Hana o Likutilila Oco a Kuate Omõla Umue Ulume

Ulume umue u Isareli o tukuiwa hati, Elikana, wa kuatele akãi vavali, umue Hana ukuavo Penina, pole, wa solele vali calua Hana. Penina wa enda oku yola epembe Hana olonjanja viosi, momo Hana ka kuatele omãla kuenda Penina wa kuatele omãla valua. Vunyamo lunyamo Elikana wa enda oku ambata epata liaye oku ka fendela votavernakulu yo ko Silo. Eteke limue osimbu va kala votavernakulu Elikana wa limbuka okuti ukãi waye Hana wa sumua calua. Eye wa popia hati: ‘A Hana, linga ohenda ku ka lile. Ove o kasi lame. Ame ndu ku sole.’

Noke Hana wa tunda lika liaye oku ka likutilila. Eye ka liwekelepo oku lila kuenje wa fetika oku pinga ku Yehova oco o kuatise. Eye wa likuminya hati: ‘A Yehova, nda wa eca kupika wove omõla umue ulume, ame ndi ko weca ku Yehova oloneke viosi viomuenyo waye.’

Ocitunda Cinene Eli wa mola okuti Hana o kasi oku sukoka kuenje wa sima okuti, Hana wa kolua. Hana wa tambulula hati: “Sio, a ñala yange! Ndukãi umue wa sumua calua; sia nyuile ovinyu ale ocina cikuavo ci koluisa, pole, ñasi oku situluila utima wange ku Yehova.” Eli wa limbuka okuti eci a kala oku sima ka ca sungulukile kuenje wa sapuila Hana hati: “Suku ya va Isareli a ku ĩhe eci wo pinga.” Kuenje Hana wa tunda wa enda lonjila yaye. Ka pa pitile unyamo kuenje Hana wa cita omõla umue ulume wo luka hati, Samuele. O pondola hẽ oku sokolola esanju Hana a yeva vutima?

Hana ka ivaleleko ohuminyo a linga ku Yehova. Eci Samuele a sumũha, Hana wo wambata oco a ka vumbe votavernakulu. Eye wa sapuila Eli hati: “Nda likutilila omo liomõla kuenda Yehova wa nyĩha eci ndo pingile. Eye o ka tiamẽla ku Yehova oloneke viosi viomuenyo waye.” Elikana kuenda Hana, va endaenda oku nyula Samuele unyamo lunyamo kuenda oku wambatela esanya limue liokaliye ka li kuete ovoko. Yehova wa ecelela vali okuti Hana o cita omãla vatatu valume kuenda vavali vakãi.