تمام لوگوں کے لئے خدا کا پیغام کیا ہے؟
خدا نے سب انسانوں کو ایک پیغام دیا ہے۔ یہ پیغام ہر تہذیب اور نسل سے تعلق رکھنے والے لوگوں کے لئے تسلی اور اُمید کا باعث ہے۔ اِس میں پائی جانے والی ہدایات روزمرّہ زندگی کو خوشگوار بنانے کے لئے فائدہمند ثابت ہوئی ہیں۔ خدا کا یہ پیغام ایک ایسی کتاب میں درج ہے جو دُنیابھر میں دستیاب ہے۔ اِس کے باوجود کم ہی لوگ اِس پیغام سے واقف ہیں۔ چاہے آپ ایک مذہبی شخص ہوں یا نہیں، یقیناً آپ بھی اِس اہم پیغام کے بارے میں جاننا چاہیں گے۔
جس کتاب میں خدا کا پیغام درج ہے اِسے پاک کلام، کتابِمقدس یا بائبل کہتے ہیں۔ دراصل یہ کتاب ۶۶ صحیفوں یا کتابوں کا مجموعہ ہے۔ سب سے پہلے صحیفے کا نام پیدایش ہے اور آخری صحیفے کا نام مکاشفہ ہے۔
خدا نے اپنا پیغام کس کے ذریعے لکھوایا؟ اُس نے اپنے پیغام کو ۴۰ آدمیوں کے ذریعے تقریباً ۱،۶۰۰ سال کے دوران درج کروایا۔ اِن آدمیوں نے کبھی یہ دعویٰ نہیں کِیا کہ یہ پیغام اُن کی طرف سے تھا۔ اُن میں سے ایک نے لکھا کہ یہ تمام صحیفے ”خدا کے الہام سے“ ہیں۔ (۲-تیمتھیس ۳:۱۶) ایک اَور نے کہا: ”[یہوواہ] کی رُوح نے میری معرفت کلام کِیا اور اُس کا سخن [یعنی کلام] میری زبان پر تھا۔“ (۲-سموئیل ۲۳:۲) اِس سے ظاہر ہوتا ہے کہ بائبل کے لکھنے والوں نے اپنا پیغام نہیں بلکہ کائنات کے حاکمِاعلیٰ یہوواہ خدا کے پیغام کو درج کِیا۔ اُنہوں نے اپنے صحیفوں میں ظاہر کِیا کہ خدا انسانوں کو اپنے قریب آنے کی دعوت دیتا ہے۔
پاک صحیفوں کے بارے میں یہ سمجھنا بہت اہم ہے کہ اِن سب میں ایک ہی موضوع کو نمایاں کِیا گیا ہے۔ اِن کا موضوع یہ ہے کہ خدا انسانوں پر حکمرانی کرنے کا حق رکھتا ہے اور وہ اپنی آسمانی بادشاہت کے ذریعے اِس بات کو ثابت کرے گا۔ یہ پاک صحیفوں کا مرکزی پیغام ہے۔ آگے جا کر آپ دیکھیں گے کہ یہ پیغام پیدایش سے لے کر مکاشفہ تک بائبل کے ہر حصے میں پایا جاتا ہے۔
آئیں دیکھیں کہ تمام انسانوں کے لئے خدا کا پیغام کیا ہے۔
a ہر صفحے کے نیچے جو لکیر دی گئی ہے، اِس سے آپ دیکھ سکتے ہیں کہ واقعات تاریخ کے کس دَور میں پیش آئے تھے۔