GGideone wa Yula va Midiane

Vokuenda kuotembo, va Isareli va liwekapo vali oku fendela Yehova kuenje va fetika oku fendela olosuku viesanda. Va Midiane vokuenda kuanyamo epanduvali, va nyana ovinyama via va Isareli kuenda va nyõla ovaima avo. Oco va Isareli va puluke ku va Midiane, va salama valeva kuenda volomunda. Ovo va pinga ku Yehova oco a va popele. Kuenje Yehova wa tuma ungelo kumalẽhe umue o tukuiwa okuti, Gideone. Ungelo wa popia hati: ‘Yehova wa ku nõla oco o linge esualali lia pama.’ Gideone wa pula hati: ‘Ndi popela ndati o Isareli? Ame ndi sule.’

Gideone wa ponduile oku kũlĩha ndati okuti Yehova wo nõla? Eye wa kapa ocikutu posi kuenda wa sapuila Yehova hati: “Nda owume u kala lika kocikutu, pole, osi yosi yi kukuta, ndi kũlĩha okuti o ka popela o Isareli pocakati cange.” Keteke lia kuamamo komẽle, ocikutu oco lika ca yula lowume, pole, osi ya kukuta! Noke Gideone wa pinga okuti komẽle yeteke likuavo, ocikutu ci kukuta kuenda osi yi yula. Eci ovina viaco via lingiwa, Gideone wa tava okuti Yehova eye muẽle wo nõla. Eye wongolola asualali vaye oco va liyake la va Midiane.

Yehova wa sapuila Gideone hati: “O kasi lasualali valua oco ngece Midiane peka liove. Sanga Isareli o litunula kuenje o popia lame hati: ‘Eka liange muẽle lia mopela.’ Omo liaco, “Omunu wosi o kasi lusumba haeye o kasi oku luluma, a tiukile konjo.” Ci soka 22.000 kasualali va tiukila kolonjo kuenda ci soka 10.000 va siala. Noke Yehova wa popia hati: ‘Handi o kuete asualali valua. Lokila lavo volui kuenda va sapuila oco va nyue ovava. Siala lika la vana okuti osimbu va nyua ovava, va lavulula ovanyãli.’ Ci soka 300 kalume ovo lika va lavulula osimbu va kala oku nyua ovava. Yehova wa likuminya okuti etendelo liaco litito lia sialapo, lia laikele oku yula eci ci soka 135.000 kasualali a va Midiane.

Vokuenda kuteke waco, Yehova wa sapuila Gideone hati: “Katuki momo Yehova wa eca ocilombo co Midiane peka liene.” Gideone wa eca kalume vaye anguena kuenda asanga anene a kuete ovimĩhi vokati kaco. Eye wa va sapuila hati: “Lavululi kuenda lingi eci ndi linga.” Gideone wa sika enguena liaye, wa tetola esanga liaye, wa kuata umĩhi waye loku kaluka hati: ‘Osipata ya Yehova la Gideone!’ Ci soka 300 kalume va ci lingavo. Va Midiane va kala lusumba, kuenje va tilila kolonepa viosi. Omo liesakalalo, va fetika oku liñualelapo omunu lukuavo. Yimue vali onjanja, Yehova wa kuatisa va Isareli oku yula ovanyãli vavo.