Ohuminyo ya Yefita

Va Isareli va yanduluka vali Yehova kuenje va fetika oku fendela olosuku viesanda. Eci va Amoni va liyaka la va Isareli, olosuku viaco viesanda ka via tẽlele oku va kuatisa. Va Isareli va tala ohali vokuenda kuanyamo alua. Noke va sapuila Yehova vati: “Tua linga ekandu. . . . Linga ohenda, tu popele ño keteke lietaili.” Va Isareli va nyõla oviteka viavo kuenje va fetika vali oku fendela Yehova. Yehova ka yonguile vali oku mola okuti va Isareli vamamako oku tala ohali.

Ulume umue esualali o tukuiwa hati Yefita, wa nõliwa oco a songuile omanu koku yaka la va Amoni. Eye wa popia ku Yehova hati: “Nda wa eca va Amoni peka liange, wosi o tunda kepito lionjo yange oku ñualẽhela lame eci ame ndi tiuka lombembua ku va Amoni, o linga wa Yehova.” Yehova wa yevelela ohutililo ya Yefita kuenje wo kuatisa oku yula uyaki.

Eci Yefita a tiuka konjo, omunu watete wa tunda oku li ñualẽhela laye, omõlaye ufeko wongunga. Omõlaco wa kala oku piluka kuenda oku sika oloñoma. Nye Yefita a ponduile oku linga? Eye wa ivaluka ohuminyo yaye kuenje wa popia hati: “Avoyo we, amõlange! Ove wa teya utima wange, momo wa linga omunu una nda tundisa. Nda linga ohuminyo yimue ku Yehova kuenje si tẽla oku litiukamo.” Pole, omõlaye wo sapuila hati: “A isiange, nda wa linga ohuminyo yimue ku Yehova linga kokuange ndomo wa likuminya. . . . Ndi pinga lika ocina cimosi: Ngecelele oku kala lika liange vokuenda kuolosãi vivali kuenda ngecelelevo oku enda kolomunda loku lila usombo wange kumue lakamba vange akãi.” Omõla ufeko wa Yefita wa vumba lekolelo votavernakulu vokuenda kuomuenyo waye wosi. Unyamo lunyamo akamba vaye va endaenda ko Silo oku ko nyula.