پاک روح کا اثر

تصویر میں جو لوگ ہیں، وہ یسوع مسیح کے شاگرد ہیں۔ اُنہوں نے یسوع مسیح کا کہنا مانا اور یروشلیم میں رہے۔ ایک دن وہ سب ایک گھر میں جمع تھے۔ اچانک اُنہوں نے ایک زوردار آواز سنی۔ ایسے لگ رہا تھا جیسے گھر میں تیز آندھی چلی ہو۔ پھر ہر شاگرد کے سر پر آگ کا شعلہ دِکھائی دینے لگا۔ کیا آپ کو تصویر میں آگ کے شعلے نظر آ رہے ہیں؟ آئیں، دیکھتے ہیں کہ یہ سب کیا ہو رہا تھا۔‏

یہ ایک معجزہ تھا۔ یاد ہے، یسوع مسیح آسمان پر چلے گئے تھے۔ لیکن جانے سے پہلے اُنہوں نے اپنے شاگردوں سے کہا تھا کہ ”‏جب تک تمہیں پاک روح نہ ملے، یروشلیم میں رہنا۔“‏ اب وہ اپنے شاگردوں کو پاک روح دے رہے تھے۔ پتہ ہے، پاک روح کی مدد سے شاگرد کیا کرنے لگے؟ وہ فرق‌فرق زبانیں بولنے لگے۔‏

یروشلیم میں اَور بھی بہت سے لوگوں نے اِس زوردار آواز کو سنا۔ وہ دیکھنے آئے کہ اِس گھر میں کیا ہو رہا ہے۔ اِن میں سے کچھ لوگ دوسرے ملکوں سے تھے۔ وہ عیدِپنتِکُست منانے کے لئے یروشلیم آئے ہوئے تھے۔ جب اِن لوگوں نے دیکھا کہ شاگرد اُن کی زبان میں خدا کی بڑائی کر رہے ہیں تو وہ بہت حیران ہوئے۔‏

اِن لوگوں نے شاگردوں کے بارے میں کہا:‏ ”‏یہ آدمی تو گلیل سے ہیں۔ لیکن دیکھو، یہ ہمارے ملک کی زبان بول رہے ہیں!‏ یہ اِتنی ساری زبانیں کیسے بول سکتے ہیں؟“‏

پھر پطرس رسول کھڑے ہوئے۔ اُنہوں نے لوگوں کو بتایا:‏ ”‏یسوع مسیح کو مار دیا گیا تھا لیکن یہوواہ خدا نے اُن کو زندہ کر دیا۔ اب یسوع مسیح آسمان پر خدا کی دائیں طرف بیٹھے ہیں۔ اُنہوں نے وعدہ کِیا تھا کہ وہ پاک روح بھیجیں گے۔ اب اُنہوں نے اپنا وعدہ پورا کِیا ہے۔ اِس لئے یہ معجزے ہو رہے ہیں۔“‏

بہت سے لوگوں کو یہ سُن کر دُکھ ہوا کہ یسوع مسیح کے ساتھ بہت بُرا سلوک کِیا گیا تھا۔ اُنہوں نے پطرس رسول سے کہا:‏ ”‏ہمیں بتائیں کہ ہم کیا کریں؟“‏ پطرس رسول نے اُن سے کہا:‏ ”‏بُرے کاموں سے توبہ کریں اور بپتسمہ لیں۔“‏ بہت سے لوگوں نے پطرس رسول کی بات مان لی۔ اُسی دن تقریباً ۳۰۰۰ لوگوں نے بپتسمہ لیا اور یسوع مسیح کے شاگرد بن گئے۔‏