Ceci tu Pondola Oku Linga Oco tu Kuate Ukamba Uwa Lavakuepata Lietu Vana ka va Vumbi Yehova

1-2. Nye ci pondola oku nyõla ukamba tu kuete lavakuepata lietu vana ka va vumbi Yehova eci tu lilongisa Embimbiliya?

YESU wa sapuila kulume umue wa yonguile oku kala ondonge yaye hati: “Kuende ku vangandiove, va sapuila ovina viosi Yehova a ku lingila.” (Mar. 5:19) Yesu wa vangula olondaka viaco momo wa kũlĩhĩle okuti vosi yetu tu yongola oku kundila olondaka viwa kuvakuepata lietu.

² Ove hẽ, ivaluka ndomo wa liyeva eci wa fetika oku lilongisa Embimbiliya? Citava okuti wa kuata esanju lialua kuenda wa yonguile oku sapuilako vosi vakuepata liove ovina wa kala oku lilongisa! Pole, ovo pamue ka va ci solele omo okuti o kasi oku lilongisa Embimbiliya Lolombangi Via Yehova. Ale, citava okuti ove kua kuatele utate poku va lomboluila ovina wa kala oku lilongisa kuenje ca va temisa calua. Nda oco ca lipita love, ocipama cilo ci ka ku kuatisa oku kũlĩha ovina o pondola oku linga, oco wamameko oku vumba Yehova kuenda oku kuata ukamba uwa lavakuepata liove vana ka va vumbi Yehova.

3. Nye tu ka konomuisa vocipama cilo?

³ Vocipama cilo, tu ka konomuisa: (1) Ndomo ohenda yi pondola oku tu vetiya oku kapako vakuepata lietu okuti havakuetavokoa ndaño okuti ovo ka va yongola oku yevelela esapulo tu va kundila; (2) ovina tu pondola oku linga nda okuti ovo va vangula olondaka vi tu sumuisa; (3) ndomo tu kuatisa vakuepata lietu nda tua kala vakuepandi kuenda oku amamako oku lavoka okuti kovaso yoloneke ovo va ka vumba Yehova kuenda (4) ndomo tu pondola oku lekisa kokuavo okuti tu va sole calua.

LEKISA OHENDA

4. Nye Yesu a linga eci omanu ka va yonguile oku yevelela esapulo a kala oku kunda?

⁴ Yesu ka liwekelepo oku kuatisa vana ka va yonguile oku yevelela esapulo eye a kala oku kunda. Eye wa lisokisa lonalavayi yimue yocumbo cayuva ya likolisilako calua oco uti wukuyu wime apako. (Luka 13:​6-9) Yesu eci a ta olusapo luaco, pa pitile ale anyamo atatu okuti wa kala oku kuatisa va Yudea oco va kale olondonge viaye. Momo lie eye a kalela oku amamako oku va kuatisa? Momo Yesu wa va kuatelele ohenda kuenda ohenda yaco, yo vetiya oku lekisa epandi komanu vaco.

5. Nye ca vetiya Yesu oku lekisa ohenda ku va Yudea?

⁵ Yesu wa lekisa ohenda ku va Yudea momo wa kũlĩhĩle okuti asongui vetavo, ka va kaile oku kuatisa omanu oku kũlĩha ocili catiamẽla ku Yehova. Yesu wa mola okuti omanu vaco, “va kala ndolomeme ka vi kuete ungombo.” (Mar. 6:34) Yesu eci kua kambele otembo yimue oco a pondiwe, wa lila eci a mola olupale luo Yerusalãi momo, wa kũlĩhĩle okuti omanu valua va kala volupale luaco, va laikele oku fa omo liekambo liekolelo. (Luka 19:​41-44) Ndeci Yesu a linga, eci tu sokolola kesunga lieci vakuepata lietu va sukilila oku lilongisa eci catiamẽla kolondaka viwa, tu vetiyiwavo oku va kundila.

6. Momo lie tu sukilila oku lekisa epandi ku vakuepata lietu okuti ka va lilongisa Embimbiliya? (Va Galatia 6:9)

⁶ Tanga Va Galatia 6:9. Ndaño okuti vakuepata lietu ka va yongola handi oku lilongisa catiamẽla ku Yehova, tu sukila oku lekisa epandi kuenda ka tu liwekapo “oku linga eci ciwa.” Tua kũlĩha okuti, ci ambata otembo oco omanu va linge apongoloko kuenda oku kuatela ekolelo Yehova. Anga hẽ kosimbu, wa kalavo ndomanu vana ‘ka va kuatele elavoko kuenda ka va kuatele Suku voluali?’ (Va Efe. 2:12) Nda oco, omunu umue wa lekisa epandi kokuove loku ku kuatisa oku linga apongoloko kuenda oku ku longisa catiamẽla ku Yehova. Oco hẽ, ku vetiyiwavo oku lekisa epandi ku vakuepata liove oco o kuate epuluvi lioku va kuatisa oku lilongisa catiamẽla ku Yehova?

SETEKA OKU KUATA ELOMBOLOKO LIESUNGA LIECI VAKUEPATA LIOVE VA LEKISILA OVITUWA KA VIA SUNGULUKILE

7. Nye pamue ca tateka vamanji va Yesu oku lekisa ekolelo kokuaye?

⁷ Citava okuti vamanji va Yesu va yeva ovina viatiamẽla kovikomo Yesu a linga ko Galilea. (Luka 4:​14, 22-24) Pole kefetikilo, ovo ka va lekisile ekolelo kokuaye. (Yoa. 7:5) Momo lie? Embimbiliya ka li ci lombolola. Olio li lombolola lika ovina vivali via tateka va Yudea vamue oku linga olondonge via Yesu. Vamue va kuatele usumba woku lambalaliwa. (Yoa. 9:​18-22) Vakuavo va kũlĩhĩle Yesu tunde vutila kuenda ka ca lelukile kokuavo oku tava okuti eye wa kala omõla a Suku. (Mar. 6:​1-4) Citava okuti vamanji va Yesu va kuatelevo ovisimĩlo vimuamue. Anga hẽ vakuepata liove ka va yongola oku yevelela esapulo Liembimbiliya omo liusumba woku lambalaliwa ale omo okuti ove o kasi oku va kundila?

8. Nye ci pondola oku vetiya vakuepata lietu oku lekisa ovituwa ka via sungulukile?

⁸ Kuata elomboloko liesunga lieci vakuepata liove va lekisila ovituwa ka via sungulukile. Citava okuti vamanji va Yesu va kala pokati komanu vana va popia okuti, ‘Yesu wa linga eyui.’ (Mar. 3:21) Momo lie vamanji va Yesu va simĩla ndoco? Ulandu Wembimbiliya u lekisa okuti Yesu wa tiamisilile calua utima koku kunda kuenda koku sakula omanu okuti, ka kuatele otembo yoku lia. (Mar. 3:20) Omo liaco, eli olio esunga lieci vakuepata liaye va simĩla okuti eye wa linga eyui. Cimuamue haico okuti, vakuepata lietu va pondolavo oku sima okuti, tu kasi oku pesela otembo yalua kupange wa Yehova. Nda eci oco ocisimĩlo cavo, tu sukila oku lekisa pocakati covina tu popia kuenda kovilinga vietu okuti tuakuesunguluko.

9. Nye ci pondola oku kuatisa vakuepata lietu oku pongolola ovisimĩlo viavo viatiamẽla Kolombangi Via Yehova? (1 Petulu 3:​1, 2) (Talavo oviluvialuvia.)

⁹ Amamako oku kala ukuahenda kuenda ukuesunguluko. Eci tu lekisa ohenda ku vakuepata lietu ci kaile konjila ndomo tu vangula ale kovituwa vietu, ovo va pondola oku pongolola ovisimĩlo viavo viatiamẽla Kolombangi Via Yehova. (Tanga 1 Petulu 3:​1, 2.) Ndeci, ulume umue okuti Hambangiko ya Yehova, o pondola oku liyeva ulika ale oku tema eci ukãi waye a enda kolohongele viekongelo kuenda kupange woku kunda. Omo liaco, ukãi waco o pondola oku linga esokiyo liwa konjila ndomo a tẽlisa upange wa Yehova, oco a pite otembo yalua lulume waye. Citava okuti eye enda kupange woku kunda eci ulume waye a kasi oku linga upange umue ale ceci ka kasi konjo. Nda okuti manji ukãi wa lekisa esunguluko, o pondola oku kuatisa ulume waye oku pongolola ocisimĩlo caye catiamẽla Kolombangi Via Yehova.

10. Tu setukula ndati Yesu eci omanu va popia ovina ka via sungulukile viatiamẽla kokuetu?

¹⁰ Yuvula oku tambulula olonjanja viosi eci epata liove li ku pisa. Yesu eci a lundiliwa okuti ocisapanu kuenda ukuakunyua ovinyu, eye ka temele ale oku li lombolola oco a lekise komanu okuti ovina ovo va kala oku popia haviociliko. Pole, eye wa yonguile okuti omanu va mola ovituwa viaye loku limbuka nda ovina ovo va yeva viatiamẽla kokuaye viocili muẽle ale sio. (Mat. 11:19) Yesu wa lekisavo pocakati congangu yaye okuti, wa kuatele ocisimĩlo ca sunguluka catiamẽla komuenyo waye. (Sokisa lelivulu lia Yoano 2:​2, 6-10.) Ndeci Yesu a linga, eci omanu va popia ovina ka via sungulukile viatiamẽla kokuetu, halonjanja viosiko tu sukila oku tambulula oco tu lekise okuti ovina ovo va kasi oku popia haviociliko. Pole, pocakati covilinga vietu, tu pondola oku lekisa ku vakuepata lietu okuti, tuakuesunguluko kuenda tu kuete esanju loku ecelela okuti ovo muẽle va limbuka nda ovina viaco viocili ale sio. Eci ovo va mola ovina viaco, va pondola oku limbuka okuti ovina ka via sungulukile va yeva viatiamẽla kokuetu haviociliko.

AMAMAKO OKU LEKISA EPANDI KUENDA OKU LAVOKA OKUTI ETEKE LIMUE OVO VA KA TAVA KOCILI

11. Yesu wa tata ndati vamanjaye vana ka va lekisile ekolelo kokuaye?

¹¹ Embimbiliya li lekisa okuti Yesu wa amamako oku kala ukuepandi la vamanjaye. Ndeci, ovo va kalavo vo Kana eci Yesu a linga ocikomo caye catete. (Yoa. 2:​11, 12) Ndaño okuti ovo va mola ocikomo caco, ka va lekisile ekolelo kokuaye. Pole, Yesu ka liwekelepo oku kuata ukamba uwa lavo omo okuti ka va lingile olondonge viaye. Embimbiliya li popia okuti noke lioku pita anyamo atatu, Yesu wa amamako oku vangula lesumbilo la vamanjaye.—Yoa. 7:​5-8.

12. Nye ci tu kuatisa oku amamako oku lavoka okuti eteke limue vakuepata lietu va ka tava kocili?

¹² Eci tu kuata elomboloko lia suapo liatiamẽla kohenda Yehova a lekisa komanu, ci tu kuatisa oku amamako oku lavoka okuti, eteke limue ovo va ka tava kocili. Eci etavo liesanda li ka kunduiwa, vakuepata lietu pamue va ka ivaluka okuti tua va sapuilile ale okuti ovina viaco vi ka lipita. b (Esit. 17:16) Kuenje, citava okuti va ka nõlapo oku fendela Yehova eci ohali ya piãla yi ka fetika. Pole, osimbu otembo yaco ka ya pitĩlile, eci vakuepata lietu va liyaka lovitangi, tu likolisilako oku va kuatisa. Eci ovo va limbuka okuti tu va kuetele ocisola cocili, citava okuti va ka vetiyiwa oku lilongisa catiamẽla ku Yehova.

LEKISA KU VAKUEPATA LIOVE OKUTI O VA SOLE

13. Ndaño okuti tu kasi oku vumba Yehova lutima wosi, utate upi tu sukila oku kuata?

¹³ Ndaño okuti tu kasi oku vumba Yehova lutima wosi, pole, ka tu yongola oku eca ocisimĩlo ku vakuepata lietu cokuti, ka tu kuete otembo yoku kala lavo ale ka tu va sole vali. (Mat. 7:12) Tu pondola oku lekisa ndati okuti tua va kapako? Tu konomuisi ovina vimue vi tu kuatisa oku ci linga.

14-15. Tu lekisa ndati okuti tu sole vakuepata lietu ka va vumbi Yehova? Tukula ulandu umue.

¹⁴ Sapela la vakuepata liove olonjanja viosi kuenda lekisa kokuavo okuti o va sole. Tu lekisa ku vakuepata lietu okuti tu va sole, poku sapela lavo kuenda oku va lomboluila ndomo tu kasi. Ndeci, tu pondola oku va tumisa esapulo limue kuenda alitalatu liapuluvi awa tua kuata. Tu pondolavo oku eca kokuavo ombanjaile yimue ale oku va sonehela ukanda umue wocisola. Eci ci ka lekisa okuti tua va kapako kuenje tu ka kuata ukamba uwa lavo. Poku linga ovina viosi tu tẽla oco tu lekise ocisola ku vakuepata lietu, tu va kuatisa oku kũlĩha okuti tu va kuetele ocisola cocili.

¹⁵ Kũlĩhĩsa ulandu wa manji umue ukãi o tukuiwa Anna wo ko Armenia. Epata liaye lia siata oku kala pamosi ca piãla enene vokuenda kueteke lioku citiwa kuenda koloneke viowusa. Eci manji Anna a linga Ombangi ya Yehova, vakuepata liaye va kuata usumba wokuti ukamba a kuete lavo u tepuluka. Ovo va kuatavo usumba wokuti, omuenyo waye ka wa ponduile oku leluka. Manji Anna wa liyaka ndati locitangi caco? Eye wa popia hati: “Eci ndi nyula vakuepata liange, nda siata oku va sapuilako ovina viatiamẽla komuenyo wange kuenda upange nda siata oku linga. Handi vali, nda siatavo oku va laleka oco veye konjo yange loku va lekisa akamba vange. Omo liaco, valua vakuepata liange va kũlĩha ciwa akamba vange kuenje va lianja lavo.” Handi vali, manji Anna wamisako hati: “Valua vakuepata liange va ndi sapuila okuti ndi kuete esanju kuenda ka va sakalala vali calua lame.”

16. Yesu wa lekisa ndati okuti wa kapeleko manjaye Tiago? (Talavo etosi.)

¹⁶ Lekisa ku vakuepata liove okuti va kuete esilivilo kokuove. Yesu noke liepinduko liaye, wa lekisa okuti wa kapako manjaye Tiago poku u sandiliya kuenda oku sapela laye. (1 Va Kor. 15:7) O pondola hẽ oku sokolola ndomo Tiago a liyeva eci a limbuka okuti Yesu handi wo kapeleko? Citava okuti epuluvi liaco, lia kuatisa Tiago oku kolela okuti Yesu eye Mesiya. Kuenje, Tiago pamue wa kuatisavo omanu vakuavo vepata oku kuata elomboloko liokuti, Yesu eye Mesiya.c—Ovil. 1:14.

17. Nye tu lilongisila kelungulo li sangiwa kukanda ku va Roma 12:15? (Talavo ociluvialuvia.)

¹⁷ Tanga Va Roma 12:15. Nda tua lekisa okuti tua kapako vakuepata lietu ci kaile kapuluvi awa ale kovitangi, tu pondola oku va kuatisa oku pongolola ovisimĩlo viavo viatiamẽla kokuetu.d Ndeci, eci umue ukuepata lietu a cita oñaña yimue, tu pondola oku u pandiya loku eca kokuaye ombanjaile yimue oco tu lekise okuti tua sanjuka kumue laye. Nda va va fisa omunu umue va sole calua, tu pondola oku va sapuila olondaka vimue vi lembeleka, oku va kuatisa ale oku va sonehela ukanda umue welembeleko. Handi vali, tu pondola oku va telefonalela, oku va tumisa esapulo limue ale oku va nyula olonjanja vialua, ca piãla enene eci va kasi oku tala ohali omo liocitangi caco ka ca lelukile.

18. Tu pondola oku setukula ndati ndonge Andereu?

¹⁸ Kuatisa vakuepata liove oku kũlĩha vamanji vakuavo vovekongelo. Eci ndonge Andereu a limbuka okuti Yesu eye Mesiya, lesanju lialua wa pañinya manjaye Petulu oco a ende laye oku ka lisanga la Yesu. (Yoa. 1:​40-42) Anga hẽ tu pondolavo oku linga cimuamue la vakuepata lietu? Ndeci, anga hẽ olonjanja vimue tu pondola oku laleka umue ukuepata lietu oco a ende letu kohongele yimue yekongelo ale oku lila kumosi lakamba vetu? Eci vakuepata lietu va kũlĩha Olombangi vikuavo Via Yehova, ovo va pondola oku limbuka okuti tu kasi ndomanu vakuavo, tu kuete ocikembe kuenda tumanu vamue vawa.

19. Nye tu sukila oku linga ndaño okuti vakuepata lietu ka va kuata elomboloko lia suapo liovina tu tava? (1 Petulu 3:15)

¹⁹ Tanga 1 Petulu 3:15. Citava okuti vakuepata lietu, ka va kuata elomboloko lia suapo liesunga lieci ka tu lingila ovina vimue, pole, olonjanja viosi va ka ivaluka ocikembe kuenda esumbilo tu va kuetele. Ndaño okuti ka tu kala vali lavo kovipito viowusa ale ka tu likongela lavo kovihilahila viavo, ovo va ka sanjuka eci tu likolisilako oku pita otembo lavo. Ndeci, tu pondola oku va nyula, oku pongiyila kumosi okulia kuenda oku eca kokuavo olombanjaile kapuluvi akuavo.

AMAMAKO OKU LAVOKA OKUTI VAKUEPATA LIOVE ETEKE LIMUE VA KA VUMBA YEHOVA

20. Momo lie ongangu yondonge Tiago yi tu pamisila?

²⁰ Tiago wa pumba epuluvi lioku kuama Yesu vokuenda kupange waye woku kunda, pole, noke weya oku kala ondonge ya Yesu. (Va Gal. 1:​18, 19; 2:9) Ndaño okuti Tiago ka kaile umue pokati kolondonge viatete via Yesu, eye wa kapeleko calua alongiso aye. Ndeci, vukanda umue a sonehela Akristão, Tiago wa tukula ovina vimue tu lilongisila Kohundo Yesu a lingila Komunda.e

21. Momo lie tu sukilila oku amamako oku kuatisa vakuepata lietu?

²¹ Ndaño tu likolisilako calua oco tu kale vakuahenda la vakuepata lietu loku lekisa kokuavo okuti tua va kapako, citava okuti ovo va kamamako oku tu tata lonjila yimue ka ya sungulukile ale ka va ka lekisa onjongole yoku lilongisa ovina viatiamẽla ku Yehova. Momo lie tu sukilila oku amamako oku lekisa ocisola ku vakuepata lietu? Momo nda tua ci linga, tu ka setukula Yehova, Suku yetu ukuacikembe kuenda omõlaye Yesu. (Luka 6:​33, 36) Nda tuamamako oku lekisa ocisola kokuavo, ovo va pondola oku pongolola ovisimĩlo viavo viatiamẽla kokuetu. Kuenje ndaño okuti ka tu ci limbuka, ovo va ka ivaluka ovina vialua tua va sapuila viatiamẽla ku Yehova kuenda kolohuminyo viaye. Omo liaco, nda ka tua liwekelepo oku va kuatisa, citava okuti tu ka kuata esanju poku mola vamue pokati kavo oku likongela letu kefendelo liocili!