاننا چاہتے ہیں کہ آپ ذاتی مطالعے کے دوران کس کس موضوع پر غور کر سکتے ہیں تو کسی ایسے دوست سے مدد مانگیں جس کی یہوواہ کے ساتھ دوستی مضبوط ہے۔‏

بہن بھائیوں سے دوبارہ دوستی کریں۔‏ کلیسیا میں لوٹنے والے کچھ بہن بھائیوں کو یہ فکر ستاتی ہے کہ دوسرے بہن بھائی اُن کے بارے غلط باتیں سوچیں گے۔ لاریسا نامی بہن کہتی ہیں:‏ ”‏مجھے بڑی شرمندگی ہوتی تھی۔ مجھے لگتا تھا جیسے مَیں نے کلیسیا کو دھوکا دیا ہے۔ اِن احساسات نے کافی سالوں تک میرا پیچھا نہیں چھوڑا۔“‏ اِس بات کا یقین رکھیں کہ بزرگ اور دوسرے پُختہ مسیحی دل سے آپ کی مدد کرنا چاہتے ہیں تاکہ آپ دوبارہ سے یہوواہ کے ساتھ دوستی کریں۔ (‏بکس ”‏بزرگ کیا کر سکتے ہیں؟‏‏“‏ کو دیکھیں۔)‏ وہ بہت خوش ہیں کہ آپ کلیسیا میں لوٹ آئے ہیں اور وہ چاہتے ہیں کہ آپ بھی اِس بات سے خوش ہوں۔—‏امثا 17:‏17‏۔‏

آپ کلیسیا کے بہن بھائیوں کے قریب کیسے جا سکتے ہیں؟ اُن کے ساتھ ہر اِجلاس میں شامل ہوں اور باقاعدگی سے اُن کے ساتھ مل کر مُنادی کریں۔ اِس سے آپ کو کیا فائدہ ہوگا؟ ذرا فیلکس نامی بھائی کی بات پر غور کریں۔ اُنہوں نے کہا:‏ ”‏کلیسیا میرے لوٹنے کی راہ دیکھ رہی تھی۔ مَیں نے اُن کی محبت کو محسوس کِیا۔ اُنہوں نے میری مدد کی تاکہ مَیں پھر سے خود کو کلیسیا کا حصہ سمجھوں، اِس بات کا یقین رکھوں کہ یہوواہ نے مجھے معاف کر دیا ہے اور دوبارہ سے اُس کی عبادت کروں۔“‏—‏بکس ”‏آپ کیا کر سکتے ہیں؟‏‏“‏ کو دیکھیں۔‏

ہمت نہ ہاریں!‏

جب آپ یہوواہ سے دوبارہ دوستی کریں گے تو شیطان آپ کے عزم کو کمزور کرنے کے لیے آپ کے سامنے ایک کے بعد ایک مشکل کھڑی کرے گا۔ (‏لُو 4:‏13‏)‏ لیکن یہوواہ کے ساتھ اپنی دوستی کو مضبوط کرنے سے آپ اِن مشکلوں کا ڈٹ کر سامنا کر پائیں گے۔‏

یہوواہ نے اپنی بھیڑوں کے بارے میں یہ وعدہ کِیا ہے:‏ ”‏مَیں گم‌شُدہ کی تلاش کروں گا اور خارج‌شُدہ کو واپس لاؤں گا اور شکستہ کو باندھوں گا اور بیماروں کو تقویت دوں گا۔“‏ (‏حِز 34:‏16)‏ یہوواہ نے بہت سے بہن بھائیوں کی مدد کی ہے تاکہ وہ اُس سے دوبارہ دوستی کر سکیں۔ اِس بات کا پکا یقین رکھیں کہ وہ آپ کی بھی مدد کرنا چاہتا ہے تاکہ آپ اُس کے ساتھ پکی دوستی قائم کر سکیں۔‏