مَیں سیکس کرنے کے دباؤ کا سامنا کیسے کروں؟‏

آپ کیا کرتے؟‏

ذرا اِس صورتحال کا تصور کریں:‏ صوفیہ اور مائیک کی دوستی ہوئے صرف دو مہینے ہی ہوئے ہیں لیکن صوفیہ کو لگتا ہے کہ وہ مائیک کو صدیوں سے جانتی ہے۔ وہ ہر وقت ایک دوسرے کو میسج بھیجتے رہتے ہیں اور گھنٹوں فون پر باتیں کرتے ہیں۔ اُنہیں لگتا ہے کہ وہ ایک دوسرے کو اچھی طرح سمجھتے ہیں۔ لیکن اب مائیک، صوفیہ سے کچھ اَور چاہتا ہے۔‏

پچھلے دو مہینوں کے دوران وہ دونوں صرف ایک دوسرے کا ہاتھ پکڑتے تھے اور کبھی کبھار کس بھی کر لیتے تھے۔ صوفیہ اِس سے آگے نہیں بڑھنا چاہتی۔ لیکن وہ مائیک کو کھونا بھی نہیں چاہتی۔ مائیک اُسے کہتا ہے کہ وہ بہت خوب‌صورت ہے اور اُس کے بغیر اُس کی زندگی ادھوری ہے۔ وہ خود بھی محسوس کرتی ہے کہ مائیک اور وہ ایک دوسرے سے سچا پیار کرتے ہیں۔‏

اگر آپ کی عمر ڈیٹنگ کرنے کی ہوتی اور آپ کو صوفیہ جیسی صورتحال کا سامنا ہوتا تو آپ کیا کرتے؟‏

ذرا رُکیں اور سوچیں!‏

اگر آپ درخت سے چھلانگ لگا کر اُڑنے کی کوشش کریں گے تو آپ کششِ‌ثقل کے قانون کو توڑ رہے ہوں گے اور اِس سے آپ کو نقصان ہوگا۔ اِسی طرح اگر آپ سیکس کرنے کے بارے میں خدا کا قانون توڑیں گے تو آپ کو بہت نقصان ہوگا۔ خدا کا قانون یہ ہے:‏ ”‏حرام‌کاری سے گریز کریں۔“‏—‏1-‏تھسلُنیکیوں 4:‏3‏۔‏

اِس قانون کو توڑنے کے نقصان کیا ہیں؟ خدا کے کلام میں لکھا ہے:‏ ”‏جو شخص حرام‌کاری کرتا ہے، وہ اپنے ہی جسم کے خلاف گُناہ کرتا ہے۔“‏ (‏1-‏کُرنتھیوں 6:‏18‏)‏ اِس بات کا کیا مطلب ہے؟‏

ماہرین کا کہنا ہے کہ جو نوجوان شادی سے پہلے سیکس کر لیتے ہیں، اُنہیں عموماً بہت سے بُرے نتائج کا سامنا کرنا پڑتا ہے جیسے کہ .‏ .‏ .‏

• پچھتاوا۔‏ بہت سے نوجوان جنہوں نے شادی سے پہلے سیکس کِیا، وہ بعد میں اپنی اِس حرکت پر بہت پچھتائے۔‏

• شک۔‏ شادی سے پہلے سیکس کرنے والے لڑکے لڑکیاں جس کے ساتھ سیکس کرتے ہیں، اُس کے بارے میں اکثر یہ سوچتے ہیں:‏ ”‏پتہ نہیں، اِس نے اَور کس کس کے ساتھ سیکس کِیا ہوگا؟“‏

• مایوسی۔‏ بہت سی لڑکیاں یہ چاہتی ہیں کہ اُنہیں کوئی ایسا لڑکا ملے جو اُن کی عزت کی حفاظت کرے نہ کہ اِسے لوٹ لے۔ اور بہت سے لڑکے ایسی لڑکی کو پسند نہیں کرتے جو اُن کے ساتھ سیکس کرنے کے لیے بڑی آسانی سے تیار ہو جاتی ہے۔‏

• ایک اہم حقیقت:‏ اگر آپ شادی سے پہلے سیکس کر لیتے ہیں تو آپ اپنے جسم کو بے‌عزت کرتے ہیں۔ (‏رومیوں 1:‏24‏)‏ آپ کا جسم کوئی کھلونا نہیں ہے جس سے  جو چاہے کھیل لے۔‏

‏”‏حرام‌کاری سے گریز“‏ کرنے سے ظاہر کریں کہ آپ مضبوط کردار کے مالک ہیں۔ (‏1-‏تھسلُنیکیوں 4:‏3‏)‏ جب آپ کی شادی ہوگی تو آپ اپنے جیون ساتھی کے ساتھ جنسی تعلقات قائم کر سکیں گے۔ اور آپ کو اُن لوگوں کی طرح پریشانی، شرمندگی اور خوف محسوس نہیں ہوگا جو شادی سے پہلے ہی سیکس کر لیتے ہیں۔—‏امثال 7:‏22، 23؛‏ 1-‏کُرنتھیوں 7:‏3‏۔‏

آپ کا کیا خیال ہے؟‏

• اگر کوئی آپ سے سچی محبت کرتا ہے تو کیا وہ آپ کو جسمانی یا جذباتی طور پر نقصان پہنچائے گا؟‏

• اگر کوئی واقعی آپ سے پیار کرتا ہے تو کیا وہ یہ چاہے گا کہ خدا کے ساتھ آپ کی دوستی ٹوٹ جائے؟—‏عبرانیوں 13:‏4‏۔‏