Olondavululi Ekũi la Vivali

Va Isareli va tunda Komunda Sinai va enda vekalasoko lio Parane kocitumãlo ci tukuiwa hati, Kadesi. Kocitumãlo caco, oko Yehova a sapuila Mose hati: ‘Tuma 12 kalume oco va kũlĩhĩse ofeka yo Kanana, yina ngeca ku va Isareli. Kepata lepata, ku nõliwe ulume umosi o kala usongui pokati kavo.’ Mose wa nõla 12 kalume kuenje wa va sapuila hati: ‘Kuendi kofeka yo Kanana, kũlĩhĩsi ofeka ndomo yi kasi kuenda kũlĩhĩsivo nda omanu va tungamo va pama ale va hongua, nda vatito ale valua, nda ofeka yaco yiwa ale yĩvi, nda valupale va kasi ovilombo ale oviteyuilo.’ Olondavululi 12 oku kongelamo Yehosua la Kalembe va enda ko Kanana.

Eci pa pita 40 koloneke, olondavululi via tiuka, kuenje via nena akuyu, alumau kuenda ayuva. Olondavululi via popia viti: “Ofeka yaco yi tumõha asenjele lowiki. . . . pole, omanu va tunga vofeka yaco va pama kuenda va tunga alupale a kuete oviteyuilo vinene.” Pole, Kalembe wa popia hati: “Tu lamaneliko . . . momo tu tẽla oku yi yula.” Ove wa kũlĩha esunga lieci Kalembe a popela olondaka evi? Momo eye la Yehosua va kolelele Yehova. Pole, olondavululi vikuavo ekũi via popia viti: Sio! “Omanu vosi tua muilako va lepa calua . . . oku li sokisa lavo tua kala ndapange.”

Olondaka viaco via sumuisile va Isareli. Ovo va fetika oku lisiõsiõla loku livangula omunu lukuavo vati: “Momo lie Yehova a tu nenela vofeka yilo oco tu pondiwe losipata? . . . Tu nõli usongui umue kuenje tu tiukila Kegito!” Yehosua la Kalembe va popia vati: “Ko ka sinĩli Yehova kuenda ko ka kuateli usumba omanu vo vofeka yaco . . . Yehova o kasi letu.” Pole, va Isareli ka va tavele. Ovo va yonguile oku ponda Yehosua la Kalembe!

Nye Yehova a linga? Eye wa sapuila Mose hati: ‘Ndaño okuti nda lingila ovina vialua va Isareli, lopo ka va pokuile kokuange. Va ka kangisiwa omo liakulueya avo vokuenda kueci ci soka 40 kanyamo kuenda va kũlĩha eci ci lomboloka oku ndi katukila. Pole, Yehosua omõla a Nune la Kalembe omõla a Yefune okuti, va kala pokati kava va endele oku ka kũlĩhĩsa ofeka, ovo lika va kamamako lomuenyo.’