Amamako Oku Pamisa Ukamba o Kuete Lohueli Yove

1. Momo lie akamba vocili ombanjaile yimue yi tunda ku Yehova?

AKAMBA vawa, ombanjaile yimue yi tunda ku Yehova. (Tia. 1:17) Ovo va sole Suku kuenda va tu solevo. Handi vali, eci tu sanjuka ovo va sanjukavo kuenda eci tu sumua va tu lembeleka loku tu ĩha alungulo awa tu sukila. Ovo vakuacili kuenda tu pondola oku kolela kokuavo. Ocili okuti akamba vaco, va “sanjuisa utima!”—Olosap. 27:9.

2. Momo lie ci kuetele esilivilo okuti olohueli vi amamako oku pamisa ukamba va likuetele pokati? (Mateo 19:6)

² Ci kuete esilivilo lialua olohueli oku kala akamba vawa. Ovo va pondola oku ivaluka okuti ukamba waco ka wiya ocipikipiki, pole, va sukila oku likolisilako calua oco ukamba waco u pamisiwe. Nda okuti ka va pamisile ukamba waco, ovo va fetika oku liyeva ulika, oku yeva esumuo kuenda onyeño. Pole, nda va pamisa ukamba va likuetele pokati, va ka kuata olohuela vimue viwa. (Tanga Mateo 19:6.) Vocipama cilo, tu lilongisa ndomo olohueli vi pondola oku amamako oku pamisa ukamba va likuetele pokati. Pole, tete tu konomuisa ndomo Ukristão una ka kuelele, a pondola oku nõla ciwa omunu a sukila oku kuata laye ukamba umue ulikasi, una u ka kala otembo ka yi pui.

NDOMO TU NÕLA OMUNU TU KA KUELA LAYE OKUTI O KA KALA EKAMBA LIETU OTEMBO KA YI PUI

3-4. Nye ci kuatisa Ukristão umue oku sanga omunu umue uwa a pondola oku likuela laye? (Olosapo 18:22)

³ Osimbu ka tua nõlele onjila yimue yi kuete esilivilo, tu sukila oku sokolola kovitangi tu ka kuata, kasumũlũho kuenda konima yi tunda konjila yaco. Onjila yosi tu nõla, yi pondola oku tu kuatisa ale oku tu kokela ovitangi. Omo liaco, tu sukila oku sokolola ciwa osimbu ka tua nõlele onjila yimue.

⁴ Eci tu nõla omunu umue tu ka likuela laye, tu kasi oku nõla ekamba limue tu ka kala laye vokuenda kuomuenyo wetu wosi. Omo liaco, eyi yimue pokati kolonjila via velapo tu ka nõla komuenyo. Omo okuti Yehova eye usovoli wolohuela, ci kuete esilivilo oku sandiliya olonumbi viaye poku sanda omunu tu ka likuela laye. Yehova o yongola okuti ove o sanga omunu umue uwa o pondola oku likuela laye. Eye olonjanja viosi wa kũlĩha ovina tu sukila. (Tanga Olosapo 18:22; Isa. 48:​17, 18) Olonumbi Viembimbiliya, vi pondola oku kuatisa Ukristão umue oku sanga omunu umue uwa oco a likuele laye.

5. Momo lie ci kuetele esilivilo oku nõla omunu umue wa papatisiwa oco o likuele laye?

⁵ Eci tu papatisiwa, tu linga akamba va Yehova. (Osa. 25:14) Omo liaco, nda okuti o yongola oku kuela, ove o sukila oku nõla omunu umue okuti ekamba lia Yehova. (1 Va Kor. 7:39) Poku ci linga, o ka lekisa okuti wa sumbila olonumbi via Yehova. Handi vali, ove o ka tenda ohueli yove ndombanjaile yimue yi tunda kokuaye. (Olosap. 19:14) O ka yuvulavo ovitangi vi tunda “kokanga ka ya lisokele” poku kuela lomunu umue ka sole Yehova. (2 Va Kor. 6:14) Ka ca sungulukile oku nõla omunu umue ka vumbi Yehova oco o likuele laye, ndaño okuti pokati ka vamanji ka pali omunu umue o pondola oku namulãla laye. Handi vali, ka ca sungulukilevo oku likuela lomunu umue ka vumbi Yehova loku lavoka okuti eteke limue pamue o ka lilongisa ocili.

6-7. Nye o sukila oku lipula catiamẽla komunu o yongola oku likuela laye?

⁶ Ocili okuti pokati Kakristão va papatisiwa, havosiko va ka kala ohueli yimue yiwa kokuove. Omo liaco, nda okuti ove o kasi oku sanda omunu umue oco o likuele laye,a o sukila oku sokolola kapulilo a kuãimo ndeci: ‘Omunu waco, o tata ndati epata liaye? Eye omunu umue uwa kuenda wa sumbila omanu? Velie akamba vaye? Ovituwa vipi eye a lekisa eci omanu vakuavo ka va tava kovisimĩlo viaye? Eye olonjanja viosi o yongola lika okuti ovina vi lingiwa ndomo eye a yongola ale o tava kovisimĩlo viomanu vakuavo nda okuti ka vi li patãla leci Embimbiliya li popia? Anga hẽ eye o sole calua olombongo?’

⁷ Ove o pondolavo oku lipula ndoco: ‘Omunu waco, o lekisa hẽ okuti o sole Yehova lutima waye wosi? Eye wa wala hẽ “omunu wokaliye?” Eye o ka ñuatisa hẽ oku amamako oku vumba Yehova? Tu kuete hẽ ovimãho vimuamue? Tu ka kala hẽ akamba vawa?’ (Va Kol. 3:​9, 10) Nda okuti ove wukãi, manji ulume o kasi oku namulãla laye o ka kala hẽ ekamba limue liwa kuenda usongui umue uwa wepata? (1 Va Kor. 11:3) Nda okuti ove wumanji ulume, anga hẽ manji ukãi o kasi oku namulãla laye o ka sumbila ocikele cove coku kala usongui wepata ndaño lekambo liove lioku lipua? Ci ambata otembo oco o tambulule apulilo aco. Omo liaco, likolisilako oku kũlĩha ciwa omunu o kasi oku namulãla laye osimbu ka wa kueleli.

8-9. Nye ci pondola oku kuatisa omunu umue o kasi oku namulãla oku nõla onjila yimue yiwa? (Talavo ociluvialuvia.)

⁸ Ocina cimue ci ka ku kuatisa oku nõla onjila yimue yiwa vokuenda kuotembo yoku namulãla, oku kũlĩha ciwa ovituwa viomunu waco. Pulisa komanu vakuavo catiamẽla kekalo kuenda kovituwa viaye. Ndeci, anga hẽ eye omunu umue embombe, ukuahenda haeye ukuesunguluko? Manji umue ukãi o tukuiwa Sarah wo ko Guiana Francesa okuti wa likuela la manji umue ulume o tukuiwa Daniel wa popia hati: “Eci tua kala oku namulãla ame nda pulisa eci catiamẽla kulume wange ku manji umue ulume wa kala vonjo yimuamue haeye wa talavaya kumue lulume wange kupange wakundi votembo yosi. Nda pulisavo kukulu umue wo vekongelo liaye, kakamba vetu kuenda ku vamanji akãi vo vekongelo liaye.” Handi vali, pulisavo lesumbilo komunu ove o kasi oku namulãla laye nda kuli cimue ca lipita laye kosimbu ale cilo okuti ove o sukila oku ci kũlĩha. Eci ci kuete esilivilo momo, kuli ovina vimue kuenda ovituwa okuti, vi pondola oku koka ovitangi volohuela.

⁹ Kapako ovina omanu vakuavo va popia catiamẽla komunu o yongola oku likuela laye, momo ovina viaco vi pondola oku ku kuatisa oku nõla nda o kuela lomunu waco ale sio.b Kaliye, tu konomuisi ovina olohueli vi pondola oku linga oco vi pamise ukamba vi likuetele pokati.

PAMISI UKAMBA WENE POKU SOKIYA OTEMBO YOKU KALA KUMOSI

10. Momo lie ci kuetele esilivilo okuti olohueli vi sokiya otembo yimue yoku kala kumosi?

¹⁰ Olohueli vi pondola oku pamisa ukamba wavo kuenda olohuela viavo poku sokiya otembo yoku kala kumosi, ndaño okuti va kuete ovina vialua vioku linga. Kapuluvi aco, ovo va pondola oku sapela catiamẽla kovina va lipita lavio vokuenda kueteke, oku situlula ovisimĩlo viavo viondongosi, oku li lekisa ocisola kuenda oku linga olomapalo.

11. Nye ci pondola oku koka ovitangi volohuela?

¹¹ Nda okuti ohueli yimue yi li kuetele ukamba uwa, ka va ka pita otembo yalua ocipãla omunu lukuavo. Ocili okuti pamue ovo ka va ka kala kumosi otembo yosi. Pole, oku kala ocipãla vokuenda kuotembo yalua omunu lukuavo, ci pondola oku kapa kohele olohuela viavo. Ndeci, vamue va tava upange umue kofeka yikuavo loku siapo epata liavo vokuenda kuotembo yalua. Ndaño okuti poku ci linga ci kuatisa epata oku kuata olombongo, pole, oku kala ocipãla lepata vokuenda kuotembo yalua ci pondola oku koka ovitangi volohuela.

12-13. (a) Ovina vipi olohueli vimue via siata oku linga oco vi kuate otembo yoku kala kumosi? (Talavo ociluvialuvia.) (b) Esilivilo lipi ohueli yove yi kuete komuenyo wove? (Tala okakasia losapi hati: “Esilivilo Ohueli Yange yi Kuete Komuenyo Wange.”)

¹² Kũlĩhĩsa eci olohueli vimue via siata oku linga oco vi kuate otembo yoku kala kumosi. Manji umue ukãi o tukuiwa Leah o kasi kofeka yo Guam wa popia hati: “Ame kumue lulume wange, tu sole oku linga ovina vialua kumosi. Ka ca siatele okuti umue pokati ketu o tava elaleko limue ale o linga ocina cimue lika waye.” Manji umue ukãi o tukuiwa Roxanne wo ko Estadus Unidus wa popiavo hati: “Omo okuti tu kuete ovina vialua vioku linga, tua siata oku sokiya otembo yoku kala kumosi, ndeci tua siata oku linga lovina vikuavo vi kuete esilivilo.” (Sokisa la Amosi 3:3) Manji umue ulume o tukuiwa Damien wo ko Fransa wa popia hati: “Tua lilongisa oku kapako ovina omunu ukuavo a sole kuenda tua fetika oku sola ovina viaco.” (Mat. 7:12) Manji umue ukãi o tukuiwa Katie wo ko Estadus Unidus wa popiavo hati: “Olonjanja vimue, tua siata oku liwekapo oku talavaya lolotelefone vietu oco ka vi ka tu tateke oku sapela.”

¹³ Ocina cimue ci kuete esilivilo lia velapo, oku lingila kumosi ovina viespiritu. Manji umue ukãi o tukuiwa Myriam wo ko Fransa wa popia hati: “Oloneke viosi lomẽle, tu tanga Embimbiliya kumosi loku sapela catiamẽla kovina tua sola kuenda ndomo tu vi kapako komuenyo wetu. Ndi sole calua apuluvi aco! Ndi solevo eci ulume wange a tu lingilako olohutililo. Vapuluvi aco, nda siata oku limbuka ocisola eye a kuetele Yehova.” Manji Katie wa tukuiwa ale, wa popia hati: “Tu sole calua oku kundila kumosi. Ci sanjuisa calua oku yevelela eci omunu ukuavo oku vangula ovina viatiamẽla ku Yehova kuenda olonjanja viosi tua siata oku lilongisila ovina viokaliye komunu lukuavo.”—Olosap. 27:17.

AMAMIKO OKU KALA KUMOSI ECI VU LIYAKA LOVITANGI

14-15. Momo lie ohueli yi sukilila oku likolisilako oku tetulula ovitangi vi liyaka lavio volohuela? Tukula ocindekaise cimue.

¹⁴ Omo okuti olohueli ka via lipuile, vi ka liyaka lovitangi. Embimbiliya li popia okuti, ‘vana va kuele va laika oku tala ohali komuenyo.’ (1 Va Kor. 7:28) Ondaka yaco yi tiamisiwila kovitangi olohueli via siata oku liyaka lavio. Eci ovina viaco vi lipita, momo lie olohueli vi sukilila oku likolisilako oku tetulula ovitangi viaco loku amamako oku kala kumosi?

¹⁵ Kũlĩhĩsa ocindekaise ci kuãimo. Nda okuti osapalalo yimue ya kemãla ya toka, citava okuti muẽleaco o yi semũlũla. Eye pamue o pondola oku pesela otembo kuenda olombongo vialua oco a ci linge kuenje ka ka liwekapo ndaño okuti ci pondola oku ambata anyamo alua. Momo lie? Momo osapalalo yaco yi kuete esilivilo lialua kokuaye. Cimuamue haico okuti, olohuela viosi vi kuete esilivilo lialua. Ocili okuti, ndaño muẽle olohueli vina vi li kuetele ocisola calua, vi pondola oku kuata ovitangi. Pole, ndeci osapalalo yimue ya toka yi pondola oku semũlũiwa, olohueli vi pondolavo oku tetulula ovitangi vi liyaka lavio. Citava okuti oku ci linga, ci ka sukila otembo kuenda alikolisilo, pole, Yehova o sanjuka calua eci a limbuka okuti ohueli yimue yi kasi oku likolisilako oco yi pamise olohuela viavo loku amamako oku kala pamosi. (Mal. 2:16) Poku ci linga, ovo va lekisa okuti va li kuetele ocisola, esumbilo kuenda ca velapo, va ka lekisa okuti va sole kuenda va sumbila Yehova, Usovoli wolohuela.

16. Ndomo ca tangiwa kukanda 1 Va Korindo 13:​4-8a, nye ci pondola oku kuatisa ohueli yimue yi kasi oku liyaka lovitangi volohuela? (Talavo ociluvialuvia kuenda okakasia losapi hati: “Ovina vi Kuatisa Oku Pamisa Ukamba Volohuela.”)

¹⁶ Eci o kuata ovitangi volohuela, ku ka sokolole oku li tepa. (1 Va Kor. 7:​10, 11) Pole, lipula ndoco: ‘Nye ndi sukila oku linga oco ndi pamise ukamba ndi kuete lohueli yange?’ Lilongisa eci Embimbiliya li popia catiamẽla koku lekisa ocisola kuenda sokolola ndomo o mioñolola ovituwa vimue via tukuiwa kukanda 1 Va Korindo 13:​4-8a. (Tanga.) Ku ka sokolole oku nyõla olohuela viove, pole, likolisilako oku tumbulula ocisola vu li kuetele pokati. Tiamisila utima kovina o pondola oku linga oco o tumbulule olohuela viove. Likutilila ku Yehova oco a ku songuile. Linga akonomuiso valivulu etu kuenda volovideo loku pinga ekuatiso kakulu vekongelo ale Kakristão vakuavo va pama konepa yespiritu. Omo okuti Yehova eye ukolo wa pama haiwo wa velapo ‘kukolo wa kutiwa lutatu,’ nda wa linga ovina ndomo eye a yongola, olohuela viove vi ka ‘tĩla oku vi tepa.’—Uku. 4:12.

17. Vana va kasi oku sokolola oku kuela kuenda vana va kuela ale, va pondola oku kuata ndati esanju?

¹⁷ Yehova o yongola okuti afendeli vaye vosi, ci kaile vana va kasi oku sokolola oku kuela la vana va kuela ale, va kuata esanju. Nda okuti handi kua kuelele kuenda o yongola oku kuela, nõla lutate omunu o ka kala ekamba liove vokuenda kuomuenyo wove wosi. Nda okuti wa kuela ale, amamako oku pamisa ukamba o kuete lohueli yove. Handi vali, likolisilako oku tetulula ovitangi o pondola oku liyaka lavio volohuela viove poku sanda ekuatiso lia Yehova. Nda wa ci linga, o ka “Sanjukila omuenyo” kumosi lohueli yove o sole calua!—Uku. 9:9.