Ovo va Sinila Yehova

Noke yotembo yimue osimbu va Isareli va kala vekalasoko, Kora, Datana kuenda Avirama oku kongelamo 250 kalume, va katukila Mose. Ovo vo sapuila vati: ‘Tua kava omo liene! Momo lie o lingila usongui wetu kuenda Arone o linga ocitunda cinene? Yehova o kasi pokati ketu Momo lie vu yonguila oku livelisilapo pokati komanu va Yehova.’ Pole, Yehova ka ci sanjukilile. Eye wa ci tenda ndu okuti va kala oku u sinila!

Mose wa sapuila Kora kumue lomanu vaye hati: Komẽle Yehova o ka lekisa omunu wa tiamẽla kokuaye, kuenje wosi eye a ka nõla, amela kokuaye.’

Keteke lia kuamamo, Kora leci ci soka 250 kalume va enda oku ka lisanga la Mose kotavernakulu. Ovo va timiha insensu ndu okuti va kala ovitunda. Yehova wa sapuila Mose la Arone hati: “Litepi locimunga eci.”

Ndaño okuti Kora wa endele ku Mose kotavernakulu, pole, Datana, Avirama kuenda apata avo va likala oku enda. Yehova wa sapuila va Isareli oco va tunde pokati kolombalaka via Kora la Datana kuenda Avirama. Vepuluvi liaco, haico va Isareli va tunda pokati kavo. Datana, Avirama kuenda apata avo va talama puvelo wolombalaka viavo. Vocipikipiki osi va liata, ya toka kuenje ya va ina vosi! Ondalu ya tunda kilu ya timĩha Kora kumue lalume vaye va soka 250 vana va kala votavernakulu.

Yehova wa sapuila Mose hati: “Vangula la va Isareli okuti, pokati kavo pa tunde ombueti yimue, ndomo ci likuata lusongui wonjo ya va isiavo okuti, vocosi 12 kolombueti. Soneha onduko yomunu lomunu kombueti yaye. Soneha onduko ya Arone kombueti ya Lewi, momo usongui lusongui wonjo ya va isiavo o kala lombueti. Olombueti viaco o vi kapa vombalaka yohongele kovaso Yuvangi, kuna nda siata oku li molẽhisa kokuove. Kuenje ombueti yomunu ndi nõla, yi yova kuenda ndi lingisa okuti, va Isareli ka va lisiõsuĩla vali kokuange.”

Keteke lia kuamamo Keteke lia kuamamo, Mose wa nyañula olombueti viosi kuenda wa vi lekisa kakulu. Ombueti ya Arone ya yova Kuenda ya tunda olonẽleho kuenje ya ima amendua. Lonjila eyi, Yehova wa lekisa okuti eye wa nõla Arone oco a kale ocitunda cinene.