پولس رسول کے خطوط

مسیحی کلیسیا کو یہوواہ خدا کی مرضی پوری کرنے کے سلسلے میں ایک اہم کردار ادا کرنا تھا۔ لیکن پہلی صدی کے مسیحیوں کو جلد ہی مشکلات کا سامنا کرنا پڑا۔ اُنہیں نہ صرف مخالفوں کے ہاتھ اذیت کا نشانہ بنایا گیا بلکہ کلیسیا میں بھی مسئلے پیدا ہو گئے۔ کیا وہ اِن مشکلات کا سامنا کرتے وقت خدا کے وفادار رہتے؟ بائبل کے یونانی صحائف میں ۲۱ خطوط شامل ہیں جن میں مسیحیوں کی حوصلہ‌افزائی اور اصلاح کی جاتی ہے۔‏

اِن خطوط میں سے ۱۴ خط (‏یعنی رومیوں سے لے کر عبرانیوں تک)‏ پولس رسول نے لکھے تھے۔ اِن میں سے کئی خطوط ایک شخص کے نام اور کئی ایک کلیسیا کے نام تھے۔ آئیں پولس رسول کے خطوط میں پائے جانے والے چند نکات پر غور کریں۔‏

چال‌چلن کے سلسلے میں ہدایات۔‏ جو لوگ حرامکاری، زِناکاری اور دوسرے سنگین گُناہ کرتے ہیں وہ ”‏خدا کی بادشاہی کے وارث نہ ہوں گے۔“‏ (‏گلتیوں ۵:‏۱۹-‏۲۱؛‏ ۱-‏کرنتھیوں ۶:‏۹-‏۱۱‏)‏ خدا کے خادم چاہے جس قوم سے بھی تعلق رکھتے ہوں اُن میں اتحاد ہونا چاہئے۔ (‏رومیوں ۲:‏۱۱؛‏ افسیوں ۴:‏۱-‏۶‏)‏ اُنہیں خوشی سے اپنے مسیحی بہن‌بھائیوں کی مدد کرنی چاہئے۔ (‏۲-‏کرنتھیوں ۹:‏۷‏)‏ پولس رسول نے تاکید کی کہ ”‏بِلاناغہ دُعا کرو۔“‏ خدا کے خادم ہر اُس بات کے بارے میں یہوواہ خدا سے دُعا کر سکتے ہیں جو اُن کے دل میں ہے۔ (‏۱-‏تھسلنیکیوں ۵:‏۱۷؛‏ ۲-‏تھسلنیکیوں ۳:‏۱؛‏ فلپیوں ۴:‏۶، ۷‏)‏ خدا ہماری دُعاؤں کو صرف اُس صورت میں قبول کرتا ہے جب ہم اِس بات پر ایمان رکھتے ہیں کہ وہ ہماری سنے گا۔—‏عبرانیوں ۱۱:‏۶‏۔‏

پولس رسول نے گھریلو زندگی کے بارے میں بھی ہدایات دیں۔ مثال کے طور پر شوہر کو اپنی بیوی سے اتنی محبت رکھنی چاہئے جنتی کہ وہ اپنے بدن سے رکھتا ہے۔ بیوی کو اپنے شوہر کا احترام کرنا چاہئے۔ بچوں کو اپنے والدین کے فرمانبردار رہنا چاہئے کیونکہ اِس سے خدا خوش ہوتا ہے۔ والدین کو چاہئے کہ وہ خدا کے معیاروں کے مطابق بڑے پیار سے اپنے بچوں کی تربیت اور اصلاح کریں۔—‏افسیوں ۵:‏۲۲–‏۶:‏۴؛‏ کلسیوں ۳:‏۱۸-‏۲۱‏۔‏

موسیٰ کی شریعت کا مقصد۔‏ خدا نے بنی‌اسرائیل کو شریعت اِس لئے دی تاکہ مسیح کے آنے تک اُن کی راہنمائی ہو اور وہ بُرے اثرات سے محفوظ رہیں۔ (‏گلتیوں ۳:‏۲۴‏)‏ لیکن مسیحی موسیٰ کی شریعت کے پابند نہیں ہیں۔ پولس رسول نے عبرانیوں کے نام اپنے خط میں اِس بات کی وضاحت کی۔ اُس نے یہ خط ایسے مسیحیوں کے لئے لکھا جو پہلے یہودی مذہب سے تعلق رکھتے تھے۔ پولس رسول نے بتایا کہ خدا نے شریعت کس مقصد کے لئے نازل کی اور وہ اپنی مرضی یسوع مسیح کے ذریعے کیسے پوری کرے گا۔ پولس رسول نے یہ بھی بتایا کہ شریعت کے مختلف پہلوؤں میں آنے والی چیزوں کی جھلک پائی جاتی ہے۔ مثال کے طور پر جانوروں کی قربانیوں نے یسوع مسیح کی قربانی کی طرف اشارہ کِیا۔ اِس قربانی کی بِنا پر گُناہوں کی معافی ممکن ہے۔ (‏عبرانیوں ۱۰:‏۱-‏۴‏)‏ یسوع مسیح کی موت کے وقت یہوواہ خدا نے موسیٰ کی شریعت کو مٹا دیا کیونکہ اب اُس کی ضرورت نہ رہی تھی۔—‏کلسیوں ۲:‏۱۳-‏۱۷؛‏ عبرانیوں ۸:‏۱۳‏۔‏

کلیسیا کے انتظام کے سلسلے میں ہدایات۔‏ جن آدمیوں کو کلیسیا میں ذمہ‌داریاں سونپی جاتی ہیں اُن کا چال‌چلن مثالی ہونا چاہئے اور اُنہیں بائبل میں دی گئی شرائط پر پورا اُترنا چاہئے۔ (‏۱-‏تیمتھیس ۳:‏۱-‏۱۰،‏ ۱۲، ۱۳؛‏ ططس ۱:‏۵-‏۹‏)‏ یہوواہ خدا کے خادموں کو باقاعدگی سے عبادت کے لئے جمع ہونا چاہئے۔ (‏عبرانیوں ۱۰:‏۲۴، ۲۵‏)‏ اِن اجلاسوں پر مسیحیوں کی تربیت اور حوصلہ‌افزائی کی جانی چاہئے۔—‏۱-‏کرنتھیوں ۱۴:‏۲۶،‏ ۳۱‏۔‏

جب پولس رسول نے تیمتھیس کے نام اپنا دوسرا خط لکھا تو وہ دوبارہ سے رومہ میں قید تھا اور اُس کے خلا ف مقدمہ چل رہا تھا۔ اِس دوران کم ہی لوگوں نے اُس سے ملاقات کرنے کی جُرأت کی۔ پولس رسول جانتا تھا کہ جلد ہی اُسے مار ڈالا جائے گا۔ اُس نے کہا:‏ ”‏مَیں اچھی کشتی لڑ چکا۔ مَیں نے دوڑ کو ختم کر لیا۔ مَیں نے ایمان کو محفوظ رکھا۔“‏ (‏۲-‏تیمتھیس ۴:‏۷‏)‏ غالباً اِس کے تھوڑے ہی عرصے بعد پولس رسول شہید ہو گیا۔ بے‌شک خدا کے خادم آج تک اُس کے خطوط سے راہنمائی حاصل کر سکتے ہیں۔‏

​—‏اِن باتوں کا ذکر رومیوں‏،‏ پہلے اور دوسرے کرنتھیوں،‏ گلتیوں،‏ افسیوں،‏ فلپیوں،‏ کلسیوں،‏ پہلے اور دوسرے تھسلنیکیوں،‏ پہلے اور دوسرے تیمتھیس،‏ ططس،‏ فلیمون اور عبرانیوں کے خطوط میں ہوا ہے۔‏