خدا کی بادشاہت کیا ہے؟‏

پاک کلام کا جواب

‏”‏خدا ایک ایسی بادشاہت قائم کرے گا جو کبھی تباہ نہ ہوگی۔“‏—‏دانی‌ایل 2:‏44‏، نیو اُردو بائبل ورشن۔‏

‏”‏ہم کو ایک بیٹا بخشا گیا اور سلطنت اُس کے کندھے پر ہوگی۔“‏—‏یسعیاہ 9:‏6‏، اُردو ریوائزڈ ورشن۔‏

اِس جواب کا آپ کی زندگی پر اثر

• خدا کی حکومت آپ کو ذاتی طور پر فائدہ پہنچا سکتی ہے۔—‏یسعیاہ 48:‏17، 18‏۔‏

• مستقبل میں آپ دُکھ‌درد سے پاک زندگی گزار سکیں گے۔—‏مکاشفہ 21:‏3، 4‏۔‏

آپ پاک کلام کے جواب پر یقین کیوں رکھ سکتے ہیں؟‏

اِس کی کم سے کم دو وجوہات ہیں:‏

• یسوع مسیح نے ظاہر کِیا کہ خدا کی بادشاہت کیا کرے گی۔‏ اُنہوں نے اپنے پیروکاروں کو سکھایا کہ وہ دُعا کریں کہ خدا کی بادشاہت آئے اور خدا کی مرضی زمین پر ہو۔ (‏متی 6:‏9، 10‏)‏ یسوع مسیح نے اپنے کاموں سے ظاہر کِیا کہ جب یہ دُعا پوری ہوگی تو لوگوں کو کیا فائدے ہوں گے۔‏

  جب یسوع مسیح زمین پر تھے تو اُنہوں نے ہزاروں لوگوں کو کھانا کھلایا، بیماروں کو ٹھیک کِیا اور مُردوں کو زندہ کِیا۔ (‏متی 15:‏29-‏38؛‏ یوحنا 11:‏38-‏44‏)‏ اِس طرح اُنہوں نے ظاہر کِیا کہ وہ خدا کی بادشاہت کے بادشاہ بن کر اپنی رعایا کی زندگی خوشیوں سے بھر دیں گے۔—‏مکاشفہ 11:‏15‏۔‏

• دُنیا کے حالات سے ثابت ہوتا ہے کہ خدا کی بادشاہت بہت جلد زمین پر حکمرانی شروع کرے گی۔‏ یسوع مسیح نے پیش‌گوئی کی تھی کہ خدا کی بادشاہت کے آنے سے پہلے زمین پر بہت زیادہ جنگیں ہوں گی، قحط پڑیں گے اور زلزلے آئیں گے۔—‏متی 24:‏3،‏ 7‏۔‏

  آج ہم اپنی آنکھوں سے زمین پر ایسے حالات دیکھ رہے ہیں۔ اِس لیے ہم یقین رکھ سکتے ہیں کہ خدا کی بادشاہت بہت جلد تمام مسائل کو حل کر دے گی۔‏