Ndomo o Lavulula Asakalalo

Oku sakalala calua, ci pondola oku ku kokela ovitangi ketimba vikuavo kuenda vovisimĩlo. Pamue ci ku kokela ovitangi vialua okuti, cina catete o kasi oku liyaka laco, ci sule.

Olonumbi oco ku ka sakalale calua

• 

  Yuvula oku tala asapulo alua avĩ. Ku sukila oku kũlĩha alomboluilo osi viovina vĩvi vi kasi oku pita. Oku kala otembo yosi loku tala asapulo viovina vĩvi vi kasi oku pita, ci vokiya calua usumba kuenda esumuo liove.

  Ceci Embimbiliya li popia: “Utima wa sumua u lingisa etimba oku leñela.”—Olosapo 17:22.

  “Ovingungu viasapulo otembo yosi via siata oku sandeka asapulo ãvi hao a sumuisa kuenda ci leluka oku kuata ocituwa coku tala cosi. Ocili okuti, ocituwa caco ka ci kuatisa. Nda ndi nõlapo oku tala lika asapulo amue, si sakalala calua.”—John.

  Sokolola kepulilo eli: Olonjanja viñami o sukila oku tala asapulo?

• 

  Tumbika esokiyo limue. Seteka oku kuata elivala limuamue lioku pasuka, lioku pongiya okulia, oku yelisa onjo kuenda lioku pekela. Nda o kapako esokiyo liaco, ci kaila ndocina cimue ceteke leteke komuenyo wove kuenda ci tepulula asakalalo ove.

  Ceci Embimbiliya li popia: “Asokiyo omunu ukuambili, a nena muẽle onima yiwa.”—Olosapo 21:5.

  “Eci efengi lio COVID-19 lia fetika, nda siapo oku linga ovina viosi nda enda oku linga kuenje nda pesila otembo yange yosi kolomapalo. Noke nda nõlapo oku talavaya ciwa lotembo yange poku linga esokiyo limue, oco ndi linge ovopange ange eteke leteke.”—Joseph.

  Sokolola kepulilo eli: Ove o kuete hẽ esokiyo limue li ku sanjuisa omo liovina o linga vokuenda kueteke?

• 

  Tiamisila utima kovina viwa. Otembo yosi nda o sokolola calua kovina vĩvi vi laika oku pita, ci ka vokiya vali asakalalo ove. Pole, sokolola kovina vivali, ale vitatu o pondola oku eca olopandu.

  Ceci Embimbiliya li popia: “Olonjanja viosi eci olopandu.”—Va Kolosai 3:15.

  “Oku tanga Embimbiliya, ci ndi kuatisa oku tiamisila utima kovina viwa okuti, si yukisa utima wange lasapulo ãvi. Elungulo eli, li kasi ndu okuti lia leluka calua, pole, li kuatisa!”—Lisa.

  Sokolola kepulilo eli: Ove o kuete hẽ ocituwa coku sokolola kovina vĩvi vi pita love okuti wivalako ovina viwa?

• 

  Sokolola komanu vakuavo. Nda wa sakalala calua, ci leluka oku kala ulika. Omo liaco, sokolola kueci o pondola oku lingila omanu vana va sukila ekuatiso.

  Ceci Embimbiliya li popia: “Ko ka sokololi lika ovina viene muẽle, pole, sokololivo ovina via vakuene.”—Va Filipoi 2:4.

  “Ndi kuata esanju eci ndi lingila vakuetu ovina viwa. poku ci linga, si kuatisa lika omanu oku kuata epuluvi limue liesanju, ndi tepululavo asakalalo ange. Ocili okuti, si kuata otembo yoku sakalala.”—Maria.

  Sokolola kepulilo eli: Pokati komanu wa kũlĩha, helie o sima okuti, o sukila cimue kuenda nye o pondola oku linga oco u kuatise?

• 

  Tata ciwa uhayele wove. Pindisa etimba liove kuenda pekela olowola vi sukiliwa. Pongiya okulia ku pamisa etimba. Oku tata ciwa uhayele wove ci ku kuatisa oku kuata ocituwa ca sunguluka catiamẽla komuenyo kuenda oku yuvula asakalalo.

  Ceci Embimbiliya li popia: “Oku pokuisa etimba ku kuete esilivilo.”—1 Timoteo 4:8, etosi.

  “Ame lomõlange ka tu pondola oku linga olomapalo vialua voluayela ndeci tua yonguile. Omo liaco, vesokiyo lietu tua kongelamo oku pindisa etimba konjo yetu. Eci ci tu kuatisa oku liyeva ciwa kuenda ca vokiya ukamba wetu.”—Catherine.

  Sokolola kepulilo eli: Anga hẽ o sukila oku lia ovikulia vi pamisa kuenda oku pindisa calua etimba liove oco vi mioñolole uhayele wove?

Omanu valua ka va kapeleko lika olonumbi evi, ovo va lilongisa ocili catiamẽla kolohuminyo via koleliwa viekalo liwa tu ka kuata kovaso yoloneke, li sangiwa Vembimbiliya. Tanga ocipama losapi: “Usoma wa Suku u ka Linga Nye?”