Setukula “Suku Yelembeleko Liosi”

1. Momo lie tu sukilila oku lembeleka omanu vakuavo?

VOSI yetu tua siata oku liyaka lovitangi volonjila via litepa okuti olonjanja vimue, tu sukila elembeleko. (1 Pet. 1:6) Omo okuti tu sanjukila oku tambula elembeleko liomanu vakuavo, tu sukilavo oku kala vakuanjanga poku lembeleka vakuetu eci va liyaka lovitangi. (Mat. 7:12) Yehova “Suku yelembeleko liosi,” o tu longisa ndomo tu ‘lembeleka vakuetu kohali yavo yosi.’ Tu pondola oku setukula ongangu yaye poku “li lembeleka pokati.” (2 Va Kor. 1:​3, 4; 1 Va Tes. 4:18) Ka tu lembeleka vamanjetu omo liekisika, pole, tu ci lingila omo okuti tu va sole. Vocipama cilo, tu ka konomuisa (1) ovina Embimbiliya li popia catiamẽla kelembeleko, (2) ndomo tu lembeleka omanu vakuavo kuenda (3) ovina tu pondola oku linga eci tu sukila elembeleko.

OVINA EMBIMBILIYA LI POPIA CATIAMẼLA KELEMBELEKO

2. Vembimbiliya ondaka “elembeleko” yi pondola oku lomboloka nye?

² Vembimbiliya ondaka yo Helasi ya pongoluiwa okuti “elembeleko,” yi pondola oku lomboloka ovina via litepa. Ndeci, oyo yi pondola oku lomboloka oku “pamisa” ale oku “lungula.” (Va Rom. 12:8) Handi vali, kelimi lio Helasi ondaka “elembeleko,” yi lombolokavo omunu umue o kala konele yomunu ukuavo oco o kuatise. Tu pondola oku sokolola komunu umue okuti lonjanga yalua, enda kekamba liaye o kasi oku tala ohali oco o kuatise kovina viosi eye a sukila. Omo liaco, omunu umue o pondola oku kuatisa ekamba liaye volonjila via litepa. Pole, omunu waco olonjanja viosi o sukila oku kũlĩhĩsa nda ekamba liaye li kasi oku liyeva ciwa.

3. Barnaba wa eca ndati ongangu yiwa yoku lembeleka vakuavo? (Talavo ociluvialuvia.)

³ Tu kũlĩhĩsi ulandu umue wa tukuiwa Vembimbiliya. Ukristão umue o tukuiwa Yosefe, olonjanja viosi wa enda oku lembeleka kuenda oku kuatisa omanu vakuavo kuenje ovapostolo va fetika oku u tukula londuko ya Barnaba yi lomboloka okuti, “Omõla Welembeleko.” (Ovil. 4:36) Onduko yaco ya likuata ciwa locituwa caye okuti, lalimue eteke a tukuiwile vali londuko Yosefe Vembimbiliya, pole, olonjanja viosi wa enda oku tukuiwa lika londuko ya Barnaba. Embimbiliya li tu sapuila okuti Barnaba wa enda oku kuatisa vamanji kapuluvi osi. Ndeci, eci Saulu una okuti kotembo yaco ndopo a lingile Ukristão a pitĩla ko Yerusalãi locimãho coku ka kũlĩha Akristão vakuavo, Akristão vaco vo kuatela usumba walua momo va kũlĩhĩle okuti Saulu kosimbu, wa enda oku va lambalala. Pole, Barnaba wa kolelele Saulu kuenda wo lekisa kovapostolo vakuavo.—Ovil. 9:​26-28.

NDOMO TU LEMBELEKA OMANU VAKUAVO

4. Onjila yipi yiwa tu pondola oku kuama oco tu lembeleke omanu vakuavo? (Va Roma 1:​11, 12)

⁴ Kuata ocituwa coku nyula vamanji nda ekalo liecelela. Yehova o talavaya lafendeli vaye oco a lembeleke omanu vakuavo. Ndeci, eci uprofeto Eliya a sumuile calua, Yehova wa talavaya lungelo umue oco o pamise. (1 Olos. 19:​4-7) Upostolo Paulu wa yonguile oku nyula vamanji oco a va pamise momo poku ci linga, wa ponduilevo oku pamisiwa. (Tanga Va Roma 1:​11, 12.) Eci o nyula omunu umue, sanda oku kala laye otembo yalua oco o tẽle oku u lembeleka. (1 Va Korindo 16:7) Nda okuti ekalo liove ka li ku ecelela oku nyula omunu umue, o pondola oku u telefonalela, oku u sonehela ukanda umue ale oku u tumisa esapulo limue li lembeleka. Anga hẽ o ka ecelela okuti Yehova o talavaya love oco o lembeleke omanu vakuavo?

5. Momo lie olonjanja vimue ka ca lelukile oku lembeleka vamanji?

⁵ Koloneke vilo via sulako ekalo liomuenyo li kasi oku tĩla calua kuenje ka ci leluka kokuetu oku nyula vamanji loku eca kokuavo elembeleko va sukila. Vokuenda kuotembo Paulu a kala vokayike ko Roma, Onesiforo onyitiwe yimue yo ko Efeso, wa kapa omuenyo waye kohele poku sandiliya Paulu oco o lembeleke. (2 Tim. 1:​16-18) Cimuamue haico Olombangi Via Yehova ko Rusia via siata oku linga, poku li lembeleka pokati eci va lambalaliwa omo liekolelo liavo. Eci Olombangi Via Yehova vi ambatiwa kombonge oco vi ka sombisiwe, vamanji vakuavo va siata oku kala kumue lavo oco va va pamise ndaño okuti poku ci linga va pondolavo oku kapiwa vokayike. Nye o sukila oku linga oco o tẽle oku lembelekavo vamanji? Pamue o pondola oku tanga ndomo afendeli va Suku vo koloneke vilo kuenda vo kosimbu va li lembeleka pokati loku lilongisila kovina ovo va linga, oco vamameko lesanju ndaño lalambalalo.

6. Tu setukula ndati Yehova poku lembeleka vakuetu? (Talavo ociluvialuvia.)

⁶ Yevelela lutate vamanji. Eci uprofeto Eliya a kala lusumba woku pondiwa, wa likutilila ku Yehova loku u situluila ndomo a kala oku liyeva. Ndaño okuti Yehova Suku yetu ukuacisola wa kũlĩhĩle ale ovina via kala oku sakalaisa Eliya, wa yevelela lutate osimbu Eliya a kala oku situlula asakalalo aye. Yehova wa lekisa epandi poku yevelela Eliya ndaño ceci a kala oku pitulula ovina vimuamue! (1 Olos. 19:​9, 10, 14) Yehova wa ecelelavo okuti uprofeto Havakuki o situlula ovisimĩlo viaye, ndaño wa kala oku ci linga lonjila yimue yi molẽha ndu okuti, wa kala oku lekisa ekambo liesumbilo ku Suku. (Hav. 1:​2, 3) Koloneke vilo, Yehova wa siatavo oku yevelela lutate olohutililo vietu, ndaño okuti wa kũlĩha ale ovina tu sukila. Tu pondola oku setukula Yehova poku yevelela lutate kuenda lesumbilo eci vamanjetu va sapela letu. Tu ci linga ndati? Tu sukila oku yuvula oku va teta kondaka locimãho coku vangula ovina tu yongola. Nda okuti ovo va popia ocina cimue cĩvi, tu sukila oku yuvula oku tema. Handi vali, ndaño okuti ovo va pitulula ovina vimuamue olonjanja vialua, tu sukila oku va yevelela lepandi.—Tia. 1:19; Uku. 7:9.

7. Tu kũlĩha ndati okuti omunu umue o sukila elembeleko?

⁷ Kũlĩha ovina omunu a sukila. Ocili okuti ka tu pondola oku kũlĩha ovina vi kasi vutima womanu ndeci Yehova, pole, tu pondola lika oku limbuka elembeleko omunu a sukila, nda tuo yevelela lutate. Ka tu ka simi okuti tua kũlĩha ale ovina viosi omunu umue a sukila. Tu ivaluki okuti ovina omunu umue a sukila, pamue vi pondola oku litepa lovina etu tu sukila nda okuti tua kaile vekalo limuamue. Momo vosi tu kuete ovituwa via litepa. Omo liaco, ka tu ka kuati onjanga, pole, tu sukila oku yevelela lutate loku linga apulilo lesumbilo oco tu kuatise omunu oku situlula ovisimĩlo viaye.—Olosap. 20:5.

8. Yesu wa lembeleka ndati Marta kuenda Maria noke yolofa via Lasaru? (Talavo oviluvialuvia.)

⁸ Kũlĩhĩsa ndomo Yesu a lembeleka Maria kuenda Marta eci mume wavo a fa. Akãi vaco vavali, va sumuile calua momo va fisile mume wavo. Pole, Yesu ka va lembelekele lonjila yimuamue. Marta noke yoku vangula la Yesu, Yesu wo lomboluila ocili catiamẽla kepinduko kuenda wo kuatisa oku pamisa ekolelo liaye kepinduko liaco. Pole, eci Maria a pitĩla ku Yesu loku lila, citava okuti Yesu ka vanguile laye catiamẽla kepinduko. Eye wa lila kumue la Maria kuenda wo pula apa va langekele etimba lia Lasaru. (Yoa. 11:​20-35) Ulandu owu u tu longisa nye? U tu longisa okuti eci tu lembeleka vana va kasi oku liyaka lovitangi, tu pondola oku sokolola kovina ovo va sukila okuti, ka tu kuama onjila yimuamue lomanu vosi.

9. Tu talavaya ndati Lembimbiliya oco tu lembeleke vakuetu? (Va Roma 15:​4, 5)

⁹ Talavaya Lembimbiliya. Eci tu tangela Ovisonehua vi lembeleka komanu vana va kasi oku tala ohali, tu va kuatisa oku pamisa elavoko liavo kolohuminyo via Yehova. (Tanga Va Roma 15:​4, 5.) Elavoko liaco li va lembeleka kuenda li va pamisa. (Isa. 40:31) Tu pondola oku sanga ndati ocinimbu cimue Cembimbiliya ci pondola oku tu kuatisa oku lembeleka omunu umue? Omanu vamue va siata oku soneha ulala umue wovinimbu Viembimbiliya vi sangiwa velivulu losapi hati: “Ovisonehua vi Songuila Omuenyo Wukristão,” konepa yokuti “elembeleko.” Tu sukilavo oku pinga ku Yehova oco a tu kuatise oku talavaya ciwa Lembimbiliya oco tu pamise omanu vakuavo. Espiritu sandu liaye li pondola oku tu kuatisa oku ivaluka ovisonehua vi lembeleka kapuluvi ana tu sukila.—Yoa. 14:26.

10. Momo lie tu sukilila oku vangula lumbombe poku pamisa vamanji?

¹⁰ Vangula lumbombe. Olonjanja vimue, tu sukila oku lembeleka vamanjetu loku va kuatisa oku pongolola ovisimĩlo viavo viatiamẽla konjila ndomo va tenda ovitangi va kasi oku liyaka lavio. Omo liaco, sokolola lutate kovina o ka popia osimbu kua vanguile cimue oco okuti, olondaka viove vi lembeleka kuenda ka vi sumuisa vamanji. (Olosap. 12:18) Tu pondola oku setukula Yehova konjila ndomo eye a kuatisa uprofeto Eliya. Kepuluvi limue, Eliya wa simĩle okuti eye lika wa kala oku vumba Yehova kuenda upange waye wuprofeto ka wa kaile oku eca onima yiwa. Pole, Yehova lumbombe wo kuatisa oku pongolola ovisimĩlo viaye lonjila yimue okuti, ka tiamisilile utima kakulueya aye. (1 Olos. 19:​15-18) Ove o pondolavo oku kuatisa vamanji nda wa lekisa umbombe kuenda oku sokolola lutate kovina o ka popia. Omo liaco, olonjanja viosi eci o linga ohundo yimue ale oku eca atambululo kolohongele, vangula locisola kuenda lonjila yimue ya sunguluka oco o tẽle oku pamisa loku lembeleka vamanji.

11. Nye vamanji vana va kasi oku tala ohali olonjanja vimue va sukila? (1 Yoano 3:18)

¹¹ Kuatisa vamanji lovina va sukila. Eci vamanjetu va liyaka lovitangi, pamue tu sukila oku linga cimue oco tu va kuatise okuti, ka tu vangula lika ovina vi va lembeleka. (Tanga 1 Yoano 3:18.) Barnaba wa tu sila ongangu yimue yiwa eci a landisa epia liaye loku eca olombongo viaco kovapostolo oco va kuatise vamanji va kala olohukũi. (Ovil. 4:​36, 37) Koloneke vilo, vamanji valua va siata oku kuama ongangu yaye yiwa poku eca ekuatiso ku vana va sukila. Ndeci, manji umue ukãi o tukuiwa Gabriela o kasi kofeka yo Polonia, wa yeva esumuo lialua eci endunde limue liovava lia nyõla onjo yaye. Eye wa popia hati: “Ame kumue lolonjali viange, tua kuata usumba walua kuenda esakalalo. Sia kũlĩhĩle ndomo nda ponduile oku semũlũla onjo yetu. Pole, vamanji va kala vakongelo ocipepi veya kuenje vokuenda kueteke limosi va semũlũla onjo yetu. Ulandu waco wa pamisa ekolelo liange liokuti Yehova o kasi oku songuila afendeli vaye, oco va lembeleke vana va kasi oku tala ohali.”

12. Eci tu pandikisa kovitangi tu kuatisa ndati vamanji?

¹² Amamako oku pandikisa. Upostolo Paulu wa sapuila vamanji vo ko Tesalonike okuti, wa kuata esanju kuenda wa pamisiwa calua eci a yeva okuti ovo va kala oku pandikisa ndaño lalambalalo. Eye wa kũlĩhĩle okuti alikolisilo a linga oco a va kuatise, ka a kaile velivova. (1 Va Tes. 3:​5-8) Handi vali, Paulu wa kũlĩhĩle okuti nda wamamako oku pandikisa poku liyaka lovitangi, wa ponduile oku vetiya vamanjaye Akristão oku pandikisavo. (Va Kol. 2:​1, 2) Cimuamue haico okuti, eci vamanjetu va mola ndomo Yehova a kasi oku tu kuatisa oku pandikisa eci tu liyaka lovitangi, ovo va pamisiwa calua.

13. Nye tu sukila oku amamako oku linga oco tu lembeleke omanu vakuavo?

¹³ Lekisa epandi. Vamanji vamue eci va yeva esumuo, pamue ka va kapiko lonjanga alikolisilo tu linga oco tu va lembeleke. Pole, Embimbiliya li tu sapuila okuti tu sukila oku ‘amamako oku li vetiya pokati.’ Eci ci lomboloka okuti tu sukila oku pamisa vamanji olonjanja viosi. (1 Va Tes. 5:11) Omo liaco, tu sukila oku lekisa epandi osimbu tu amamako oku lembeleka kuenda oku pamisa vana va sukila ekuatiso lietu. (1 Va Tes. 5:14) Ocili okuti vosi yetu olonjanja vimue, tu ka sukila oku tambula elembeleko. Oco hẽ, nye tu pondola oku linga eci tu sukila elembeleko?

CECI TU SUKILA ELEMBELEKO

14-15. Nye o sukila oku linga eci o yeva esumuo ale esakalalo?

¹⁴ Likutilila ku Yehova. Eci o yeva esumuo ale esakalalo, pinga ekuatiso ku Yehova oco o liyeve ciwa. (Osa. 94:19) U lomboluila ndomo o liyevite. (Osa. 62:8) Ocili okuti Yehova wa kũlĩha ale ndomo o liyevite osimbu kua likutilile kokuaye. Pole, eci o lombolola kokuaye ndomo o liyevite, o lekisa okuti wa kolela kokuaye kuenda eye o ka yevelela muẽle olohutililo viove. Momo Yehova olonjanja viosi o kuatisa omunu una o likutilila kokuaye lekolelo, ndaño okuti ekuatiso liaco halioko omunu a lavokaile. (Mar. 11:24) Kukanda ku va Filipoi 4:​6, 7 ku popia hati: “Apingilo ene a kũlĩhĩwe la Suku; kuenje ombembua ya Suku yina ya piãla olondunge viosi, yi ka lava ovitima viene kuenda ovisimĩlo viene.”

¹⁵ Pinga ekuatiso komanu vakuavo. Situlula kekamba limue ale kukulu umue wekongelo ove wa kolela, ndomo o liyevite. Vamanji va pondola oku ku kuatisa oku liyeva ciwa loku eca kokuove ovina o sukila. Pole, ovo va ka ci linga lika nda okuti wa va situluila ovisimĩlo viove. (Olosap. 14:10) Omo liaco, pinga kokuavo oco va yevelele lutate osimbu o va lomboluila ndomo o liyevite. O pondolavo oku va pinga oco va ku tangele ocinimbu cimue Cembimbiliya ale ocipama cimue ci pamisa.

16. Nye pamue ci pondola oku lipita eci vamanji va seteka oku ku lembeleka, pole, nye o sukila oku ivaluka?

¹⁶ Lekisa epandi kuenda kala ukuakuecela. Citava okuti vamanji va ka lueya eci va ka seteka oku ku lembeleka. Ndeci, ovo pamue va ka popia ale va ka linga ocina cimue okuti ci ka ku kokela vali esumuo. Nda eci oco ca lipita, lekisa epandi. (1 Va Kor. 13:​4, 7) Handi vali, ivaluka olondaka vi sangiwa kukanda wa Tiago 3:2 viokuti: “Nda umue ka lueya kondaka, omunu waco wa lipua.” Tiamisila utima kovisimĩlo viwa via vamanji vioku ku kuatisa. Ivaluka okuti, “utima wa pama, pole, etimba lia hongua.”—Mat. 26:41.

17. Nye tua nõlapo oku linga?

¹⁷ Omo okuti tu kasi koloneke via sulako, vosi yetu tu sukila elembeleko kuenda oku pamisiwa momo ovanyãli va Suku va siata oku tu lambalala lonyeño yalua. Omo liaco, tu nõlipo oku likolisilako oku li lembeleka pokati.